Letas Teke Riso Tei Mae Pol Ka Khiloau Rom 12:7 - Buka Blahi Ka Cheke Holo

⁷ Jame te hata tahati u khokofakasai te mala toghodi naiknore, tahati mala toghodi naiknore. Jame te hata tahati u khokofakasai te mala farirhiu na, tahati mala farirhiu.

Letas Teke Riso Tei Mae Pol Ka Khiloau Rom 12:7 ပူးပေါင်းရင်းမြစ်များ

Efesus 4:11

Eghuteuna Jisas mae ihei teke tusu mei ka tahati u khokofakasai te mala loku ranghini God. Mana neke vavahi keha mae mala khuru, keha mae mala profet, keha mae mala toutonu eigna Nonomho te Keli, keha mae mala velepuhi nei reireghini nogna khiloau na.

Fapea Timoti 4:2

mala toutonuni koba chekegna God na. Tarabana leghu fata mala eni igne, neuba naiknore ne tirodi fanomho ka iagho. Iagho toghodi naiknore mala filo glani mare unha te jafra ka nakarhadire. Eghuteuna iagho fadodoglo puhidi naiknore ka unha te jafra ba toghodi mala nheta nodi fatutuani na. Eghuteuna kate farirhiudire, iagho mala taegodi nei farirhiu fakelidi eghu.

Ululahu Timoti 5:17

Mae biꞌo te baubatu fakeli ka khiloau nei tulao iheire te loku heta kate toutonuni nei farirhiuni teu chekegna God na naba te hata taba na.

Mae Khuru 13:1

Igre mae profet nei mae velepuhi eghu te au ka khiloau Antiok re: mae Banabas; nei mae Simion mae te kiloni mae Pipito; nei mae Lusias mae gna Saerini; nei mae Manaen mae ihei teke biꞌo haghe balugna mae funei Herod Antipas; nei mae Sol.

Fapea Timoti 2:24

Te laseni tahati na, nogna mae gloku Lord na theome mala magra, nu mana mala keli ranghidi naikno te gnafare. Mana kaisei mae mala farirhiu, eghuteuna theome mala ghosei diꞌatagna.

Fapea Timoti 2:2

Iagho ke toutonu ranghidi mae iheire te rouronudi iagho ra eigna u farirhiu te nomhidi iagho igre teke edi iara ka naikno te kmanare. Eghuteuna mae igre ginauna jaola tangomana te mala farirhiudi keha naiknore.

Ululahu Timoti 4:16

Iagho reireghi fakelini nakarhamu themu na baludi farirhiu te edi iagho ra mala doglo fabrahu. Jame te eni iagho igne na, iagho ginauna fakarhi nigho themu baludi naikno te nomhi nigho are.

Ululahu Timoti 3:2

Eghume mae ihei te mala baubatu ka khiloau na mana mala kaisei mae doglo fara, eghuteuna theo kaisei naikno te filoni kaisei najafra ka mana na. Mana mala tolaghi ka kaisei gaꞌase ngala eghuteuna tangomana te mala reireghi fakelini thegna. Mana theome mala ghosei diꞌatagna, nu mana kaisei mae mala au doglo fabrahu. Eghuteuna mana tangomana te mala reireghi fakelidi naikno te posa mei ka sugagna na, eghuteuna mala laseni puhi farirhiu na.

Ululahu Timoti 2:7

Naugna igne God neke vahi ghau iara mala loku jateu kaisei mae khuru mala toutonuni u Nonomho te Keli na ranghidi iheire te theome Jiu mala fatutuani nei laseni cheke te tutuani na. Iara cheke kate tutuani, theome chaichaghi!

Kolose 4:17

Eghuteuna ghotilo cheke ka mae Akipas mala eni fahui nogna gloku blahi teke tusu ranghini Lord na.

Galesia 6:6

Hatimare mae velepuhi te farirhiuni chekegna God na mare nabadi te hata glepo te keli ka iheire te nomhini u farirhiu na.

Ululahu Korin 12:28

God neke lilisei soasopai naikno te mala edi soasopai gna gloku ka khiloau gne. Ulu lahu na, mana neu lilisei hatimare mae khuru, fapea na, hatimare mae profet. Fatilo na, hatimare mae velepuhi. Eghuteuna kehare mala eꞌei kofubobhoi, nei kehare mala fakelidi iheire te fogra, nei kehare mala totogho, nei kehare mala baubatu ka khiloau, nei kehare mala cheke ka keha nafnata cheke.

