Nodi Khoje Hatimare Mae Jiu 50:21 - Buka Blahi Ka Cheke Holo

²¹ Ghotilo neke edi gobigna lepo igre, eghuteuna iara neke theome cheke ka ghotilo neku. Aonu gaoghathomi ghotilo na iara gne jateula ghotilo eghu kolho. Nu thono theo fara eghu. Iara gognaro na diꞌatagu fara ka ghotilo, eghuteuna iara na falalase ari ke ulumi ghotilo unha teke eni fadi ghotilo na eghu!

Nodi Khoje Hatimare Mae Jiu 50:21 ပူးပေါင်းရင်းမြစ်များ

Profet Isaia 57:11

“Ghotilo chaghi ghau iara fabrahu, naugna ghotilo mhaghudi fara god te chaichaghi igre. Naugna igne, ghotilo la ghatho iho ghauhi iara. Ba, ne au kmu fabrahu iara neu ne theome ghatho tahu ghau iara si ghotilo ia?

Proveb 29:1

Mae ihei te patugama fabrahu neuba mare ne cheke faheta kmana fata tagna, mae tuana ginauna parani fara, eghuteuna theo kaisei glepo nate toghoni mana na.

Nodi Khoje Hatimare Mae Jiu 90:8

Iagho filodi kolho nakhibomi ghehati re. Uve, neubane fariuriu pophoru ghehati nakhibomire, iagho filodi kolho.

Ululahu Korin 4:5

Eghume thosei fate naikno nu ofou ghilei thoke mei Lord. Mana ginauna hata fajifla kate phae glepo te diꞌa fara te poru teu kate romno na, eghuteuna mana ginauna fakakhana glepo teke poru ka nagnafadi naiknore. God ginauna jaola fafnaknodi gnafa naikno te leghuni nodi puhi te kelire.

Profet Isaia 42:14

Lord ne cheke eghu, “Raugha fara, iara te au kmu kolho na, eghuteuna iara neke theome toghodi nogu naiknore. Nu gognarona la thoke mei narane nate eni iara unha teke ghathoni iara na. Uve, iara ginauna eha fabiꞌo, jateula gaꞌase te kabru ghegna fara kate karha thugna ra eghu.

Eklesiasti 12:14

Neuba tahati ne eni unha glepo te keli ba unha glepo te diꞌa na, God ginauna fatedi gobigna glepo te gnafa gre baludi glepo te poru teu.

Nodi Khoje Hatimare Mae Jiu 50:3

Noda God na la meihi, nu mana na theome au kmu. Khaꞌaghi te mala nhako gobigna lepore na mei ke ulugna mana, eghuteuna nuri blahi balu nakhete na au faligohoni mana.

Profet Emos 8:7

Ghotilo naiknomi Israel! Lord, nodi God mae Israel, mana la nhaꞌa chekehi ka nogna nafnakno biꞌo thegna ne cheke eghu, “Iara ginauna na theome ghatho ihodi glepo te diꞌa teke edi ghotilo ra.

Nodi Khoje Hatimare Mae Jiu 73:11

Naikno te diꞌare ne cheke eghu, “God na theome tangomana te lasedi glepo te edi ghehati gre. God na au kligna fara, mana theo kaisei nabrou te mala mei te hirodi puhimi ghehatire.”

Thakle 3:19

Naikno te namhadi fara iara gre, iara tangomana te cheke faheta ranghidi mala lilisei nodi puhi te diꞌare, nei jaola tangomana te farirhiudi mala leghuni nabrou te doglo na. Eghume, ghotilo mala hati nhetami na mala koko puhi te diꞌare.

Profet Isaia 26:10

Neuba iagho ne namhadi naikno te diꞌa igre, mare ginauna na theome laseni kolho puhimu iagho te doglo na. Eghuteuna neuba mare ne au farihoteidi naikno te doglo igre, mare ginauna leghudi fabrahu kolho puhi te diꞌare, eghuteuna mare theome tangomana te filo glani nigho iagho King te haghe fara na.

Fapea Pita 3:9

Keha naiknore ka gaoghathodire ne cheke eghu agne, “Tore, noda Lord gne theome leghuni kolho nogna nhaꞌa cheke na!” Nu Lord na theome jateula tuana eghu, naugna mana theome magnahagheni kaisei naikno te au ka glehe fei tifa na, nu mana magnahaghedi naikno te gnafa te mala tughu nagnafa mala ke figri mei ka mana. Eghume mana sasaꞌa te ofo ghami teu ghotilo na.

Naba 23:19

God na theome jateula naikno te lase chaghi ra eghu. Mana theome jateula tahati te lase tughu gaoghatho ra eghu. Unha glepo te nhaꞌa chekedi mana re, mana ginauna edi. Eghuteuna unha te chekedi mana re, ginauna thoke mei tutuani.

Eksodas 3:14

God ne cheke eghu ka Moses, “Nanghagu iara na, ‘IARA IHEI TE AU FABRAHU. Iagho tei cheke eghu ka naiknodi Israel ra: God, mae ihei te kuru mei ghau iara ka ghotilo igne, nanghagna IARA.’ ”

Nodi Khoje Hatimare Mae Jiu 50:8

Iara theome diꞌatagu ka ghotilo eidi fafara teke edi ghotilo ra. Theo. Kate filo ghami iara te gahu koba ghotilo ka khaꞌaghi nomi fafara ra tuare keliu kolho.

Thoutonu Eigna Mae Job 34:33

Job, jau iagho magnahagheni God te mala ke tughu puhimu iagho na leghuni gaoghathomu iagho na, naugna iagho ne tirouni unha te eni God na. “Iara theome tangomana te chekedi nakhibomu iagho re ka God, iagho themu te mala vahini puhi te mala leghuni. Eghume, iagho cheke meini gaoghathomu iagho na ka iara.

Profet Jeremaea 2:23

Lord ne cheke eghu, “Naugna unha si ghotilo te chekeni koba ne theome tarai ka god Baal teu gnea? Ghaoghatho fakeli si ghotilo eidi glepo te diꞌa te edi ghotilo jare ka gloha Hinom! Ghotilo jateula kamel gaꞌasegna te hiro kamel nalhaꞌugna teu te tei tafri te theome au snoto ra eghu puhimire.