Profet Jeremaea 3:12 - Buka Blahi Ka Cheke Holo

¹² Eghume ghema Jeremaea, iagho atha nogu cheke iara igne mala tei cheke eghu ranghidi, “Israel, iagho jateula gaꞌase te huhughuni puhigna tholaghi na ia eghu tirou fara teke pulo mei ka iara na. Iara kokhoni ghami ghotilo, nu iara ginauna nake theome diꞌatagu fabrahu ka ghotilo.

Profet Jeremaea 3:12 ပူးပေါင်းရင်းမြစ်များ

Profet Esikiel 33:11

Iagho cheke eghu ka naiknodi Israel: Ghotilo naiknomi Israel. Iara cheke fadoglo ari ka ghotilo ka nanghagna nogu Lord God mae ihei te karha te tifa: Iara theome gleꞌa te filodi naikno te diꞌa igre te lehe ka nakhibodi re. Iara magnahaghei te filodi mare teke tughu nagnafa nei koko nakhibo eghu, mala hatini mare thofno nakarha na. Ghotilo naiknomi Israel, fanomho. Ghotilo figri tagru ka puhi te diꞌa te edi ghotilo are mala ke pulo mei ka iara! Naugna unha si ghotilo te magnahaghei lehe gnea?

Nodi Khoje Hatimare Mae Jiu 86:15

Nu Lord, iagho ngala God mae ihei te kokhonidi fara, nei namhadi fara teu naiknore. Uve, iagho thofno keli fara, eigna iagho theome ghosei diꞌatamu, nei iagho tangomana te tajini fabrahu nou nhaꞌa cheke na.

Profet Jeremaea 33:26

Na jateula igne eghu, iara ginauna na theome thododi vikedi mae Jekop ghe nogu mae gloku iara mae Devet. Eghuteuna iara na jaola theome huhughuni nhaꞌa cheke nate au fabrahu teke eni iara balugna King Devet, nei king te gnafa nate funei frunidi vikedi mae Ebraham, mae Aesak nei mae Jekop, ginauna karha mei ka vikegna Devet. Iara ginauna kokhonidi nogu naiknore, eghuteuna iara ginauna toghodi mala au fakeli ka nodi namono na jateula teke tifa ia eghu.”

Profet Jeremaea 31:20

Nu te chekeni iara ka ghotilo gognarona. Efrem gne thofno mae thugu iara, iara thofno namhani nei gleale'ani eghu mana. Kmana fata iara diꞌatagu fara ka mana eidi nakhibogna manare. Nu neuba, leuleghu fata na iara ghathoni mana, naugna iara namhani nei kokhoni noguni eghu mana.

Profet Jeremaea 3:22

Lord ne cheke eghu, “Ghotilo naikno te maku jateula thina teu phaꞌumire igre, ghotilo ke pulo mei ka iara! Eghuteuna iara ginauna na fadoglidi puhimi ghotilore mala ke au fakeli balugu iara.” Eghuteuna naiknore ne cheke eghu, “Uve, ghehati gognarona nake pulo mei ka iagho, naugna iagho Lord, nomi God ghehati!

Profet Jeremaea 3:18

Jaola ka narane igne, hatimare mae Juda nei hatimare mae Israel ginauna loku fodu ka namono biꞌo Jerusalem. Uve, mare te gnafa na ginauna jifla mei ke raru ka kantri te au teu mare gognaro gne mala ke pulo mei ka vido mala nomi ghotilo teku iara teke snakre ari ka mae kuꞌemi ghotilo tifara.”

Profet Jeremaea 30:11

Iara au balumi ghotilo, eghuteuna iara ginauna fakarhi ghami ghotilo. Neuba iara ne goigonihi kantri mala tei au ghotilo teku iara igne, iara ginauna na theome goigoni ghami ghotilo. Neuba, iara ginauna para ghami ghotilo, eidi nakhibo te edi ghotilo ranghi ghau iara, nu iara ginauna na theome para ghami fara ghotilo.” Igne cheke gna Lord.

Profet Jeremaea 4:1

Lord ne cheke eghu, “Ghotilo naiknomi Israel. Jame magnahaghei mala ke pulo mei mala teke leghu ghau iara teuna, ghotilo koko mumuju god te ghatho tahudi ghotilo are.

Profet Jeremaea 3:5

Iagho diꞌatamu ka ghehati gognaro na? Te eghu na, niha nau nate gnafa iagho te diꞌatamu ka ghehati na? Niha fata para ghami ghehati sagho ia?’ Igne nomi cheke kolho ghotilo, nu ghotilo theome gnafa te eni puhi te diꞌa na.”

Nodi Khoje Hatimare Mae Jiu 145:8

Lord na thofno keli fara, nei kokhoni ghita eghu. Mana theome ghosei diꞌatagna, naugna nogna namha mana ranghi ghita tahati na thono biꞌo fara.

Nodi Khoje Hatimare Mae Jiu 86:5

Lord God, iagho thofno keli fara, nei iagho atha kokodi koba nakhibomi ghehatire. Eghuteuna iagho namhadi fara iheire te tarai ari ka iagho re.