Mae Khuru 20:28

Eghume filo fakeli ghami themiu, baludi naikno te gnafa teke lisa ari mala reireghidi ghotilo teku mae Tharunga te Blahi are. Ghotilo mala jateula mae greireghi sipu eghu mala reireghi fakelini nogna khiloau God teke fofoli ka glehegna mae Thugna ia.

Mae Khuru 20:20

Ghotilo lasenihi te toutonuni iara ka ghotilo u Nonomho te Keli gne, eghuteuna iara farirhiu ghami ghotilo farihotei glalaba ka namono biꞌo ba ka sugami ghotilo ra. Kate eni gloku igne, iara theome ghatho peapea te chekeni ka ghotilo glepo te mala togho ghami ghotilo na.

Mae Khuru 6:1

Kau narane tuare kmana kmana naikno ne fatutuani ni mae Jisas. Eghuteuna naikno khiloau te lase cheke Griki re ne theome gleꞌani nafnata thufa sileni te eni naikno khiloau te au Jerusalem re ne cheke eghu, “Goro gaꞌase te lehe khetodire igre ne theo thufadi ka sileni te tufa ghotilo leghu narane ra.”

Jone 3:2

Kaisei bongi mana neke mei ka mae Jisas, ne cheke eghu ka mana, “Velepuhi, ghehati lase nigho iagho kaisei mae velepuhi biꞌo neke mei funu ka God. Naugna jame te theome togho nigho God na, iagho jame theome tangomana te edi kofubobhoi igre.”

Matiu 28:19

Eghume, ghotilo tei mala farirhiudi naikno ka namono te gnafa ka nauthoglu igne mala nogu mae fanomho iara. Faꞌapublahidi ka nanghagna Mama nei Thugna nei Tharunga te Blahi.

Profet Isaia 21:8

Aonu mae greireghi igne ne eha eghu fabiꞌo, “Mae funei! Leuleghu narane nei leuleghu bongi teuna, iara kegra fabrahu ka suga mala toetoedi mae naokare.

Eklesiasti 12:9

Mae velepuhi te lalase igne neke farirhiudi naiknore unha te lasedi manare. Mana hirodi nei faghiladi neku cheke te ninhigrana igre glahula tutuani ba theo.

Nodi Khoje Hatimare Mae Jiu 51:13

Eghuteuna iara ginauna farirhiu chekemu iagho na ka naikno te diꞌa puhidi gre mala ke pulo mei ka iagho.

Nodi Khoje Hatimare Mae Jiu 34:11

Ghotilo kheragu mae majaghani iara ra, ghotilo mei mala fanomho ka iara. Iara ginauna na farirhiu ghami ghotilo mala ghatho tahuni Lord.

Ululahu Samuel 12:23

Eghuteuna te iara na, iara ginauna tarai fabrahu ghami ghotilo. Jame te theome eni iara igne na, iara khibo ranghini Lord. Leuleghu fata na, iara ginauna farirhiu ghami ghotilo ka puhi te keli nei doglo eghu.

Diutronomi 33:10

Ghotilo vikegna Livae ra tangomana te farirhiudi vikegna mae Jekop igre ka nogna vetula Lord. Ghotilo tangomana te toghodi naiknodi Israel igre te iuꞌijudi nogna vetula manare. Ghotilo gahu insens mala cheke fakelini Lord, ghotilo tangomana te gahu fafara ka nogna olta mana na.

Ululahu Korin 12:5

Jare na soasopai nafnata gloku ranghini God, nu kaisei Lord ngala te loku ranghini tahati na eghu.

Ululahu Korin 14:26

Kheraguro, igne unha te ghathoni iara na. Kate khapru ghotilo te mala tarai na, ghotilo te gnafa na mala kafe totogho. Kaisei naikno mala koje, eghuteuna keha na mala farirhiu, eghuteuna keha na mala chekeni unha teke falalase God tagna na, eghuteuna keha na mala chekeni chekegna God ka soasopai nafnata chekei, eghuteuna keha na mala rurutha gaoghathogna cheke tuana. Gloku te gnafa igre mala toghoni nodi fatutuani naikno te gnafare.