Mae Khuru 2:17 - Buka Blahi Ka Cheke Holo

¹⁷ “ ‘God ne cheke eghu: Kate namo huigna nauthoglu gne, iara ginauna lisa soru Tharungagu na ke klignadi naikno te gnafare. Eghuteuna thumi nalhaꞌu nei gaꞌase teu ghotilo are ginauna na toutonuni chekegu iara na. Eghuteuna mae majaghani nei mae biꞌomi teu ghotilo re, iara ginauna na tusu ranghidi nolaghi te mala mifi na.

Mae Khuru 2:17 ပူးပေါင်းရင်းမြစ်များ

Profet Isaia 44:3

Eghume, iara ginauna snakre mei nakhete mala soru mei ke kligna glose te theo khoꞌu fara mala tangomana khoꞌu gre te britha ke kligna glose te khapra. Eghuteuna iara ginauna snakreni Tharungagu na ka thumi ghotilore. Eghuteuna iara ginauna fablahidi iheire nate karha mei ke leghumi ghotilo re.

Mae Khuru 10:45

Naikno Jiu te fatutuani ni mae Jisas teke mei balugna mae Pita re ne jaglo nodi fara, eigna God ne tusu lao u Tharunga te Blahi na ka naikno te theome Jiure.

Jone 7:39

Mae Jisas neke cheke eigna mae Tharunga te Blahi nate mei ka iheire te fatutuani ni mana re. Kau narane tuana God theome kuru mei ngau mae Tharunga na, naugna mae Jisas theome kegra ngau kau nafnakno.

Profet Sekaraea 12:10

Lord ne cheke eghu, “Iara ginauna edi tharaknagna Devet nei naiknodi Jerusalem mala thofno au gaoghatho te keli, eigna mare tangomana te kokhoni ni keha mae na, eghuteuna mare tangomana te tarai ka iara mala toghodi. Mare ginauna filo mei ka iara, mae ihei mare teke fadini. Eghuteuna mare ginauna diꞌanagnafa nei tanhi eghu ka mana, jateula mae te au kaisei thugna kolho te lehe ra eghu, ba mae te lehe thugna teke kulu karha na.

Profet Esikiel 11:19

Iara ginauna nake tuthughu nakarhadi mare re mala ke naikno keli, eghuteuna tusu lao gaoghatho majaghani ka mare, mala tarai ka iara kolho. Eghuteuna iara ginauna hata koko gaoghatho te diꞌa fateote'o te patugama fara mare gre, eghuteuna tusu lao famane gaoghatho te keli ka mare, mala tangomana mare teke leghu ghau iara na.

Hibru 1:2

Nu gognaro na kau narane leghu lahu igre, God ne kuruni mae Thugna mala cheke ka tahati. Eghuteuna, vahini mae Thugna mala hohoro u nauthoglu igne, nei mala khotodi mana gobigna lepo fateo te au ke lamnagna.

Ululahu Korin 12:28

God neke lilisei soasopai naikno te mala edi soasopai gna gloku ka khiloau gne. Ulu lahu na, mana neu lilisei hatimare mae khuru, fapea na, hatimare mae profet. Fatilo na, hatimare mae velepuhi. Eghuteuna kehare mala eꞌei kofubobhoi, nei kehare mala fakelidi iheire te fogra, nei kehare mala totogho, nei kehare mala baubatu ka khiloau, nei kehare mala cheke ka keha nafnata cheke.

Luku 3:6

Naikno te gnafa ka nauthoglu igne ginauna na filoni God te mei fakarhidi nogna naiknore.’ ”

Mae Khuru 21:9

Mana au fati thugna gaꞌase “nau kolho”, thau igre au nodi khokofakasai mala toutonuni chekegna God na.

Profet Hosia 3:5

Eghuteuna kaisei narane ke leghudi igre, naiknodi Israel ginauna nake hogri nagnafa mala ke figri ka nodi Lord, nei nodi God. Eghuteuna mare ginauna nake jaola nake figri ka mae ihei nate karha mei ka vikegna mae king Devet, mae igne ginauna nodi king mare. Eghuteuna ka narane tuare, naiknore ginauna mei ka Lord mala kilo fnaknoni mana, eghuteuna mana ginauna na fablahidi.

Fapea Pita 3:3

Ghotilo mala thofno laseni eigna glepo igne. Na theome raugha ka nauthoglu gne keha naikno ginauna mala edi glepo te diꞌa te magnahaghedi thedire. Naikno igre ginauna mei maꞌe ghami ghotilo.

Ululahu Korin 12:10

Eghuteuna ka keha naikno na Tharunga te Blahi tusu ranghini nolaghi te mala eꞌei kofubobhoi. Ka keha naikno na nolaghi mala toutonuni chekegna God na jateula mae profet eghu. Eghuteuna ka keha naikno na nolaghi mala filo glanini nogna nafnata nolaghi naikno, jame te nogna God ba theo. Ka keha naikno na Tharunga te Blahi na tusu ranghini nolaghi te mala cheke ka keha nafnata cheke. Eghuteuna ka keha naikno na tusu ranghini nolaghi te mala rurutha gaoghathodi nafnata cheke tuare.