Fapea Kings 18:1

Ka fatilo finogha te king mae Hosea thugna mae Ela Israel igne, mae Hesekaea thugna King Ehas ne king Juda.

Fapea Kings 17:23

ghilei leghu lahu na, Lord ne theome magnahaghedi te mei rhegnai re jateula teke chekedi nogna mae gloku mana hatimare mae profet ra. Aonu armi gna Asiria igne mei ne hata fajifladi ka nodi namono re mala tei au Asiria ka namono aheva te khaba fara, eghuteuna mare au ka kantri igne ghilei mei posa ka narane gognarogne.

Diutronomi 30:2

Eghuteuna kate ghathodi ghotilo nei thumi re teu farirhiu igre, ghotilo ke figri gaoghathomi re mala ke pulo mei ka Lord nomi God. Ghotilo mala leghudi ka gaoghathomi fateote'o, nei ka nomi glalase fateote'o eghu cheke te tusu ari iara ka ghotilo gognaro igre.

Profet Hosia 6:1

Naiknore na cheke eghu, “Tahati nake figri ka Lord. Eigna mana ne snakre mei ka tahati fogra biꞌo igne mala thoke ghita tahati, nu mana tangomana te fagnafani fogra ka tahati. Mana kolho teke nhaꞌa mei thubu igne, nu mana tangomana na teke fakeli ghita tahati na.

Profet Esikiel 39:25

“Naugna igne iara Lord, iara cheke eghu: Gognarona, iara ginauna kokhoni nogudi nogu naikno teke karha mei ke leghu ka Jekop, eghuteuna iara ginauna toghodi mala ke au fakeli jateula teke tifa ra eghu. Eghuteuna iara ginauna theome snakredi mare mala cheke lausasabani nanghagu iara te blahi na.

Profet Jeremaea 31:8

Iara ginauna atha fajifladi mala jifla mei ka kantri ke raru. Uve, iara ginauna nake atha fapulo nogu naiknore funu ka kantri te khaba. Keha naiknore dofu nei blughu. Keha gaꞌasere bukla nei namo karha sua teu igre ginauna jaola nake kafe pulo mei. Iheire na teke pulo mei igre thofno kmana fara.

Profet Jeremaea 3:14

“Iara Lord te chekeni igne. Ghotilo naikno teke tei koko ghau iara ra, ghotilo mala ke figri mei ka iara, mae ihei te jateula khetomi teu ghotilo igne. Ka namono biꞌo te gnafa igre iara ginauna na atha fadelei kaisei mae ka kaisei namono biꞌo, eghuteuna ka vikemi ghotilore, iara ginauna na atha fajifla phei mae mala ke pulo ka Thogele Saion.

Profet Jeremaea 3:7

Jau na tughu puhi mare nake pulo mei ka iara neu sia iara gaoghathogu na ia, nu theo kolho eghu. Hatimare maedi Juda igre mare filoni te diꞌa puhigna greghadi na.

Profet Jeremaea 3:1

Lord ne cheke eghu, “Jame kaisei mae koko khetogna na, eghuteuna gaꞌase te koko mana igne ke tei tolaghi ka keha mae delei ngau. Ba, mae igne na faꞌunha? Mae igne tangomana na teke atha fapulo gaꞌase igne? Theo, naugna jame te eghu na, mana ginauna goigoni glose igne ka tathagu iara na. Nu ghotilo te tei koko ghau iara igne, ghotilo jateula gaꞌase vine te tei eni puhi te diꞌa na ka keha maei ra eghu. Eghume faꞌunha eghu jame teke pulo mei ghotilo ka iara na?

Profet Isaia 44:22

Eghuteuna iara la hata fadeleihi nakhibomi ghotilo re, jateula khoveo te pala te tei nuri delei ra eghu. Ghotilo ke figri mei ka iara, naugna iara neke fakarhi ghami ghotilo!”

Proveb 28:13

Jame te pophoru iagho nakhibomure, iagho ginauna na theome au fakeli. Nu jame te cheke thakledi iagho nakhibomure, eghuteuna figri tagrudi iagho nakhibo igre teuna, God ginauna kokhoni nigho iagho.

Nodi Khoje Hatimare Mae Jiu 103:17

Nu God namha ghita tahati iheire te ghatho tahudi nei leghudi teu fabrahu nogna chekere. Eghuteuna mana ginauna na jateula tuana eghudi fabrahu thuda nei grada teu tahati te karha mei thogheiro re.

Nodi Khoje Hatimare Mae Jiu 103:8

Puhigna God na thono keli fara, mana theome tangomana te ghosei te diꞌatagna na. Nu mana namhadi nei kokhonidi eghu fara naiknore.

Nodi Khoje Hatimare Mae Jiu 79:5

Lord God, ba? Iagho na diꞌatamu fabrahu ka ghehati? Ba? Na brana fabrahu diꞌatamu na ka ghehati jateula khaꞌaghi eghu?

