Levitikas 19:13 - Buka Blahi Ka Cheke Holo

¹³ “Eghuteuna ghotilo thosei chaghi tafrini ba blauni kherami na. Eghuteuna kate hata ghotilo kaisei te mala edi nomi gloku re, ghotilo mala thosei toki au nogna taba mana na ghilei thokeni keha narane na. Ghotilo mala folini mana ka narane teke loku mana tuana la.

Levitikas 19:13 ပူးပေါင်းရင်းမြစ်များ

Jemes 5:4

Fanomho mei ka iara ghotilo ia! Igne keha fagaglana eigna puhi te salo fodu sileni ghotilo malami themi kolho na. Ghotilo chaghidi nei theome tabadi eghu kolho nomi mae glokure. Eghuteuna God mae ihei te nolaghi na ngala te nomhidi nodi natanhi nei diꞌanagnafa teu nomi mae gloku ghotilo re.

Profet Malakai 3:5

Lord mae ihei te au nolaghi fateoteꞌo igne ne cheke eghu, “Iara ginauna mei mala fate ghami ghotilo. Eghuteuna iara ginauna ghosei cheke thakleni nanghagna ihei te au naitu khora pha'u, nei iheire te theome leghuni puhigna tholaghi na, nei iheire te cheke chaichaghi ka fate, nei mae funei te taba fadiꞌadi nodi mae glokure, nei iheire te fakokhoanadi goro naikno biꞌo tela lehehi khetodi, nei goro sua glehe kokoi, nei iheire te theome kokhonidi naikno te posa mei ka sugadire teu igre. Uve, naikno te gnafa te edi puhi te diꞌa igre ginauna theome ghatho tahu ghau iara.”

Profet Jeremaea 22:13

Lord ne cheke eghu, “Kokhoni ni fara king te theome leghuni puhi te doglo na kate horo nogna suga na. Nu mana chaghidi nogna mae glokure kate horo mare chogho ke kligna suga na. Kokhoni ni fara mae king te huhurudi nogna mae glokure, nu theome folidi teu igre.

Proveb 20:10

Lord na tirogna te skel chaichaghi na. Nafnata skel te diꞌa igne mana suku nognani.

Nonomho Te Keli Teke Risoi Mae Mak 10:19

Uve, iagho la lasedihi vetulara, ‘Thosei tolaghi pedo. Thosei falehe naikno. Thosei blau. Thosei chaghi eigna kaisei mae kau fate. Thosei chaghi mala blau. Ghatho tahudi idomu kmamure.’ ”

Profet Esikiel 22:29

Naiknore chaghi nei blau eghu farithedi. Mare fakokhoanadi naikno te kuma nei paradi naiknodi keha kantri te mei au baludi. Uve, mare tapla sorudi pari naikno phosa te au baludi re nei chaghi di ka fate na eghu.

Profet Jeremaea 22:3

Lord ne cheke eghu: Ghotilo mala leghuni kolho puhi te keli nei doglo teuna. Ghotilo toghoni mae ihei te blau mare nogna glepore igne. Ghotilo thosei chaghidi ba falehedi naikno te mei funudi ka kantri delei, ba thau tela lehehi khetodi, ba goro sua tela lehehi idodi ba kmadi. Eghuteuna ghotilo thosei fiti falehedi naikno te au ka namono igne.

Eksodas 22:21

“Ghotilo thosei fakokhoanadi nei paradi eghu naiknodi delei te mei au balumi are. Naugna tifa na ghotilo neke jateula tuana neku Ijep.

Eksodas 22:15

Nu jame au teku mae khotogna na, eghuteuna fnera ba lehe buluka tuana teuna, iagho theome tangomana teke tughu nogna mana na. Jame teke kulu sokahi iagho buluka igne ka mae khotogna na, iagho theome tangomana teke tughuni na buluka igne, naugna sileni teke tusu lao iagho ka mana igne la nabahi.”

