Ululahu Jone 5:20 - Buka Blahi Ka Cheke Holo

²⁰ Eghuteuna tahati lasenihi Thugna God ne mei tusu ranghi ghita glalase mala laseni tahati thofno God. Eghuteuna tahati au balugna mae ihei te tutuani, tulao balugna mae Jisas Kraes. Mana thofno God nei mae ihei te tusu ranghi ghita u karha fei tifa na.

Ululahu Jone 5:20 ပူးပေါင်းရင်းမြစ်များ

Jone 17:3

Eghuteuna karha fei tifa igne gaoghathogna na naiknore mala lase nigho, iagho kaisei God ngala te tutuani, eghuteuna naiknore mala lase ghau la iara mae Thumu Jisas Kraes, mae teke kuru mei iagho kau nauthoglu igne.

Luku 24:45

Mae Jisas ne tothora gaoghathodi mare re. Aonu mare ne tangomana te laseni grioriso te blahi na.

Jone 14:9

Mae Jisas ne cheke eghu ka mana, “Ghema Filip, iara au raughahi balumi ghotilo. Ba theome lase fakeli ghau ngala iara si ghotilo ia? Tutuani fara, mae ihei te filo ghau iara na, mana la filonihi mae Mama. Naugna unha site chekeni iagho, ‘Fatakle ranghi ghami mae Mama na’ teu gnea?

Ululahu Timoti 3:16

Tutuani fara, nogna thofno farirhiu khiloau na kaisei glepo biꞌo fara. Eghuteuna thofno farirhiu tuana cheke eghu, Mae Kraes neke vuha mei thini jateula naikno. Mae Tharunga te Blahi neke fatakleni puhigna mae Kraes na thono doglo fara. Engel re neke filoni mana. Naiknore neke tei toutonu eigna mana ka namono te kmanare. Naikno heva heva ka nauthoglu igne neke fatutuani ni mana. God neke hata hagheni mana kligna ka siasigla.

Profet Isaia 44:6

Lord mae ihei te au nolaghi fateote'o igne nodi King mae Israel, eghuteuna mana atha fasnagli ghami ghotilo. Mana neke cheke eghu, “Iara ngala God na, iara neke kulu au neke aunga gobigna lepo igre, eghuteuna iara ginauna na jaola leghu lahu. Uve, theo kaisei god ahevanga, kaisei Iara ngala.

Ululahu Jone 5:1

Iheire fateo te fatutuani ni mae Jisas na mae Kraes, igre goro thugna God. Ihei te namhani God Mama na jaola namhadi thugnare.

Jone 20:28

Mae Tomas ne cheke eghu ka mana, “Tutuani fara, iagho nogu Lord nei nogu God!”

Thakle 3:7

Mae igne neke cheke eghu ka iara, “Iagho rioriso tei kaisei letas ranghini engel gna khiloau Filadelfia, eghuteuna iagho cheke eghu ka mana: Igre nogu cheke iara mae ihei te blahi nei taji fabrahuni teu nogu nhaꞌa cheke na. Iara au nolaghi te mala funei frunidi naiknore jateula mae King Devet tifa ia eghu. Tutuani iara au nolaghi te mala chekeni ihei te ruma haghe ka nogna nauthoglu majaghani God na, nei ihei nate theome ruma haghe jare na. Jateula iara te au kaisei ki ka khamegu na te mala tothora grengatha na ranghidi kehare nei bobotho ranghidi kehare teuna.

Ululahu Jone 4:16

Eghume tahati lasenihi nei fatutuanihi nogna namha ranghi ghita. Namha na funu mei ka God. Eghume, ihei te au ka namha na au balugna God nei God au balugna mana.

Letas Teke Riso Tei Mae Pol Ka Khiloau Rom 9:5

Mare neke jifla mei ka vikedi goro mae biꞌo Jiu te ulu tifa ra, eghuteuna Kraes na jaola neke karha mei naikno ka vikedi mare. Eghuteuna mana ngala mae funei biꞌo ke klignadi naikno te gnafare, mae ihei tahati te mala kilo fnaknoni tifa tifa. Amen.

Jone 10:30

Uve, ghepa mae Mama na kaisei ngala.”

Profet Isaia 9:6

Uve, tahati thofno gleale'a fara, naugna kaisei sua nalhaꞌu ginauna karha mei ka tahati. Lord tusu mei sua igne mala funei fruni ghami. Eghuteuna mare ginauna kiloni mana, Mae keli mala tufa gaoghatho te keli, eghuteuna God mae ihei te rheta fara, nei Kmada mae ihei te togho ghita fabrahu, nei mae biꞌo mala togho ghita mala au ka pharikeli.

