Letas Teke Riso Tei Mae Pol Ka Khiloau Rom 11:25 - Buka Blahi Ka Cheke Holo

²⁵ Uve kheraguro, iara magnahaghe ghami te thofno laseni glepo biꞌo te poru igne, eigna glepo te poru igne ginauna togho ghami mala thosei fahaehaghe ghotilo. God ne fapatugamadi nagnafadi mae Jiu gre ghilei thokeni narane te mala ke pulo mei ka God hatimare mae iheire te theome Jiu teke vavahi mana gre.

Letas Teke Riso Tei Mae Pol Ka Khiloau Rom 11:25 ပူးပေါင်းရင်းမြစ်များ

Luku 21:24

Kehare ginauna ghoreho ka naflahi, eghuteuna kehare ginauna hata tei mala sosolo ka keha namono delei. Naikno te theome Jiu igre ginauna mei goigoni ghami nei funei frunini namono Jerusalem ghilei thoke mei nodi narane leghu lahu na.”

Letas Teke Riso Tei Mae Pol Ka Khiloau Rom 12:16

Ghotilo mala au fodu ka pharikeli. Thosei fahaehaghe, nu fofodu ka iheire te au faparidi thedi. Eghuteuna thosei ne lalase farahi themi eghu.

Thakle 7:9

Ke leghugna igne, iara ne filodi kmana naikno fara, te theome tangomana kaisei naikno te kahadire. Naikno igre mei funudi ka tharakna te gnafa nei ka vike te gnafa nei ka namono te gnafa nei ka cheke te gnafa teu ka nauthoglu igne. Mare ne kafe kegra ke ulugna nogna sape nafnakno mae King na nei ke ulugna Lam. Mare pipichi pohe vegha nei louloku grege thubo ka khamedire mala kilo fnaknoni God.

Efesus 3:9

Eghuteuna mana vahi ghau iara mala toghodi naikno te gnafa gre mala filo glanini nagnafagna God eigna nogna gaoghatho poru igne. Tifa na, God mae ihei teke vuavuhadi nauthoglu ghe maloa gre neke theome snakredi naiknore mala laseni unha te ghathoni mana na.

Nodi Khoje Hatimare Mae Jiu 22:27

Naikno te gnafa nei kokholo te gnafa teu kau nauthoglu igne ginauna nake pulo mei ka iagho mala tufru soru nigho.

Thakle 11:15

Aonu fafitu engel na ne ifu nogna khufli na. Eghuteuna iara ne nomhidi cheke te mei funu kligna re, ne eha eghu fabiꞌo, “Nolaghi te mala funei frunidi naiknogna nauthoglu gne gognaro nogna noda Lord nei nogna Kraes. Mana ginauna funei frunidi fabrahu tifa tifa.”

Fapea Pita 3:8

Uve kheraguro, kaisei glepo ngala te mala ghatho tahuni ghotilo na. Ka gaoghathogna noda Lord na, kaisei narane na jateula kaisei thogha finogha eghu, eghuteuna kaisei thogha finogha na jateula kaisei narane eghu ka gaoghathogna Lord na.

Ululahu Korin 10:1

Kheraguro, iara magnahaghe ghami ghotilo te kulu ghathodi kuꞌeda teke leghuni mae Moses tifa ka namono nagou ia. Kaisei khoveo neke batudi neke kasa ka thongna te kiloni “Thongna Ukru”.

Letas Teke Riso Tei Mae Pol Ka Khiloau Rom 1:13

Uve kheraguro, funu tifa te mei posa gognaro gne iara magnahaghe ghami ghotilo te laseni kmana fata iara au gaoghathogu fara te mala ari posa ka ghotilo na, nu keha glepo te fanogra ghau koba iara. Iara magnahaghei te mei mala toghodi kmana naikno jare ke lamnami ghotilo te leghuni mae Jisas jateula teke edi iara ke lamnadi keha naikno te theome mae Jiu.

Profet Hosia 14:9

Ihei te lalase na, naikno tuana ginauna lase fakelidi cheke te edi iara ka buka na igre, nei tathaji fakeli ka nagnafagna na. Eigna puhigna Lord na thofno doglo fara. Eghuteuna ihei te doglo na mala leghuni puhigna mana na. Nu ihei te diꞌa na theome tangomana te leghuni puhigna God na, naugna naikno igne theome ghatho tahuni puhi te doglo na.

Profet Isaia 5:21

Kokhoni ghami fara ghotilo iheire te ne lalase fara themi ne salaꞌudi keha naiknore teu gaoghathomi re igre!

Nodi Khoje Hatimare Mae Jiu 72:17

Te keli na jame mare theome ghatho ihoni nanghagna mae king na, uve, nanghagna mana te fnakno na mala au fabrahu, jateula naprai te au fabrahu ka maloa na ana eghu. Eghuteuna naikno te gnafa ka nauthoglu igne ginauna tore nigho iagho mala fablahidi jateula iagho teke fablahini mae king ia eghu. Naikno ginauna ghatho tahuni mana.