Fapea Kronikols 30:9

Jame teke pulo mei ghotilo ka Lord, eghuteuna iheire teke hata kherada tahati ra teke tei au ka keha kantri delei ra, mare ginauna nake kokhonidi nake snakre fapulo meidi. Lord nomi God ghotilo igne thofno keli fara, eghuteuna mana tangomana te kokhonidi naiknore. Eghuteuna jame teke pulo mei ghotilo ka mana na, mana ginauna kelitagna fara ka ghotilo te au balugna mana na.”

Fapea Kings 17:6

Ke lamnadi nheva finogha te funei King Hosea Israel igre, king gna Asiria ne uluni namono biꞌo Samaria, aonu king gna Asiria igne huhurudi naiknodi Israel igre hata ne tei ka nogna kantri na. Kehare au ka namono Hala, kehare au rhegna khoꞌu biꞌo Habor ka nohi Gosan, eghuteuna kehare ka namono Media.

Fapea Kings 15:29

Ka narane tuare, King Tiglat-Pilesa gna Asiria mei ne magra Israel. Mana uluni magra igne ne hata namono igre: Ijon, Abel-Bet-Maka, Janoa, Kedes, Haso. Mana jaola ne uludi namono te au ka thilo nohi Gilead, Galili nei ka nohi Naftali, eghuteuna mana hata naiknore ne tei Asiria.

Jenesis 4:7

Jame te loku fakeli iagho na, iara ginauna na ghatho tahu nigho, nu jame te loku fadiꞌa iagho na, u nakhibo na ginauna na kaikalitiu te mala goigoni nigho iagho na. Eigna u nakhibo na magnahaghei te tapla fapari nigho iagho. Nu thosei snakreni nakhibo na me mala funei fruni nigho eghu.”

Levitikas 26:40

“Nu ginauna tharaknami ghotilo mala cheke thakledi nakhibodi re, nei cheke thakledi nakhibodi kuꞌedire. Eghuteuna mare ginauna mala cheke thakledi kuꞌedi mare teke figri tagru ghau iara ra. Mare ginauna mala cheke thakledi puhidi kuꞌedi ra teke figri tagrudi iara teke ghilei kuru teidi iara ka nodi kantri nodi naoka mare re. Eghuteuna jame iheire te patu gama igre faparadi thedi, mare laseni papara igne thoke mei ka nakhibodi thedi,

Nodi Khoje Hatimare Mae Jiu 103:9

Mana theome fiti diꞌatagna ka tahati, nu mana diꞌatagna kate au nafugna, eghuteuna mana theome tangomana te diꞌatagna fabrahu ka tahati na.

Profet Jeremaea 11:6

Aonu Lord ne cheke eghu ka iara, “Iagho tei ka namono biꞌo te au jare Juda nei heva heva Jerusalem mala toutonuni nogu cheke iara igne ka naiknore. Fanomho mei ka cheke te au ke lamnagna u nhaꞌa cheke teke eni iara balumi ghotilo igne, nei leghudi gobigna lepo te chekedi ka nhaꞌa cheke igne eghu!

Profet Jeremaea 12:15

Nu ke leghu na, iara ginauna nake kokhonidi, eghuteuna iara ginauna nake atha fapulodi ka nodi namono re.

Lamentations 3:22

Nogna namha Lord na theo ka khusu gna. Puhi te kokhoni ghita nei keli ranghi ghita teu mana igne au fabrahu tifa tifa.

Profet Esikiel 11:17

“Eghume, iagho mala cheke eghu ka mare, ‘Lord ne cheke eghu: Iara ginauna nake hata fapulo ghami ghotilo funu ka kantri teke kuru tei ghami iara te tei au tafri teu ghotilo tadi are, mala ke tusu fapulo kantri Israel igne ka ghotilo.’

Fapea Kronikols 29:10

Gognarona iara ghaoghatho mala eni kaisei nhaꞌa cheke balugna Lord nodi God mae Israel, mala theome diꞌatagna mana ka tahati.

Profet Isaia 31:6

Ghotilo maemi Israel! Ghotilo ke pulo ka nomi God, mae ihei teke tei kokoni ghotilo ia.

Profet Jeremaea 31:21

“Ghotilo maemi Israel, ghotilo ghatho fakelini nabrou teke leghuni ghotilo kani teke jifla ghotilo ka thofno namonomi ia, eghuteuna ghotilo neke lilisei fagaglana ka nabrou na mala laseni aheva na teke pulo mei na. Ghotilo Israel, ghotilo mala ke pulo mei ka nomi namono igre.

Profet Sekaraea 1:4

Ghotilo ginauna thosei leghudi puhidi kuꞌemi ghotilo tifa ra. Tifa na, mae profet neke chekeni nogu cheke iara na ka mare gnafa mala lilisei puhi te diꞌa re nei nakhibodi re. Nu mare tirodi fanomho ka nogu cheke iara na, eghuteuna mare jaola tirodi te leghu ghau iara na.