Nodi Khoje Hatimare Mae Jiu 92:2 - Buka Blahi Ka Cheke Holo

^2-3 Thofno keli fara iara te koje fafnakno nigho ka soasopai nafnata gita na mala thofno cheke fajifladi puhimu iagho te keli fara re. Leuleghu hamerane na, thofno keli fara te mala cheke fajiflani iara eigna te biꞌo fara iagho nou namha na. Eghuteuna leuleghu grafi na, thofno keli fara te mala cheke fajiflani iara eigna iagho te tajidi nou nhaꞌa chekera.

Nodi Khoje Hatimare Mae Jiu 92:2 ပူးပေါင်းရင်းမြစ်များ

Jone 1:17

God neke tusu lao vetula na ka mae Moses. Nu khokofakasai ghe tutuani re neke mei balugna mae Jisas Kraes.

Profet Isaia 63:7

Iara ginauna toutonuni puhigna Lord te ghatho tahu ghita fabrahu nogna naiknore. Iara ginauna cheke fakelini mana eidi glepo te keli teke edi mana ra. Mana fakakhana te kokhoni ghita tahati naiknoda Israel, mana jaola fakakhana nogna namha te theo ka huigna.

Nodi Khoje Hatimare Mae Jiu 42:8

God iagho ngala te funei frunini nakarhagu iara gne. Iara gne ofoniu kolho glehe na. Iara laseni ka kaisei narane teuna iagho falalase nou namha biꞌo na ka iara. Eghuteuna leuleghu bongi na iara koje balu tharai ka iagho.

Mae Khuru 16:25

Farihotei bongiro, mae Pol ghe mae Silas ne tarai balu koje kilo fnaknoni God. Keha mae te sosolo re ne fanomho ka phiamare.

Nodi Khoje Hatimare Mae Jiu 71:15

Iara ginauna cheke edi glepo te doglo teke edi iagho ra, funu hamerane ghilei posa fei grafi. Iara ginauna cheke eigna nou nolaghi iagho te mala fakarhidi naiknore. Neubane theome raꞌe lase fakelidi iara, iara ginauna cheke fajifladi ngala.

Nodi Khoje Hatimare Mae Jiu 145:2

Leuleghu narane na iara ginauna cheke fakeli nigho iagho. Uve, iara ginauna cheke fakeli nigho koba leuleghu fata.

Thoutonu Eigna Mae Job 35:10

“Nu mare theome kilo tei kolho ka God mae ihei teke vuavuhadi mare na. Eghuteuna ka gromno na mare theome eha tei ka God mae ihei teke tusu lao khoje ka mare.

Nodi Khoje Hatimare Mae Jiu 77:2

Kate thoke ghau puhi na iara tarai ka noda Lord. Funu grafi posa hamerane, iara ngafa haghe fabrahu khamegure ka tharai. Neuba, gaoghatho gu iara na theome nheta kolho.

Ululahu Kronikols 25:1

King Devet baludi nodi lida hatimare mae Livaet, mare ne vahini tharaknagna mae Asaf, nei tharaknagna mae Heman nei tharaknagna mae Jedutun mala baubatu ka khoje. Mare neke cheke fakelini God ka gragi nei koje, nei ka belo nei ka thua nafnata gita. Nanghadire igre:

Nodi Khoje Hatimare Mae Jiu 9:3

Kate filo ari nigho na, nogu naoka iara gre ne kafe rikha, eghuteuna mare ne kafe khoko soru pari ne lehe.

Nodi Khoje Hatimare Mae Jiu 101:1

Lord God, iara ginauna kojeni kaisei khoje eigna puhi te magnahaghei tathaji iara nogu nhaꞌa chekere ka iagho.

Nodi Khoje Hatimare Mae Jiu 147:1

Tahati cheke fakelini Lord! Thofno keli fara tahati te cheke fakelini noda God. Uve, nabada fara tahati te cheke fakelini mana na, naugna puhigna mana na keli fara.