Ululahu Korin 12:1

Gognaro na kheraguro, iara magnahaghe ghami ghotilo te lase fakelini eigna nogna khokofakasai Tharunga te Blahi nate tusu mei God ka nogna naiknore.

Proveb 26:16

Gaoghathogna mae te thodo na, nogna glalase na ne uludi fitu mae te cheke tughudi thua nafnata faghusna ra eghu.

Proveb 26:12

Jame kaisei mae chekeni ne lalase fara eghu, tahati ninhigrana ranghi ghita te toghoni mana te mala lasedi gobigna lepore. Nu jame kaisei mae fameomekro magnahaghei lalase, tahati tangomana te toghoni mana te mala lasedi gobigna lepore.

Nodi Khoje Hatimare Mae Jiu 127:1

Jame te theome totogho Lord ka ihei te loku ka suga na, gloku te eni mana igne theo nafugna kolho. Eghuteuna jame te theome reireghi fakeli Lord balugna mae ihei te reireghi gna nogna namono na glahula mei ruma naokare ka nogna namono na teuna, reireghi te eni mana igne theo nafugna kolho.

Nodi Khoje Hatimare Mae Jiu 107:43

Ihei te au tagna glalase te keli na, ginauna ghathodi glepo igre. Mana ginauna ghathoni fabrahu eigna nogna namha biꞌo Lord ranghi ghita tahati na.

Matiu 13:11

Mae Jisas ne cheke eghu ka mare, “Te eni iara igne, naugna God neke tusu ari kolho ka ghotilo glalase te mala lase fakelidi thofno glepo te au poru ka nakarha God te funei frunini. Nu iara cheke ranghidi keha naiknore ka cheke naba kolho.

Jone 10:16

Aonu, keha nogu sipure au ngau ke kosi bara. Iara ginauna na atha mei dila ke lamna bara. Reꞌe ginauna nomhini naoglagu iara na, eghuteuna reꞌe ginauna kaisei bukredi ngala nei iara ngala te mala reireghidire eghu.

Letas Teke Riso Tei Mae Pol Ka Khiloau Rom 9:18

Eghume te laseni tahati na, kate magnahaghei kokhonini God ihei na, God ginauna kokhonini mana, eghuteuna kate magnahaghei fameglini God ihei na, God ginauna jaola fameglini mana.

Letas Teke Riso Tei Mae Pol Ka Khiloau Rom 11:12

Tutuani, ka nodi najafra mae Jiu gre God tusu mei kmana glepo te keli ka nauthoglu gne. Eghuteuna unha teke luvu ka mae Jiu gre God neke hata mei fablahi te keli ka iheire te theome Jiu. Eghume, kate pulo mei ka God te gnafa naiknodi Israel re, kmana glepo te keli fara tulao ginauna mei thoke ka tahati!

Letas Teke Riso Tei Mae Pol Ka Khiloau Rom 11:24

God la salo fodu ghamihi ka thofno gaju oliv igne, neuba ghotilo ne jifla mei ka gaju oliv nathua kolho. Tutuani, ninhigrana fara grege gaju nathua na te salo fodu balugna thofno grege gaju na. Nu thofno bligi fara God te salo fodu fapulodi hatimare mae Jiu gre ka thofno gaju oliv, naugna mare jateula gregegna tutuani eghu thofno gaju oliv na.

Ululahu Korin 2:7

Cheke glalase te toutonuni ghehati igne nogna cheke glalase God. Tutuani, kani teke theome vuavuha teku God u nauthoglu igne, mana neke kulu enihi kaisei nabrou ka nogna glalase te mala tei thoke tahati ka mana kligna na. Mana neke theome falalase cheke igne ghilei thoke gognaro.

Ululahu Korin 4:1

Ghotilo mala ghatho ghami ghehati jateula nogna mae gloku Kraes eghu, eigna God vahi ghami ghehati mala toutonuni nogna cheke God teke poru tifa igne.

Efesus 1:9

Mana neke enihi unha teke ghathoni thegna na. Uve, mana neke falalase ka tahati gaoghatho teke poru teku igne, eigna mana neke kulu ghathoni igne tifa mala kaputu ka mae Jisas Kraes.

Efesus 4:18

Tutuani mare theome laseni kaisei glepo nogna God naugna nagnafadire ne patugama fara. Eghume mare au khaba ka thofno nakarha te tutuani teke tusu mei God igne.

Thakle 1:20

Iagho filodi fitu nathunu te louloku iara fei khame nhetagu gre, nu iagho theome laseni gaoghathodi fitu nathunu igre. Uve, fitu nathunu igre gaoghathogna na hatimare mae engel ka fitu khiloau gre. Eghuteuna iagho jaola filodi fitu juta teke hohoro ka gol. Fitu juta igre gaoghathogna na eidi fitu khiloau tuare kolho.”