Ululahu Jone 4:2

Nu jame mae ihei te cheke eghu na, “Iara fatutuani ni mae Jisas Kraes, mana mei ka nauthoglu gne neke vuhai naikno.” Ka puhi tuana, ghotilo tangomana te laseni gaoghatho teke mei funu ka mae Tharunga te Blahi na. Tutuani, gaoghatho tuana neke funu mei ka God.

Hibru 1:8

Nu God neke cheke eghu agne eigna mae Thugna, “God, nou sape nafnakno iagho na au fabrahu tifa e tifa! Iagho ginauna na funei frunidi nou naiknore ka puhi te keli nei doglo.

Mae Khuru 20:28

Eghume filo fakeli ghami themiu, baludi naikno te gnafa teke lisa ari mala reireghidi ghotilo teku mae Tharunga te Blahi are. Ghotilo mala jateula mae greireghi sipu eghu mala reireghi fakelini nogna khiloau God teke fofoli ka glehegna mae Thugna ia.

Jone 17:14

Iara la tusu laohi ka mare nou farirhiu iagho ra. Eghuteuna naiknogna nauthoglu igne theome magnahaghedi mare, naugna mare theome nogna nauthoglu igne, jateula ngau iara gne theome nogna nauthoglu igne.

Thakle 19:11

Aonu iara ne filoni maloa na ne thora, eghuteuna iara ne filoni kaisei hose vegha. Mae te saghe ka hose na nanghagna na, “Mae ihei te eni fakeli nogna gloku na, nei nogna cheke na doglo fabrahu.” Kate fatedi naiknore nei kate tei ka magra teuna, puhigna mana na jaola doglo fara kolho.

Thakle 15:3

Mare ne kojeni kaisei khoje teke rioriso mae Moses, nogna mae gloku God. Tutuani, mana kilo fnaknoni God naugna God neke toghodi mare ka nogna tothogho mae Lam, ne cheke eghu, “Nomi Lord God, te nolaghi fara, nou gloku iagho re thono biꞌo fara, eghuteuna ghehati ne jaglo nomi fara. Iagho nodi King namono te gnafa ka nauthoglu igne, eghuteuna puhimu iagho re doglo nei tutuani fara eghu.

Thakle 6:10

Tharunga igre ne eha eghu fabiꞌo ka God, “Lord, iagho thofno blahi fara nei tajini fabrahu nou nhaꞌa cheke na. Thosei faraugha te mala fate falehedi naiknogna nauthoglu igne. Eigna mare ne jafra fara. Gognaro na iagho mala paradi mare, naugna mare neke falehe ghami ghehati!”

Thakle 3:14

Mae igne neke cheke eghu ka iara, “Iagho rioriso tei kaisei letas ranghini engel gna khiloau Leodisia, eghuteuna iagho cheke eghu ka mana: Igne nogu cheke iara na mae ihei te mala falalase ari nogna nhaꞌa cheke God gre thofno tutuani fara. Eghuteuna iara kaisei mae mala toutonudi nogna cheke mana re ka thofno puhi te tutuani fabrahu tifa tifa. Eghuteuna gobigna lepo teke vuavuha God igre, neke mei funu ka iara.

Ululahu Jone 4:14

Tahati filonihi mana nei toutonuni ka naikno eigna Mama te kuru meini Thugna mala fakarhidi naikno te gnafa ka glehe.

Filipae 3:9

nei mala kaisei balugna mana. Eghume iara gognaro na theome tangomana te cheke eghu, “Iara au doglo ke ulugna God naugna iara ne leghuni nodi vetula mae Jiu gre.” Theo. Nu iara doglo ke ulugna God naugna iara ne fatutuani ni mae Jisas Kraes.

Fapea Korin 4:6

Naugna God neke chekeni naphae na mala siasigla kate romno na, eghuteuna God tuanala te fasigla mei u naphae gna na ka nagnafami ghehatire. Mana eni igne mala lase fakelini ghehati nogna nolaghi biꞌo God te sigla mei ka thinigna Kraes.

Jone 15:4

Eghume ghotilo au fabrahu balugu iara, eghuteuna iara ginauna au fabrahu balumi ghotilo. Grege te au thegna sopa na theome tangomana te ure na, naugna ne theome au fodu kau gaju gna na. Ghotilo na jateula tuana eghu te theome au ghotilo balugu iara na. Eghuteuna ghotilo theome tangomana te ure themi na.

Jone 14:23

Mae Jisas ne cheke eghu ka mana, “Tutuani fara, mae ihei te namha ghau iara na, mana ginauna leghudi nogu farirhiu iara re. Mae Mama ginauna jaola namhani mana, eghuteuna ghepa mae Mama ginauna mei ka mana mala au fabrahu balugna mana.