Ululahu Tesalonika 4:6

Eghume theome tangomana kaisei mae te eꞌei puhi diꞌa ranghini mae kheragna fofodu na ka puhi igne. God ginauna fatedi naikno te edi glepo igre. Ghehati kulu cheke faheta ka ghotilo eigna igne.

Luku 3:13

Mae Jone ne cheke eghu ka mare, “Thosei salo takis ka naiknore me sala'uni unha te magnahaghei mae gavman na.”

Proveb 22:22

Thosei fakokhoanadi naikno te kumare. Eghuteuna thosei goigonidi ka fate na.

Thoutonu Eigna Mae Job 31:39

ba jame ghamu fahui iara gobigna lepo teke kotu ka nogu nagare iara na, ba aknu phorudi mae iheire teke joꞌu nagare igne mala rofo kolho,

Eksodas 22:13

Jame kaisei khuma mei kathu falehe buluka igne, eghuteuna falalase iagho ka mae khotogna unha teke salaꞌui na teuna, iagho ginauna na theome ke tughu buluka teke kathu khuma tuana.

Matiu 20:8

“Rafi soru, mae khoto nagare na ne cheke eghu ka mae te reireghidi mae gloku re, ‘Eha meidi mae gloku ra, mala folidi nodi tabare. Iagho na fufunu folidi mae teke tei loku leghu lahu ra tei gnafa ka mae teke kulu tei loku ra.’

Ululahu Timoti 5:18

Eigna te chekeni ka grioriso te blahi na cheke eghu, “Thosei haru foflogna buluka na mala lhotini te ghamu kate tapla naꞌa ke kligna wit na.” Eghuteuna grioriso te blahi na jaola cheke eghu, “Mae gloku na naba te hata nogna taba.”

Eksodas 20:15

“Thosei blau.

Eksodas 22:7

“Jame kaisei mae tusu lao ka mae kheragna fofodu na keha sileni mala reireghi fakelidiu mana, aonu kaisei mae nablau mei me blau sileni tuare, eghuteuna mare laseni mae teke blau tuana, eghuteuna mare lolhoku mae tuana, mae teke blau tuana mala ke tughu fapulo phei phei eghu ka sileni teke blau mana re.

Thoutonu Eigna Mae Job 17:5

Jame mae ihei te hata sileni te mala cheke goigoni ni kheragna fofodu na, thugna mana re ginauna au papara.

Proveb 3:28

Kate toghoni iagho kheramu fofodu na, iagho eni gognarola. Thosei ofoni nathuꞌu.

Profet Esikiel 18:7

Mana theome tangomana te parani ihei na. Mana theome tangomana teke loku faleghu kaisei glepo teke lilisei ihei balugna mana mala enighu kaisei nogna glepo teku mana na. Ka teke hata fapulo mae igne unha teke nogna mana re, mana ke tusu fapulo unha teke au balugna mana re. Mana theome tangomana te blau na. Mana tangomana tufa gano ka ihei te theo ghegna gano na, eghuteuna tangomana te tufa pohe ka ihei te theo nogna pohe na.

Profet Esikiel 22:12

Ka namono igne, keha ka ghotilo hata sileni ka mae iheire te magnahaghei aknu falehe naikno. Eghuteuna ghotilo hata intres biꞌo ka kaoni teke tusu lao ghotilo ka kherami are, eghume ghotilo thofno dedei fara naugna ghotilo chaghidi kolho naiknore. Ghotilo la ghatho iho ghau iarahi. Igne nogu cheke iara Lord God.

Levitikas 25:14

“Eghume, jame ihei ka ghotilo magnahaghei sabiri glose ka keha mae na, ba foli glose eghu, ghotilo thosei chaghi fari themi.

Levitikas 25:17

Ghotilo thosei chaichaghi fari themi. Nu ghotilo mala ghatho tahu ghau iara naugna iara Lord, nomi God ghotilo.”

Thoutonu Eigna Mae Job 7:2

Nakarha igne jateula kaisei naikno sneka te babaꞌo fara te magnahaghei tei gnafa ka naungogna gaju te jemnu ra eghu. Uve, nakarha na jateula mae gloku te ofo mala hata nogna taba ra eghu.