Thakle 18:6 - Buka Blahi Ka Cheke Holo

⁶ Ghotilo mala ke foli fapulo unha teke edi naꞌa ranghi ghami re, nu ghotilo mala foli fapulo phei fata ke tulaodi glepo te diꞌa teke edihi naꞌa ka ghotilo ra.

Thakle 18:6 ပူးပေါင်းရင်းမြစ်များ

Profet Jeremaea 50:29

Lord ne cheke eghu, “Ghotilo mae te lase fada ka phaloho ra, ghotilo tei magra Babilonia. Ghotilo bara ligohoni Babilonia mala theome tangomana kaisei naikno te rikha na. Ghotilo ke tughu fapulo unha teke edi mare ra. Uve, paradi si ghotilo jateula teke edi mare ka keha naikno ra eghu. Naugna mare ne phaꞌu maku fara ne theome leghu ghau iara Lord nodi God mae Israel te thofno blahi fara.

Nodi Khoje Hatimare Mae Jiu 137:8

Ghotilo naiknomi Babilonia ra, God ginauna goigoni ghami ghotilo. Naikno teke tughu fapulo ka ghotilo unha teke eni ghotilo ka ghehati na, mare ginauna keli tadi fara. Mare ginauna na para ghami ghotilo eigna unha teke eni ghotilo ka ghehati na.

Profet Jeremaea 50:15

Khapru faligohoni namono igne, eghuteuna eha fabiꞌo ka mare! Naikno gna namono igne ginauna snakredi thedi ka ghotilo. Nodi vido mala poru mare balugna nodi gringni gna namono na ginauna groꞌe khoko sukha pari. Igne puhigu iara Lord nate paradi mare na. Eghume, iara magnahaghei ghami ghotilo te paradi mare na jateula teke eni mare teke paradi keha naikno ra eghu.

Thakle 16:19

Aonu namono biꞌo Babilon na ne fnota ka thilo vido. God ne ghathodi nakhibo te gnafa teke edi naiknodi Babilon re. Aonu mana ne paradi fara naiknore. Eghuteuna keha namono te gnafare ka nauthoglu igne jaola ne phaꞌe soru pari.

Thakle 14:10

God ginauna parani naikno tuana. Tutuani, naikno tuana ginauna mala ko'uni kapu waen te fodu ka diꞌatagna God na. Waen tuana thono raha fara eghuteuna God ginauna jaola rahani fara kate paradire. Eghuteuna naikno tuana ginauna au papara ka khaꞌaghi te brana fara nei ka thina te ngaja ke uludi hatimare mae engel nei ke ulugna Lam.

Profet Jeremaea 51:24

Lord ne cheke eghu, “Ghotilo naiknomi Israel. Ghotilo ginauna filoni te goigoni ni iara Babilonia baludi iheire te au ka kantri tuana eidi glepo te diꞌa teke edi mare Jerusalem.

Thakle 17:4

Pohe te pipichi gaꞌase na pipito nei ukru jateula nogna pohe gaꞌase te funei frunidi naiknora eghu. Eghuteuna naꞌa jaola fahaghe glepo te gol nei famane thina nei buli te siasigla. Ka khamegna na naꞌa louloku kaisei kapu teke hohoro ka gol te fodu ka glepo te diꞌa te thona fara. Eghuteuna glepo igre, puhi chara teke edi naꞌa ka naiknore.

Profet Sekaraea 9:12

Ghotilo jateula te au ka suga sosolo eghu. Nu ghotilo iheire te au nomi fatutuani ka Lord te mala fakarhi ghami na, ghotilo gognarona tangomana teke pulo mei ka nomi vido mala poru na! Eghuteuna naugna ghotilo te papara fara na, ka narane igne nhaꞌa cheke, iara ginauna fablahi ghami nei phei fata nhaꞌa ari glepo te keli ke klignadi puhi biꞌo teke thoke ghami ghotilo tifa ra.

Profet Jeremaea 17:18

Mare para ghau iara fabrahu, famamajadi sagho, nu thosei famamaja ghau iara eghu. Famamhaghudi sagho, nu iagho thosei famamhaghu ghau iara. Snakre mei puhi biꞌo sagho mala thokedi mare, eghuteuna iagho mala phei fata paradi mare.

Profet Jeremaea 16:18

Iara ginauna phei fata para ghami ghotilo eidi nakhibomi ghotilore, naugna ghotilo ne goigoni nogu namono iara igne ne diꞌa ka tathagu iara na. Uve, nogu namono iara igne fodu ka nomi mumuju ghotilo te theo karha tadi igre.” Igne chekegna Lord.

Fapea Timoti 4:14

Mae Aleksada, mae ihei te lase hohoro glepo ka aean gne edi kmana glepo diꞌa ranghi ghau iara. Lord ginauna nake tughu fapulo unha teke edi mana ka iara re.

Profet Jeremaea 51:49

“Kmana naikno heva heva ka nauthoglu igne neke uka pari, naugna Babilonia neke goigonidi mare. Nu gognarona Babilonia mala uka pari, naugna mare neke goigonini Israel.

Thakle 17:2

Hatimare mae king te gnafa ka nauthoglu igne mare la enihi puhi te diꞌa na ka naꞌa. Tutuani, naiknogna nauthoglu igne ne fodu ka nakhibo naugna mare ne leghuni fabrahu puhigna naꞌa te diꞌa na.”

Thakle 13:10

Jame ihei teke snakreni God te mala tei ka suga sosolo na, tutuani mana ginauna mala au ka suga sosolo. Jame ihei teke snakreni God te mala lehe ka naflahi na, tutuani mana ginauna mala lehe ka naflahi. Eghume, te thoke mei puhi igre ka ghotilo na, ghotilo nogna naikno God ra mala kegra heta, nei mala fatutuani heta eghu ka God.”

Profet Isaia 40:2

Thoghei famane cheke ranghidi naiknodi Jerusalem, eghuteuna cheke ka mare te narane ninhigrana te thokedi mare igne la gnafahi. Uve, iara Lord la paradihi mare eidi nakhibodi fateote'o teke edi mare ra. Iara neke tusu ranghidi papara biꞌo, nu gognarona la gnafahi eghu.”

Profet Isaia 61:7

Ghotilo neke mamaja nomi fara naugna nomi naoka ghotilo ra neke ulu ghami ghotilo. Nu ghotilo ginauna nake au fakeli ka nomi kantri na, eghuteuna ghotilo ginauna atha kmana glepo nei vido glose eghu teke uludi teke atha ghotilo tifa ra, eghuteuna ghotilo ginauna gleale'a salaꞌui. Nomi gleale'a ghotilo igne ginauna au fabrahu.”

Nodi Khoje Hatimare Mae Jiu 28:4

Paradi sagho eidi unha teke edi nei leghudi teku mare re. Ke foli fapulodi sagho ka mare unha te nabagna u najafra teke eni mae te diꞌa gre.

Thakle 18:20

Eghuteuna engel ne cheke eghu, “Gleale'a ka ghotilo te au kligna baludi nogna naikno God ra! Gleale'a ka ghotilo hatimare mae khuru nei hatimare mae profet! Naugna God neke fateni namono igne eidi puhi te diꞌa teke edi naꞌa ka ghotilo ra.”

Lamentations 3:64

Lord, tughu fapulo sagho ka mare gobigna lepo fateote'o teke edi mare ka ghehati ra.