Letas Teke Riso Tei Mae Pol Ka Khiloau Rom 1:25 - Buka Blahi Ka Cheke Holo

²⁵ Mare tirodi fatutuani ni chekegna God te tutuani na, eghuteuna mare fatutuanidi kolho thoutonu te chaichaghire. Jaola, mare tufru sorudi nei loku ranghidi eghu glepo teke vuavuha God re. Nu mare ghatho ihoni te tufru soruni nei loku ranghini teu God mae ihei teke vuavuhadi gobigna lepo igre. God mae ihei naiknore naba te cheke fakelini tifa te tifa. Amen.

Letas Teke Riso Tei Mae Pol Ka Khiloau Rom 1:25 ပူးပေါင်းရင်းမြစ်များ

Profet Habaku 2:18

Theo kaisei glepo te keli nate togho ghami ghotilo ka mumuju god te tarai ghotilo tadi teke sari kolho ka gaju ba thina igre. Thono theo fara. Mumuju igre chaichaghi ghami ghotilo. Ihei te sari mumuju igre, mana fatutuanidi kolho glepo teke sari thegna re. Nu mumuju igre theome tangomana te cheke na!

Profet Jeremaea 13:25

Igne puhi biꞌo nate kuru meini iara te mala thoke ghami ghotilo na. Papara igne thofno horoghoto fara, naugna ghotilo ne ghatho iho ghau iara ne fatutuanidi god te chaichaghire.

Profet Isaia 44:20

Nu neuba, mae igne theome laseni unha te eni na. Eghuteuna gaoghatho te jafra na batu fadiꞌani mana. Mana jateula mae te ghamu nakrofu ra eghu kolho. Mana theome tangomana te fakarhini thegna na, ba te cheke eghu na, “Mumuju te hata iara igne theome god tutuani, kaisei vido gaju kolho!”

Profet Emos 2:4

Lord ne cheke eghu, “Kmana fata naiknogna kantri Juda tapla jafra ka nakhibo. Mare theome gnafa katha vido ikoi ka puhi igne. Thono theo fara. Mare tirodi fanomho ka nogu cheke iara na, eghuteuna mare jaola huhughuni nogu vetula iara na. Naikno igre thofno fagoigoli fara la theome leghu ghau iara. Mare leghuni mumuju god jateula teke edi mae kuꞌedi tifa ra eghu. Eghume, te chekeni iara na, iara ginauna roꞌeni Juda.

Fapea Korin 11:31

God nei Kmagna noda Lord Jisas Kraes laseni te theome chaichaghi iara na. Tahati cheke fakelini nanghagna mana na tifa tifa!

Letas Teke Riso Tei Mae Pol Ka Khiloau Rom 9:5

Mare neke jifla mei ka vikedi goro mae biꞌo Jiu te ulu tifa ra, eghuteuna Kraes na jaola neke karha mei naikno ka vikedi mare. Eghuteuna mana ngala mae funei biꞌo ke klignadi naikno te gnafare, mae ihei tahati te mala kilo fnaknoni tifa tifa. Amen.

Ululahu Jone 5:20

Eghuteuna tahati lasenihi Thugna God ne mei tusu ranghi ghita glalase mala laseni tahati thofno God. Eghuteuna tahati au balugna mae ihei te tutuani, tulao balugna mae Jisas Kraes. Mana thofno God nei mae ihei te tusu ranghi ghita u karha fei tifa na.

Letas Teke Riso Tei Mae Pol Ka Khiloau Rom 1:23

Mare la lilisei fadeleihi puhi te mala ghatho tahuni God mae ihei te karha te tifa na. Eghuteuna mare hohoro mumuju jateula naikno, ba nanghaji ba mogo ba keha nafnata glepo te tautagu te au mata. Igre glepo te thufru sorudi mare re!

Fapea Timoti 3:4

Ka narane tuare, naiknore ginauna majoradi kheradi thedire. Mare ginauna loku balu fagoigoli nei fahaehaghe fara. Mare ginauna magnahaghei eni kolho unha te keli tadini thedi na, nu mare theome tangomana te namhani God.

Letas Teke Riso Tei Mae Pol Ka Khiloau Rom 1:18

Diꞌatagna God na thakle mei kligna. Mana ginauna fatedi naiknore eidi nakhibo te gnafa nei nafnata glepo te jafra te gnafa eghu te edi mare re. Naugna nafnata puhi te edi mare igre fanograni chekegna God te tutuani na.

Matiu 6:24

“Theo kaisei naikno te loku ranghidi phei mae funei na. Mana ginauna magnahagheni kaisei mae funei kolho nei tirognani keha na. Mana ginauna na ghatho tahuni kaisei mae funei kolho nei na theome ghatho tahuni keha na. Eghume iagho theome tangomana te loku ranghidi God ghe dedei gna nauthoglu igne jateula phei nou funei teuna.”

Ululahu Tesalonika 1:9

Eigna naikno te gnafa re chekeni koba unha teke eni ghotilo ranghi ghami ka teke ari sigho ghami jarea. Eghuteuna te chekeni mare na ghotilo figri tagruni mumuju god na neke pogho soruni nei loku ranghini thofno God te karha nei tutuani.

Ululahu Timoti 1:17

Nafnakno nei siasigla ranghini mae King te funei fabrahu tifa tifa! Mana theome tangomana te lehe eghuteuna tahati theome tangomana te filoni mana, eghuteuna kaisei mana ngala God na. Tahati ginauna na ghatho tahuni nei cheke fakelini nanghagna mana na tifa tifa. Amen.

Ululahu Timoti 1:11

Tuana farirhiu leghuni u Nonomho te Keli God teke tusu mei ka iara mala toutonu iara. Nonomho te Keli igne siasigla balu nolaghi biꞌo neke mei funu ka God mae ihei te blahi fara.

Matiu 10:37

“Ihei te namhadi fara kmagna ba idogna ba thugna nalhaꞌu ba thugna gaꞌase ke tulaogu iarai na, mana theome nabagna te nogu mae fanomho iara na.

Profet Jeremaea 16:19

Lord, iagho jateula nogu vido te keli mala poru eghu iara. Kate thoke mei hoholo biꞌo ka iara na, iagho reireghi ghau nei tusu ranghi ghau nolaghi. Naikno ka vido te gnafa ka nauthoglu igne ginauna mei cheke eghu ka iagho, “Kuꞌemi ghehati tifa ra neke pogho soru kolho ka tharumaꞌei mumuju te theome toghodi mare.

Efesus 3:21

Tahati nogna khiloau mana eigna tahati kaisei balugna mae Jisas Kraes, tahati ginauna kilo fnaknoni God fabrahu tifa tifa. Amen.

Nodi Khoje Hatimare Mae Jiu 72:19

Cheke fakelini nanghagna te fnakno tifa tifa. Nafnaknogna nogna nolaghi biꞌo God na mala tei posa ka namono te gnafa ka nauthoglu igne. Amen! Amen!

Jone 2:8

Aonu mana ne cheke eghu ka mae glokure, “Ghotilo totoho fakasa katha khoꞌu mala atha tei ka mae biꞌo te areꞌare gna gaghamu gne.” Mare leghui chekegna mae Jisas igne ne atha ne tei katha khoꞌu teke vuhai waen na ka mae biꞌo na.