Jone 14:20

Kau narane tuana, ghotilo ginauna lase ghau iara te au balugna mae Mama, eghuteuna ghotilo au balugu iara, eghuteuna iara au balumi ghotilo.

Jone 14:6

Mae Jisas ne cheke eghu ka mana, “Iara nabrou na, iara tutuani na, nei iara karha na. Jare na theo kaisei nabrou heva nga te mala tei te thoke ka Mama na, mei ka iara.

Jone 1:18

Funu tifa te ghilei thoke ka narane gognarogne, theo kaisei naikno te thofno filoni God na. Nu mae Jisas Kraes thofno mae Thugna God te au balugna Mama na ngala te mei fatakleni God ka tahati na.

Luku 21:15

Naugna iara ginauna na tusu ari ka ghotilo glalase te mala chekedi kmana glepo te theome tangomana nomi mae naoka ghotilo re te cheke fapari ghami ghotilo ne jafra ghotilo teuna.

Matiu 13:11

Mae Jisas ne cheke eghu ka mare, “Te eni iara igne, naugna God neke tusu ari kolho ka ghotilo glalase te mala lase fakelidi thofno glepo te au poru ka nakarha God te funei frunini. Nu iara cheke ranghidi keha naiknore ka cheke naba kolho.

Profet Jeremaea 10:10

Nu Lord, iagho thofno God. Iagho God mae ihei te karha fabrahu, eghuteuna iagho ginauna king fabrahu tifa e tifa. Kate diꞌatamu iagho na, vido te gnafa ka nauthoglu igne ginauna nghali tongana, eghuteuna theo kaisei naikno ka keha kantri igre naba te kegra maku na.

Profet Isaia 54:5

Naugna iara jateula mae tholaghi eghu ka ghotilo, naugna iara neke vuavuha ghami ghotilo. Nanghagu iara na Lord, mae ihei te au nolaghi fateote'o. Eghuteuna iara nodi God te blahi mae Israel mae ihei te atha fasnagla ghami nei funei frunidi naikno te gnafa ka nauthoglu igne.

Ululahu Jone 2:24

Hati nhetami na leghuni fabrahu farirhiu teke nomhini ghotilo tifa ia. Jame leghuni fabrahu ghotilo farirhiu tuana, ghotilo ginauna na au baludi Thugna ghe Mama.

Fapea Korin 5:17

Tutuani fara, ihei te nogna Kraes na, mana kaisei naikno majaghani. Glepo te thonare la theohi ka mana, eghuteuna glepo te majaghanire teke mei au ka mana re.

Ululahu Korin 1:30

Nu God neke togho ghami ghotilo mala kaisei ghotilo balugna mae Jisas Kraes. Eghuteuna ka Kraes na, tahati lalase fara, eghuteuna doglo fara ka tathagna God na, nei mala nogna naikno blahi mana. Kraes na jaola neke foli fajifla ghita ka nakhibo.

Jone 17:25

“Mama, iagho ngala te thofno keli fara na. Naiknogna nauthoglu igne theome lase nigho iagho, nu iara lase nigho iagho. Eghuteuna nogu naikno iara igre lase nigho iagho mae teke kuru mei ghau iara na.

Profet Jeremaea 23:6

Ka narane te king mana igre, mana ginauna fakarhidi nogu naikno iara ka kantri Juda, eghuteuna nogu naikno iara te au Israel igre ginauna au ka pharikeli. Eghuteuna mare ginauna kiloni nanghagna mae king igne, Lord Sedekenu, gaoghathogna na, ‘Lord batu ghita tahati mala leghuni puhi te doglo na.’

Jone 8:42

Mae Jisas ne cheke eghu ka mare, “Jame thugna God tutuani ghotilo na, ghotilo jame namha ghau iara naugna iara neke mei funu ka God, eghuteuna te gognarona iara au agne. Aonu, iara theome mei kau nogu nolaghi thegu, nu iara mei ka nogna nolaghi God mae teke kuru mei ghau na.

Ululahu Jone 2:23

Jame kaisei naikno te theome fatutuani ni Thugna na, mana theome fatutuani nila Mama. Naikno te fatutuani ni Thugna na, mana fatutuani nila Mama.

Ululahu Jone 5:5

Ba, ihei tangomana te tapla soruni puhigna nauthoglu igne? Uve, mae ihei ngala te fatutuani ni mae Jisas na thofno Thugna God.

Ululahu Jone 5:15

God fanomho ka tahati leghu fata kate tore tahati na. Eghume tahati laseni mana tusu ranghi ghita glepo te toreni tahati ka mana na.

Ululahu Jone 5:18

Tahati laseni ihei te thugna God na theome mala tapla jafra fabrahu ka nakhibo, naugna mae Jisas Thugna God na reireghi fakelini mana, eghuteuna mae Satan theome tangomana te habo lao ka mana.