Profet Jeremaea 1:5 - Buka Blahi Ka Cheke Holo

⁵ “Jeremaea, kani au teku iagho ka thiꞌagna idomu na, iara neke lase nighohi. Theome karha nga teku iagho na, iara neke vahi nigho iagho mala nogu mae profet iara. Iagho mala toutonuni chekegu iara na ka kantri te gnafa ka nauthoglu igne.”

Profet Jeremaea 1:5 ပူးပေါင်းရင်းမြစ်များ

Nodi Khoje Hatimare Mae Jiu 139:16

Kate theome karha nga teu iara na, iagho filo ghau iara. Ame fufunu nga narane gre ka nakarhagu iara na teuna, iagho neke tutu fakelihi igre neke rioriso soruhi ka nou buka na.

Profet Isaia 49:1

Nogna mae gloku Lord igne ne cheke eghu, “Fanomho mei ka iara, ghotilo naikno te au ka kantri te khabara! Kani theome karha mei nga teku iara ka idogu na, Lord neke vahi ghauhi iara. Mana neke kiloni nanghagu iara na mala nogna mae gloku mana.

Letas Teke Riso Tei Mae Pol Ka Khiloau Rom 8:29

Eghuteuna naikno teke vavahi God tifa re, mana jaola magnahaghedi mala nanaba balugna Thugna, mae Jisas Kraes. Ka puhi igne, Thugna God, mae Jisas Kraes na tangomana te au jateula mae teke kulu karha eghu ka hatimare mae thabusigna goro thugna God.

Profet Isaia 49:5

“Tifa, kani theome karha teku iara na, Lord neke vahi ghauhi iara mala nogna mae gloku mana, mala ke atha fafigri iara naiknodi Israel teke au tafri ka keha vidoi. Naugna igne, mana fafnaknoni nanghagu iara na, eghuteuna tusu mei nolaghi ka iara,

Luku 1:41

Kate nomhini Elisabet chekegna Meri na, sua te au ka thi'agna na ne kaplo. Eghuteuna ka vido tuana mae Tharunga te Blahi na ne soru mei ka Elisabet.

Luku 1:76

Mae Sekaraea ne cheke eghu ka mae Jone, “Iagho mae thugu iara, mare ginauna na kilo nigho kaisei mae profet nogna God te au kligna. Iagho ginauna mala kulu tei ke ulugna Lord, mala tarabana nabrougna mana.

Eksodas 33:17

Eghuteuna Lord ne cheke eghu ka Moses, “Iara ginauna thofno eni tutuani unha te toreni iagho na, naugna iara thofno lase nigho iagho fara, eghuteuna iara jaola keli tagu fara ka iagho.”

Profet Jeremaea 1:10

Ka narane igne, iara ginauna na tusu ari nolaghi ka iagho mala cheke iagho ke uludi kmana naikno ka kantri te gnafa igre. Igne nolaghi mala paꞌe soru, nolaghi mala goigoni, nolaghi mala ke babana fapulo nei nolaghi mala ke farerheta fapulo.”

Eksodas 33:12

Moses ne cheke eghu ka Lord, “Iagho neke chekehi ka iara mala batudi naiknore mala tei ka glose teke nhaꞌa chekehi iagho ia, nu iagho neke theome chekeni ka iara ihei nate tei balugu iara na. Iagho neke chekehi iagho te lase ghau fara iara na, eghuteuna iagho jaola keli tamu ka iara.

Luku 1:15

Naugna ginauna mana na kaisei mae nafnakno ka tathagna Lord na. Eghuteuna mana na theome koꞌu waen ba unha nafnata khoꞌu te nheta fara. Nu funu ka karhagna na, mana na fodu ka Tharunga te Blahi.

Letas Teke Riso Tei Mae Pol Ka Khiloau Rom 1:1

Iara mae Pol, kaisei nogna mae gloku Jisas Kraes. God neke kilo ghau iara mala nogna mae khuru nei mana neke vahi ghau iara mala toutonuni nogna Nonomho te Keli na.

Profet Jeremaea 50:34

Nu God mae ihei te mala atha fajifladi mare na thono nheta fara. Nanghagna mana na Lord, mae ihei te au nolaghi fateote'o. Mana ginauna toghodi mare, eghuteuna mana na tapla faparidi hatimare mae naoka. Eghuteuna mana ginauna toghodi nogna naiknore mala au ka pharikeli ka nodi thofno namono na. Nu iara ginauna eꞌei puhi biꞌo mala thokedi naiknodi Babilonia.”

Efesus 1:22

God lilisei gobigna lepo fateo ke parigna nogna nolaghi Kraes. God tusu ranghini Kraes u nolaghi mala pha'ugna khiloau mala jateula pha'udi eghu gobigna lepo te gnafare.

Jone 10:36

Eghuteuna ka unha gne site ne cheke faparini iara mae Mama teuni ghotilo gnea? Ba, naugna te cheke eghu iara, ‘Iara Thugna God’ teu iara gne? God vahi ghau iara neke kuru mei ghau iara kau nauthoglu gne.

Ululahu Korin 8:3

Nu ihei te namhani God na, God laseni mana.

Nodi Khoje Hatimare Mae Jiu 139:15

Kani au nga teku iara ka thi'agna idogu na, iagho neke filo ghauhi iara. Uve, iagho la filodihi te kotu mei nhubragu iara re. Kate biꞌo haghe iara ka thi'agna idogu na, iagho lase nihi te au teu iara jare na.

Profet Jeremaea 1:4

Igne nonomho teke chekeni God ka iara na. Mana neke cheke eghu ka iara,

Profet Jeremaea 25:13

Iara na cheke ka mae profet Jeremaea eigna unha nate thoke mei ka kantri igre. Mana ginauna na chekedi nei riorisodi eghu glepo igre ka buka. Eghuteuna iara ginauna snakredi puhi biꞌo igre mala thoke mei ka namono igne leghuni unha teke chekeni iara na.

Profet Jeremaea 36:2

“Jeremaea, funu ka narane gna King Josaea te mei posa gognarogne, iara neke cheke ka iagho eidi phei kantri Israel ghe Juda baludi keha kantri igre. Gognarona iara magnahaghei nigho iagho te atha kaisei pepa brahu mala rioriso soru cheke te gnafa igre.

Profet Jeremaea 20:15

Snakre lao puhi biꞌo ka mae ihei te atha nonomho te mei cheke eghu ka mae kmagu iara na, “Khetomu iagho ia au kaisei thugna nalhaꞌu.” Mae kmagu iara na nomhini igne neke gleale'a fara.