Letas Teke Riso Tei Mae Pol Ka Khiloau Rom 8:26 - Buka Blahi Ka Cheke Holo

²⁶ Jaola, Tharunga te Blahi na neke togho ghita naugna tahati theome heta kolho. Tahati theome laseni eigna tharai na, nu Tharunga te Blahi thegna te tarai heta ka God eida tahati ka natanhi te theome tangomana tahati te rurutha gaoghathogna na.

Letas Teke Riso Tei Mae Pol Ka Khiloau Rom 8:26 ပူးပေါင်းရင်းမြစ်များ

Matiu 10:20

Cheke te mala chekedi ghotilo re theome nomi ghotilo themi, nu nogna Tharunga te Blahi teke mei funu ka Kmami te au kligna na nate cheke ka nagnafami ghotilo re. Nu cheke tuare ngala te mala chekedi ghotilo re.

Efesus 6:18

Kate edi ghotilo glepo igre, ghotilo tarai nei toreni God eghu mala togho ghami mana. Tarai fabrahu ka nogna nolaghi mae Tharunga te Blahi. Tutuani, ghotilo tarabana fakeli koba nei thosei babaꞌo nei taraidi koba hatimare nogna naikno God fateote'o.

Galesia 4:6

Eghuteuna te mala laseni tahati te goro thugna God na, mana neke kuru mei Tharunga gna Thugna na mala au ke lamnada. Eghuteuna Tharunga na ne eha eghu, “Mama, Mama.”

Jone 14:16

Iara ginauna toreni mae Mama mala kuru meini mana ka ghotilo keha mae te mala togho ghami ghotilo, mana ginauna au fabrahu balumi ghotilo. Mana mae Tharunga te Blahi, mae ihei nate falalase glepo te tutuani eigna God na. Naikno te leghuni puhigna nauthoglu igne na, naikno tuana theome snakreni mae Tharunga te Blahi te mala mei ka mana, naugna mana ne theome laseni nei filo glanini neu mana. Nu ghotilo lasenihi mana, naugna mana au balumi ghotilo, eghuteuna mana ginauna theome tei koko ghami ghotilo.

Efesus 2:18

Eghume gognaro na tahati hui, mae Jiu ba mae te theome Jiu tangomana te mei ke ulugna God Kmada ka nogna nolaghi kaisei Tharunga te Blahi.

Letas Teke Riso Tei Mae Pol Ka Khiloau Rom 8:15

Tharunga te Blahi teke tusu ari God ka ghotilo igne theome mala haru famaku ghami ka namhaghu jateula teke au ghotilo ka namhaghu tifa ia eghu. Theo. Nu mana togho ghami mala thugna God. Eghuteuna ka nogna nolaghi Tharunga te Blahi na tahati tangomana te cheke eghu ka God, “Mama, Mama.”

Nodi Khoje Hatimare Mae Jiu 6:9

God na fanomho ka iara kate kiloni iara mana na. Mana ginauna na nomhidiu nogu tharai iara re mala mei togho ghau iara.

Hibru 4:15

Noda mae pris biꞌo na lase ghita te nigra na. Ka teke au ka nauthoglu gne, mana neke thoke nila fariuriu ka nafnata puhi te kmana jateula tahati neku, nu mana neke theome eni kaisei najafra eghu.

Jemes 4:3

Nu kate tore ghotilo ka God na, mana na theome tusu ari ka ghotilo. Naugna gaoghathogna te tore ghotilo na thono jafra fara. Ghotilo khogla toreni kolho glepo te mala eni ghotilo puhi te diꞌa te magnahagheni themi na.

Letas Teke Riso Tei Mae Pol Ka Khiloau Rom 15:1

Te keli na tahati mala heta ka noda fatutuani na mala toghodi iheire te theome lase fakelini unha lepo God te snakredi mare te mala eni na. Tahati mala toghodi ka unha te nanga nodini mare na, eghuteuna tahati theome mala eni kolho unha te magnahagheni theda na.

