Naba 21:29 - Buka Blahi Ka Cheke Holo

²⁹ Kokhoni ghami fara naiknomi Moab ra! Mare la goigoni ghami ghotilo iheire naikno te maimanihini god Kemos ra. Nomi god ghotilo na ne snakredi thumi nalhaꞌu ghotilo re mala au tafri kolho. Eghuteuna mana jaola ne snakreni mae King Sihon gna Amoa na mala hata thumi gaꞌase ghotilo re.

Naba 21:29 ပူးပေါင်းရင်းမြစ်များ

Profet Jeremaea 48:46

Kokhoni ghami fara ghotilo naikno te au Moab ra! Mare goigoni ghami fara ghotilo iheire te tarai ka mumuju god Kemos. Naoka ginauna huhurudi thumi nalhaꞌu nei thumi gaꞌase teu ghotilore mala jifla ka kantri igne mala tei au ka keha kantri delei te khaba fara.

Fapea Kings 23:13

King Josia jaola ne goigoni kmana vido blahi ke maghati Jerusalem. Tifa na King Solomon neke horo olta igre ke mata Thogele Glepo Diꞌa. Vido blahi igre mala pogho soru ka god Astarot, nodi god gaꞌase maedi Saedon, Kemos nodi god maedi Moab, Milkom nodi god maedi Amon.

Jajis 11:24

Kemos gne nomi god ghotilo na, eghuteuna jame hata mana keha glose te tusu ari ka ghotilo na, uve ghotilo tangomana te khotodi re. Eghuteuna jateula tuana eghu, Lord na nomi God ghehati, eghuteuna kate hata kasa mana glose igne te tusu mei ka ghehati na, uve, ghehati te khotogna na.

Profet Jeremaea 48:7

Ghotilo naiknomi Moab, leuleghu fata na ghotilo rouronu kolho ka nomi nanheta nei nomi dedei teu themire. Nu glepo igre ginauna theome togho ghami ghotilo. Mae naoka ginauna ulu ghami ghotilo, eghuteuna huhuru ghami ghotilo mala jifla ghotilo ka nomi namono na. Eghuteuna mare ginauna na jaola atha nomi mumuju god Kemos ghotilo ana, baludi mae pris nei nomi mae biꞌo teu ghotilo are.

Ululahu Kings 11:33

Iara ginauna eni igne, naugna mae Solomon baludi naiknodi Israel igre ne tei koko ghau iara, nei mare pogho soru ka god Astarot nodi god gaꞌase naiknodi Saedon, eghuteuna Kemos nodi god naiknodi Moab, eghuteuna Molek nodi god naiknodi Amon. Mare theome leghuni puhigu iara na. Eghuteuna mare theome eni unha te doglo ka tathagu iara na, mare theome leghudi nogu vetula nei nogu cheke teu iara re jateula King Devet kmagna mae Solomon teke edi tifa ra eghu.

Ululahu Kings 11:7

Mae Solomon ne eni kaisei vido blahi ka thogele ke maghati Jerusalem mala tarai ka god Kemos, god te thono diꞌa fara igne nodi god naiknodi Moab. Eghuteuna mana jaola eni keha vido blahi na mala pogho soru ka Molek, kaisei nodi god te diꞌa naiknodi Amon.

Profet Jeremaea 48:13

Mare ginauna mamaja nodi fara eigna nodi god Kemos na, jateula maedi Israel teke mamaja nodi fara eigna nodi god naiknodi Betel te theome tutuani teke fatutuani ni fara mare ra eghu.

Profet Isaia 16:2

Nu naikno ka namono Moab igre ofo neu ka geri khoꞌu Anon te khaba fara ka nodi namono re. Mare tei nei mei neu kolho jateula sua nanghaji te flalo tafri kate jifla kokoni nodi gnoku na te funu flalo tafri baludi idodi nei kmadi teura neu.

Profet Isaia 15:5

“Nu iara ne kokhoni nogudi fara naiknodi Moab igre. Naugna keha ka naikno igre rikha ne tei thoke ka namono Soa, eghuteuna keha naiknore ne tei posa ka namono Eglat-Selisia. Eghuteuna keha ka mare tanhi leghu brou ne haghe ka namono Luhit. Eghuteuna keha ka mare jaola tanhi rikha doglo ne tei ka namono Horonaem.

Naba 24:17

“Iara la filonihi unha nate thoke mei ginauna. Kaisei nathunu biꞌo ginauna jifla mei ka vikegna mae Jekob. Uve, kaisei king ginauna funu mei gna Israel. Mana ginauna mei fanoinoli phaꞌudi mae lidadi Moab re, eghuteuna mana ginauna mei goigonidi mae mala magra re.

Profet Jeremaea 48:45

“Iheire te fariuriu rikha mala tei poru ka namono Hesbon teu igre ginauna glaꞌe sukha, naugna ka namono tuana nogna suga King Sihon igne ginauna gnhubra ka khaꞌaghi baludi keha suga te au rhegnai. Eghuteuna khaꞌaghi igne ginauna jifla mei mala nhako vido te gnafa ka kantri igne baludi nodi suga iheire te foflo biꞌo gognaro gre.