Proveb 23:29 - Buka Blahi Ka Cheke Holo

²⁹ Ihei gne te diꞌanagnafa na? Ihei gne te khale ka puhi biꞌo na? Ihei gne te faripholai na? Ihei gne te magra na? Ihei gne te ghoreho na? Ihei gne te faꞌukru tatha na?

Proveb 23:29 ပူးပေါင်းရင်းမြစ်များ

Efesus 5:18

Thosei koꞌu me dranga ka waen, naugna igne ginauna batu fadiꞌadi puhimi ghotilo re. Nu snakreni mae Tharunga te Blahi na mala fodu ke lamnami mala batu fakeli ghami.

Profet Isaia 5:22

Kokhoni ghami fara ghotilo iheire te lase koꞌu beer fara nei lase ngigno fodu keha nafnata khoꞌu teu are!

Profet Isaia 5:11

Kokhonidi fara iheire te dofra haghe hamerane boibongi te tei hiro waen nei keha nafnata beer te mala koꞌu te ghilei tei posa fari hotei bongiro!

Proveb 23:21

Mae funeidi mae te koꞌu beer nei ghamu biꞌo fara teu are ginauna kuma, eghuteuna pipichi ka pohe te thona.

Profet Nahum 1:10

Mae te eni puhi te diꞌa ranghini Lord gne, jateula mae te koꞌu te salaꞌui te theome tangomana te kegra haghe ra eghu, ba jateula mae te khale ka gnarho te fachuchuru ra eghu. Lord ginauna goigonini mae igne, jateula namhata te nhako ka khaꞌaghira eghu.

Proveb 20:1

Mae te koꞌu kmana beer na ginauna eha tongana, cheke diꞌa nei magra eghu. Mae te snakreni beer na te funei fruni nakarhagna na, gaoghatho te keli na theome au ka mana.

Fapea Samuel 13:28

Mae Absalom ne cheke eghu ka nogna mae glokure, “Kate ghamu teu tahati na, ghotilo filo fakelini mae Amnon. Kate filoni ghotilo te koꞌu te salaꞌui mana na, iara na eni kaisei fagaglana ka ghotilo. Eghuteuna ghotilo tei mala faleheni mana. Ghotilo thosei nanga nomi. Naugna iara te cheke ghami ghotilo te mala faleheni mana na. Eghume ghotilo famamhaku nagnafami re mala thosei mhaghu!”

Fapea Samuel 11:13

Ka narane igne, mae Devet ne kiloni mana mala tei ima rafi balugna. Mae Devet fakoꞌuni mae Uraea. Mae Uraea koꞌu ne salaꞌui fara. Nu ka bongi igne mae Uraea ne theome tei ka nogna suga na, nu mana tei ne thuru baludi mae mala reireghi nogna suga biꞌo mae king.

Proveb 23:20

Iagho thosei loku fodu baludi mae te koꞌu beer nei ghamu biꞌo fara teu are.

Jenesis 19:33

Ka bongi tuana repa ne fakoꞌuni mae kmadi na ne dranga fara, eghuteuna gaꞌase ke biꞌo na ne tei ne thuru balugna kmagna na. Mana theome laseni kaisei glepo ka unha te eni thugna gaꞌase ka mana na.