Proveb 29:23 - Buka Blahi Ka Cheke Holo

²³ Naiknore ghatho tahuni mae ihei te nhaꞌa faparini thegna na, mae te fahaehaghe na ginauna mamaja nogna fara.

Proveb 29:23 ပူးပေါင်းရင်းမြစ်များ

Matiu 23:12

Mae ihei te fahaehagheni thegna na, God nake nhaꞌa faparini mana. Mae ihei te nhaꞌa faparini thegna na, God nake nhaꞌa hagheni mana.

Luku 14:11

Eghume, mae ihei te nhaꞌa faꞌuluni thegna na, God ginauna nake nhaꞌa faleghuni mana. Nu mae ihei te nhaꞌa faleghuni thegna na, God ginauna nake nhaꞌa faꞌuluni mana.”

Proveb 11:2

Naikno te pala hagheni nanghagna thegna na, ginauna thokeni mamaja biꞌo. Nu naikno te autagna gaoghatho te keli na nhaꞌa faparini thegna.

Profet Isaia 66:2

Iara thegu teke vuavuhadi maloa ghe nauthoglu igre baludi gobigna lepo te au ke lamnadi. “Nu iara keli tagu fara ka nafnata mae te nhaꞌa faparini thegna igne, ba mae te diꞌa nagnafadi nakhibognare, mana thofno ghatho tahu ghau iara, eghuteuna leghuni nogu cheke iara na.

Ululahu Pita 5:5

Jateula tuana eghu ghotilo mae majaghani ra, nhaꞌa soru ghami themi ke paridi goro mae biꞌo are. Uve, ghotilo huju fapulo ghami themi ka puhi au faleghu mala fari totoghoi. Naugna grioriso te blahi na cheke eghu, “God theome magnahagheni mae ihei te fahaehaghe na, nu tusu lao khokofakasai ranghini ihei te au faleghu.”

Proveb 15:33

Mae te ghatho tahuni Lord na, mana leghuni nabrou te mala hata famane gaoghatho te keli nei glalase. Te theome nhaꞌa fapari nigho iagho themu na, iagho na theome fnakno nanghamu na.

Proveb 16:18

Fahaehaghe na mei ului, puhi biꞌo na mei ke leghu. Patugama na mei ului, uka na mei ke leghu.

Luku 18:14

Mae Jisas ne cheke eghu ka mare, “Te chekeni iara ka ghotilo na. Mae te diꞌa igne kate ke pulo ka suga na, mana ne thono doglo fara ke ulugna God, eghuteuna mae Farasi gne ne theo kolho. Eghume mae ihei te fahaehagheni thegna na, God ginauna nake nhaꞌa faparini mana, nu mae ihei te nhaꞌa faparini thegna na God ginauna nake nhaꞌa fahagheni mana.”

Proveb 18:12

Jame mae te fahaehaghe te pala hagheni nanghagna thegna, ke leghu na ginauna krofu pari. Iagho theome naba te hata nangha biꞌo na jame te theome kulu nhaꞌa fapari nigho themu na.

Matiu 18:4

Eghume mae ihei te nhaꞌa faparini thegna jateula sua igne teuna, mana ngala kaisei mae biꞌo te thofno nabagna te au ke lamnadi nogna naikno God igre.

Profet Isaia 57:15

Lord mae ihei te haghe nei blahi fara, nei karha fabrahu te tifa te tifa igne, mana ne cheke eghu, “Iara au ka vido te haghe nei blahi, nu iara jaola au baludi naikno te nhaꞌa faparidi thedi nei au diꞌanagnafa fara eidi nakhibodi re teu igre, eghuteuna iara tusu lao ranghidi nakarha majaghani.

Diutronomi 8:16

Eghuteuna mana neke tusu mei ka ghotilo ‘manna’ igne mala ghamu boho ghotilo. Nu gano igne, ghotilo baludi kuꞌemi ghotilo tifara neke theome laseni gano igne. Lord neke eni igne mala thoke ghami ghotilo narane te ninhigrana mala fariuriu ghami ghotilo, nei mala gaoghathomi ghotilo na, eghuteuna ke leghu na Lord neke fablahi ghami ghotilo ka kmana nafnata glepo te keli.

Thoutonu Eigna Mae Job 40:12

Iagho mala nhaꞌa faparidi iheire te fahaehaghe. Eghuteuna iagho tapla ke klignadi naikno te diꞌa ka vido aheva te gnokro teu mare tagna na.

Matiu 5:3

“Keli tadi iheire te laseni te fnota ka God na, mare ginauna theome ludeni nakarha te tutuani na. Naugna God ginauna funei frunidi nafnata naikno igre.

Thoutonu Eigna Mae Job 22:29

Iagho laseni, kate khoko pari naikno igre ka nakarhadi re, eghuteuna iagho cheke eghu ka God, ‘Toghodi mare,’ God tangomana nate fakarhidi re.

Mae Khuru 12:23

Eghuteuna mae Herod ne snakredi naiknore mala cheke fakelini thegna kolho nei theome cheke ranghidi mala kilo fnaknoni God. Aonu kaisei engel nogna God ne fafograni mae Herod. Eghuteuna momogo ikodi ne ghamu ka thinigna mana na ne ghilei lehe.

Proveb 16:19

Mae te kuma te nhaꞌa faparini thegna na, thofno keli fara salaꞌuni mae te fahaehagheni thegna ne au nogna kmana glepo teuna.

Proveb 17:19

Mae te magnahaghei fapholai na, mana magnahaghei nakhibo. Mae te magnahaghei cheke fahaehaghe na, mana magnahaghei puhi biꞌo.

Proveb 22:4

Jame te au fapari nigho themu nei ghatho tahuni Lord teuna, iagho ginauna dedei, fnakno nei au ka nakarha te keli.

Profet Obadaea 1:3

Nomi nagnafa fahaehaghe ghotilo eigna nomi nanheta na igne thofno jafra fara. Ghotilo filoni nomi namono biꞌo te au ka thogele te bara te maku ka thina igne ngala te fahaehagheni ghotilo te cheke eghu igne, ‘Theome tangomana kaisei mae te nheta nate mei te roꞌe ghami ghehati na.’