Luku 22:44

Mae Jisas ne tarai faheta fara naugna mana ne diꞌanagnafa fara. Eghuteuna buibuhigna mana re ne jateu dadara neu, ne khoko soru ka glose na.

Profet Sekaraea 12:10

Lord ne cheke eghu, “Iara ginauna edi tharaknagna Devet nei naiknodi Jerusalem mala thofno au gaoghatho te keli, eigna mare tangomana te kokhoni ni keha mae na, eghuteuna mare tangomana te tarai ka iara mala toghodi. Mare ginauna filo mei ka iara, mae ihei mare teke fadini. Eghuteuna mare ginauna diꞌanagnafa nei tanhi eghu ka mana, jateula mae te au kaisei thugna kolho te lehe ra eghu, ba mae te lehe thugna teke kulu karha na.

Fapea Korin 5:4

Nu tahati au ngau ka thinida ka nauthoglu igne eghuteuna thini igre tahu nei hongo ghitani eghu, nu tahati theome magnahaghei te koko thini igre. Theo. Tahati magnahagheni ngala thinigna kligna na te mei toku tafru ghita, eghuteuna thini te lehe igre ginauna thafru kau karha.

Nodi Khoje Hatimare Mae Jiu 10:17

God, iagho ginauna na fanomho ka nou naikno tela goigonidi mare igre, iagho ginauna fameomegodi mala ke keli nagnafa fapulo mare.

Fapea Korin 5:2

Gognaro na tahati thono hongo ghitani fara thinida igre. Tahati magnahagheni fara te au ka thini majaghani gna kligna.

Matiu 20:22

Mana ne cheke eghu ka retilo, “Ghotilo theome laseni unha te toreni ka iara na. Ba tangomana ngau si ghopa te au papara ka nafnata nate au papara iara gnea?” Phiamare ne cheke eghu ka mana, “Uve, ghepa tangomana.”

Nodi Khoje Hatimare Mae Jiu 102:5

Iara tanhi nogu fara, naugna iara gne au papara fara. Eghume, thinigu iara ngala nhubragna kolho gognaro na.

Nodi Khoje Hatimare Mae Jiu 6:3

Lord, thosei ofo me raugha, mei togho ghau. Eigna nakarhagu iara gne la thono diꞌa fara gognaro na!

Hibru 5:2

Mae pris biꞌo na mala kokhonidi nei toghodi eghu iheire te loku jafra naugna mare theome laseni unha te eni fadiꞌa na. Mana eni igne naugna mana thegna na jaola nigra ke ulugna God.

Letas Teke Riso Tei Mae Pol Ka Khiloau Rom 7:24

Tutuani fara, iara gne theome gleale'a ka nagnafagu na, naugna iara gognaro na thono diꞌa fara! Ihei nate togho ghau iara te mala snagla iara ka puhi te diꞌa te au ka thinigu iara te batu ghau ka glehe gne?

Nodi Khoje Hatimare Mae Jiu 69:3

God, iara tore nigho koba mala togho ghau iara, la ghilei babaꞌo nogu fara, la ghilei khaprani thotomnogu gne. Iara filo ari ka iagho te mala togho ghau na, la ghilei kabru tathagure.

Nodi Khoje Hatimare Mae Jiu 102:20

Mana neke nomhidi noda tharai re kate au tahati kau sosolo na, nei atha fajifla ghita kate chekeni mare ka fate na, tahati mala au ka glehe.”

Thoutonu Eigna Mae Job 37:19

“Iagho farirhiu ghami ghehati unha nate chekeni ghehati eimu iagho ka God na. Ghehati theome laseni nou puhi iagho na naugna ghehati thono romno fara phaꞌumi re.

Lamentations 3:56

“Lord! Fanomho mei ka iara, thosei fofotho khulimu na kate tanhi ari iara ka iagho na!”