Profet Daniel 7:10 - Buka Blahi Ka Cheke Holo

¹⁰ Eghuteuna khaꞌaghi te jifla mei ka sape nafnakno igne loloro jateula khoꞌu eghu. Eghuteuna kmana thogha naikno te theome tangomana te kahadi re kegra ke ulugna Mana. Eghuteuna kehare tothora nodi bukare tarabana mala fate.

Profet Daniel 7:10 ပူးပေါင်းရင်းမြစ်များ

Profet Isaia 30:27

Filo ghotilo ia! Lord mae ihei te au nolaghi fateote'o igne, mana mei funugna ka vido te khaba fara balu nogna nafnakno biꞌo. Eghuteuna tahati tangomana te filoni mana te mei jateula kaisei maraghata biꞌo teuna. Diꞌatagna mana igne jateula kaisei nuri biꞌo te namo mei te goigonidi gobigna lepo ra eghu. Eghuteuna nogna cheke mana na ginauna jateula khaꞌaghi biꞌo eghu naugna mana ne thono diꞌatagna fara.

Diutronomi 33:2

“Lord mei funugna Sanai neke mei ka ghotilo. Mana mei ka ghotilo jateula naprai te haghe ka keha phile nohi Idom ra eghu. Eghuteuna siasiglagna na phae funu ka thogele Paran mei posa ka ghotilo. Nabotho thogha engel te mei balugna mana na, eghuteuna mana louloku kaisei khaꞌaghi biꞌo fei khame nhetagna.

Thakle 5:11

Kate filo lao iara na, iara ne nomhini khojedi kmana mola mola engel, theome tangomana te kahadi. Mare ne kegra falithuni nogna sape nafnakno mae King na baludi fati glepo te karhare nei hatimare mae biꞌo ka khiloaure.

Nodi Khoje Hatimare Mae Jiu 50:3

Noda God na la meihi, nu mana na theome au kmu. Khaꞌaghi te mala nhako gobigna lepore na mei ke ulugna mana, eghuteuna nuri blahi balu nakhete na au faligohoni mana.

Nodi Khoje Hatimare Mae Jiu 68:17

Noda Lord na neke jifla mei ka Thogele Sanai neke mei au ka nogna suga te blahi na. Mana neke mei balu nogna soldia nei kmana thogha chariot mala magra.

Letas Teke Rioriso Mae Jud 1:14

Mae Inok teke karha ka fafitu phagusu ke leghugna mae Adam na neke kulu laseni unha nate eni ka mae igre. Eghuteuna mana neke cheke eghu eidi mare, “Filo si ghotilo, Lord ginauna mei balu nogna thogha thogha engel te blahi.

Matiu 25:31

Aonu mae Jisas ne cheke eghu, “Ka narane na teke pulo mei iara na, iara na mei balu nogu nolaghi biꞌo. Nogu tothoghei engel iara re ginauna mei balugu iara. Eghuteuna iara mae King na ginauna gnokro ka sape nafnakno.

Profet Isaia 30:33

Lord tarabanahi kaisei glave biꞌo mala horo khaꞌaghi mala gnubrani king biꞌogna Asiria. Glave igne mamhara fara, eghuteuna mare tarabanahi kmana gaju jare. Eghuteuna Lord ginauna phanga mei khaꞌaghi brana. Naugna phaphanga gna Lord na brana fara jateula khaꞌaghi eghu.

Ululahu Kings 22:19

Nu profet Maekaea tudu ne cheke eghu, “Fanomho fakeli ka unha te chekeni Lord igne! Iara filoni ka kaisei mifi Lord te gnokro teu ka nogna sape nafnakno na kligna. Eghuteuna nogna engel mana re kegra fei nhetagna, eghuteuna kehare fei mairigna.

Profet Daniel 7:22

Nu God mae ihei te au fabrahu funu tifa igne ne fateni hona ikoi igne ne cheke thakleni, hona igne la eni kaisei najafra biꞌo ranghidi nogna naikno God te au kligna. Eghuteuna God mae ihei te fnakno igne ginauna tusu lao nolaghi ka nogna naiknore mala funei fruni jateula king eghu.

Hibru 12:22

Nu ghotilo la mei namohi ka kaisei namono majaghani, u thogele te kiloni Saion. Igne namono Jerusalem te au kligna na, nogna namono biꞌo God mae ihei te karha te tifa. Jare te au thogha thogha engel nogna God.

Profet Sekaraea 14:5

Ghotilo ginau rikha tei salaꞌu ka glogu igne, glogu igne ghilei tei thoke ka namono Asal. Uve, ghotilo ginauna rikha faghose jateula kuꞌemi ghotilo teke rikha ka narane gna King Iusaea, mae ihei teke king gna Juda tifa. Aonu nogu Lord God iara ginauna mei balu nogna engel blahi.

Profet Daniel 7:26

“ ‘Kate gnafa nogna narane mana igre, God ginauna fateni mae king igne. Aonu God ginauna hata koko nogna nolaghi mae king igne. Eghuteuna mare ginauna na goigonini ni fara mana.

Hibru 1:14

Mae unha si engel grea? Mare khogla tharunga kolho, mala loku ranghini God. Eghuteuna God kurudi mare mala toghodi iheire te athini u thofno karha na.

Thakle 11:18

Naikno te tirodi fatutuani nigho re ne thofno diꞌatadi fara, nu gognaro la mei nou narane iagho te mala diꞌa tamu na. Igne narane mala fatedi naikno tela lehehira. Igne narane mala tabadi nou mae gloku hatimare mae profet ra baludi nou naikno te gnafa teke ghatho tahu nigho, neuba mare ne mae nafnakno ba theome mae nafnakno. Igne narane te mala paradi naikno teke goigonidi naiknogna nauthoglu igne.”

Fapea Kronikols 18:18

Nu mae Maekaea ne cheke eghu, “Eghume fanomho fakeli ka nogna cheke Lord igne. Iara filoni Lord te gnokro teu ka nogna sape nafnakno na kligna, eghuteuna nogna engel re kegra rhegna mana, kehare fei khame nhetagna eghuteuna kehare fei khame maerigna.

Nodi Khoje Hatimare Mae Jiu 18:8

Gagahu na ne jifla mei ka nehugna mana na. Eghuteuna khaꞌaghi nei thina ngire eghu ne jifla mei ka foflogna mana na ne nhako gobigna lepore.

Profet Daniel 12:1

Mae tuna ne cheke eghu ka iara, “Ka narane igne, engel Maekol mae funeidi hatimare mae engel te mala reireghidi nou naikno iagho igre ginauna thakle mei. Ka narane igne puhi biꞌo ginauna thoke mei. Tifa na nafnata puhi biꞌo igne neke theome thokeni kaisei kantri ka nauthoglu igne. Kate thoke mei narane igne, God ginauna nake hata fapulo nogna naiknore, naugna nanghadire la auhi ka nogna buka na.

Thoutonu Eigna Mae Job 25:3

Theo kaisei naikno tangomana te kahadi engel ke lamnagna nogna armi mana na. Eghuteuna nogna juta mana na sigla tei ka namono te gnafa ka nauthoglu igne.

Nodi Khoje Hatimare Mae Jiu 103:21

Ghotilo nogna naikno gloku God te au kligna te edi unha te magnahaghedi mana ra, ghotilo cheke fakelini mana!