Matiu 15:19 - Buka Blahi Ka Cheke Holo

¹⁹ Naugna igre glepo te jifla mei ka nagnafagna mana re, gaoghatho te diꞌa, falehe naikno, tolaghi pedo, mhala, blau, chaichaghi, vuavuha cheke nei buiburini ihei.

Matiu 15:19 ပူးပေါင်းရင်းမြစ်များ

Profet Jeremaea 17:9

Ihei te lase fakelini gaoghathogna naikno na? Gaoghathogna naikno na jateula kaisei fogra biꞌo te theome tangomana kaisei naikno teke famafoni ra eghu. Thiꞌagna naikno na fodu ka chaichaghi. Ihei te lase fakelini nagnafagna naikno na?

Proveb 4:23

Saghe leghu fakelini nagnafamu na, eigna nakarhamu iagho na jifla mei jare.

Jenesis 6:5

Lord ne filodi puhidi naikno gna nauthoglu gne ne thono diꞌa fara. Eghuteuna mare ghathodi fabrahu kolho glepo te diꞌa re.

Profet Jeremaea 4:14

Ghotilo naiknomi Jerusalem, niha nau ame tughu nakarha nga eghu si ghotilo ia? Koko si ghotilo puhimi te diꞌare mala ke au klino, eghuteuna God ginauna na fakarhi ghami ghotilo.

Mae Khuru 8:22

Eghume, kulu tughu nagnafa ghu sagho! Koko puhi diꞌa te edi iagho are. Eghuteuna tarai ka Lord. Mana jame tangomana te hata fadelei gaoghatho te diꞌa tuana ka iagho.

Profet Isaia 59:7

Leuleghu fata na, ghotilo magnahaghei fara te ghosei te eni puhi te diꞌa na. Eghuteuna ghotilo diꞌatami faleheni ihei te theome eni kaisei puhi te diꞌa na. Gaoghathomi ghotilo igre thofno diꞌa fabrahu, eghuteuna puhi te mala goigonidi nakarhadi keha naiknore igne jateula nomi nabrou biꞌo eghu ghotilo.

Profet Isaia 55:7

Ghotilo iheire te leghudi puhi te diꞌa ra, ghotilo koko puhi te diꞌa tuare. Ghotilo koko gaoghatho te diꞌa tuara mala ke pulo mei ka Lord noda God, mala kokhoni ghami nei hata fadeleidi nakhibomi ghotilore eghu mana.

Proveb 6:14

Mare ghathodi thua nafnata puhi te mala eni glepo te diꞌa na, eghuteuna edi puhi biꞌo ka vido te kmana re.

Nodi Khoje Hatimare Mae Jiu 119:113

Lord God, iara thono magnahaghedi fara nou famane farirhiu iagho ra, nu iara theome magnahaghedi iheire te tirodi leghu nigho re.

Letas Teke Riso Tei Mae Pol Ka Khiloau Rom 7:18

Iara laseni, fei iara thegu na, iara maegu ka nauthoglu igne kolho, theo kaisei glepo te keli te au ke lamnagu iara na. Naugna neubane au ka iara gaoghatho te keli na, iara theome tangomana te eni puhi te keli na. Theo fara, iara theo nogu nolaghi te mala eni puhi te doglo na.

Matiu 9:4

Aonu, mae Jisas ne lasedi nagnafadi mare re ne cheke eghu, “Naugna unha site au mei ka nagnafami ghotilo re nafnata gaoghatho te diꞌa tuana ia?

Jenesis 8:21

Lord ne gnanghini u fafara te famane sisiri keligna igne ne keli tagna fara ne cheke eghu, “Iara ginauna nake theome goigoni u nauthoglu igne ke tughugna puhi diꞌa teke edi naikno igre neuba iara kulu lasedihi naikno igre neke diꞌa neke mei ngala funu suadi. Nu iara ginauna nake theome goigonidi gobigna lepo te karha ka nauthoglu na igre jateula te eni iara gognaro gne eghu.

Proveb 24:9

Mae ihei te theome autagna gaoghatho te keli na, mana tangomana te ghaoghatho eigna te mala eni puhi te diꞌa na. Naiknore tirodini mae igne.

Proveb 22:15

Gaoghatho fameomekro na fodu ka thiꞌagna sua na, nu te keli na puphuri ngala mala gnafa nafnata gaoghatho te fameomekro tuana.

Naba 22:29

Nu mae Balam ne cheke eghu ka dongki na, “Naugna iagho te faꞌeiꞌei fara ka iara gne! Jame loku naflahi iara ka khamegu na meuna, iara jame falehe nigho iagho gognaro la!”

Matiu 5:28

Nu te chekeni iara ka ghotilo na, mae ihei te filo lao ka gaꞌase na eghuteuna magnahagheni naꞌa kau gaoghathogna na teuna, mana la enihi puhi te diꞌa na ka naꞌa.

Matiu 15:20

Igre glepo te fathonani naikno na ke ulugna God. Eghume nafnata kastom mala kulu titihi fakeli khame ame ghamu nga teu igne, theome tangomana te mala fathonani naikno na.”