Letas Teke Riso Tei Mae Pol Ka Khiloau Rom 5:5

Eghuteuna u grouronu igne theome mala fadiꞌa nagnafa ghita tahati. Naugna God neke falalasehi nogna namha na ka tahati nei mana neke kuru mei nogna Tharunga te Blahi na mala au ke lamnada.

Profet Esikiel 39:29

Iara ginauna snakreni Tharunga te Blahi na mala au baludi naiknodi Israel, eghuteuna iara ginauna nake au baludi. Eghuteuna iara ginauna na theome figri tagrudi mare. Igne nogu cheke iara Lord.”

Profet Isaia 66:23

Ka Gaghamu Khafa leuleghu nhigra, nei narane Sabat te gnafa teu igre, naiknodi kantri te gnafa igre ginauna mei pogho soru ka iara agne Jerusalem.

Profet Sekaraea 2:13

Eghume tahati gnafa ka nauthoglu igne mala au kmu ke ulugna Lord, naugna gognarona, mana jifla mei ka nogna vido blahi kligna.

Profet Isaia 2:2

Ka narane nate mei mana na, thogele te kegra nogna Sugablahi Lord igne, ginauna ulu salaꞌudi gnafa keha thogele are. Eghuteuna naikno te gnafa ka keha kantri are ginauna tangomana te salo fodu mei tagna.

Proveb 1:23

Ghotilo mala leghudi nogu cheke iara igre, eghuteuna iara ginauna farirhiu ghami ghotilo mala lase fakelidi nogu cheke iara igre.

Nodi Khoje Hatimare Mae Jiu 72:6

Te keli na jame mana mala thofno keli fara jateula nakhete te soru ka nagare te kotu fakeli gano ra eghu.

Jone 17:2

Naugna iagho neke tusu mei ka iara nolaghi te mala reireghidi naikno fateo gre, mala tangomana iara te tusu lao u karha fei tifa na ka naikno nogu iara teku iagho gre.

Profet Maeka 4:1

Ka narane nate mei mana na, thogele te kegra nogna Sugablahi Lord igne, ginauna ulu salaꞌudi gnafa keha thogele are. Eghuteuna naikno te gnafa ka keha kantri are ginauna tangomana te salo fodu mei tagna.

Profet Isaia 40:5

Eghuteuna ka narane tuana, nogna nolaghi biꞌo Lord na ginauna agha soru mei, eghuteuna naikno te gnafa ka nauthoglu igne ginauna filoni. Naugna thegna Lord neke nhaꞌa cheke eigna igne.”

Jenesis 49:1

Mae Jekop ne eha meidi mae thugna re ne cheke eghu ka mare, “Mei ghotilo rhegu iara agne mala kulu chekedi iara ka ghotilo unha nate thoke mei ka ghotilo ginau re.

Profet Isaia 49:26

Iara ginauna faꞌeiꞌeidi mae teke para ghami ghotilo ra mala jateula mae te koꞌu beer te thaviru ra eghu mare mala ghilei falehe naikno fari thedi. Aonu naikno te gnafa ka nauthoglu igne ginauna laseni te iara Lord te fakarhi ghami ghotilo na. Eghuteuna mare ginauna na jaola lase ghau iara nodi God vikegna mae Jekop mae ihei te nolaghi te fakarhi ghami.”

Profet Daniel 10:14

Iara mei mala cheke ka iagho unha nate thoke mei ka nou naikno iagho igre mala lasedi iagho glepo igre. Unha te filodi iagho ka mifi igre, u thotoghaledi glepo te theome thoke mei nga teu.”

Nodi Khoje Hatimare Mae Jiu 65:2

Naugna te nomhidi iagho nomi tharai ghehati gre, naikno te gnafa ka namono te gnafa gre ginauna na ari mala fafara ka iagho.

Mae Khuru 11:28

Eghuteuna kaisei mae ka hatimare nanghagna na mae Agabus. Mana kegra haghe ne cheke ka nogna thotogho mae Tharunga te Blahi na ne cheke thakleni u nhigra behu nate thoke mei ginau heva heva kau nauthoglu gne. Eghuteuna igne ne thoke mei tutuani ka narane teke funei biꞌo teku mae King Klodius Rom.

Mae Khuru 2:16

Nu mae profet Joel na neke kulu rioriso eigna unha te filoni ghotilo gognaro gne,

Mae Khuru 2:18

Uve, iheire te loku ranghi ghau iara na, nalhaꞌu ba gaꞌase, ka narane tuana iara ginauna na tusu lao u Tharungagu na ke klignadi mala toutonuni chekegu iara na.

Mae Khuru 2:33

God neke hata hagheni mana kau sape nafnakno na mala gnokro rhegna thegna. Eghuteuna God mae Kmagna na neke tusu ranghini mana Tharunga te Blahi na, mala leghuni nogna nhaꞌa cheke na. Eghume unha te filoni nei nomhini teu ghotilo gognaro gne, glepo neke tusu meini God ka ghehati.

Mae Khuru 11:27

Ka narane tuanala keha mae profet re ne jifla Jerusalem ne tei thoke Antiok.