Matiu 5:17 - Buka Blahi Ka Cheke Holo

¹⁷ Mae Jisas ne cheke eghu ka mare, “Na mei iara kau nauthoglu igne mala hata koko nogna vetula mae Moses nei nodi cheke hatimare mae profet gre eghu ghotilo gaoghathomi na. Theo, iara gne mei mala horoghoto nei laseni eghu ghotilo gaoghathogna unha teke chekeni mare ia eghu.

Matiu 5:17 ပူးပေါင်းရင်းမြစ်များ

Letas Teke Riso Tei Mae Pol Ka Khiloau Rom 10:4

Nu Kraes la mei fagnagnafa u nogna vetula God na jateula kaisei nabrou te mala thokeni u thofno nakarha na. Eghuteuna iheire fateo te fatutuani ni mae Jisas, God ginauna toghodi mala naikno doglo.

Luku 16:17

Tutuani te chekeni iara ka ghotilo na. Kligna nei pari teu igre tangomana nate ari te gnafa na, nu theo kaisei phugra cheke ka vetula nate ari te gnafa na.

Letas Teke Riso Tei Mae Pol Ka Khiloau Rom 8:4

God neke eni igne, mala horoghoto ka tahati unha te doglo ka vetula na. Eigna tahati tangomana te leghuni puhigna Tharunga te Blahi na, mala theome leghuni puhi te diꞌa te au ka thinidare.

Letas Teke Riso Tei Mae Pol Ka Khiloau Rom 3:31

Nu kate nomhini ghotilo cheke igne, thosei cheke eghu ghotilo, “Naugna tahati ne fatutuani ni mae Jisas, tahati na theome leghuni u vetula na. Naugna ka puhi fatutuani gne, puhi vetula gne ginauna hui.” Theo. Vetula na kaisei glepo biꞌo fara. Tuani, kate fatutuani ni mae Jisas na tahati thofno leghuni gaoghathogna nogna vetula mae Moses na.

Profet Isaia 42:21

Lord kelitagna fara te kilo fnakno ka puhigna mana te doglo. Eghuteuna mana magnahaghedi fara nogna naiknore te kilo fnaknoni mana nei nogna vetula.

Matiu 7:12

Unha te magnahagheni ghotilo te mala eni ranghi ghami keha naiknore, glepo tuana la mala teke eni ghotilo ranghidi mare na. Igne gaoghathogna vetula nogna mae Moses nei chekedi hatimare mae profet.”

Matiu 3:15

Aonu mae Jisas ne cheke eghu ka mae Jone, “Eni sagho gognarona. Naugna ka igne na tapa eni unha te magnahagheini God na.” Mae Jone ne faꞌuveni mana.

Mae Khuru 18:13

Mare ne cheke eghu ka mae Galio, “Ghema Primia, mae igne farirhiudi naiknore mala pogho soruni God ka puhi te blahi fara ka nomi vetula ghehati mae Jiu gre!”

Mae Khuru 6:13

Eghuteuna mare hata ne mei keha mae mala chaghi eigna mae Stivin. Mare ne cheke eghu, “Mae igne ne cheke faparini koba noda Sugablahi tahati igne nei cheke faparini la noda vetula tahati gne.

Jone 8:5

Eghuteuna, ka noda vetula tahati teke tusu ranghi ghita mae Moses ia thono blahi fara te tolaghi pedo na. Nu te chekeni ka vetula na cheke eghu agne, ‘Ihei te loku jafra jateula gaꞌase igne teuna, mala fada falehe kau thina’, ba unha eghu iagho gaoghathomu na?”

Mae Khuru 21:28

Mare ne eha eghu fabiꞌo, “Ghotilo maemi Israel, togho ghami ghehati! Mae igne tei tongana heva heva cheke fapari ghita tahati nei farirhiudi naiknore mala thosei leghuni nogna vetula mae Moses na, nei cheke faparini noda Sugablahi tahati igne. Eghuteuna gognaro na mana la fatothona Sugablahi gne, naugna mana hata la mei keha mae Griki la ruma ka Sugablahi gne!”