Jenesis 43:11 - Buka Blahi Ka Cheke Holo

¹¹ Aonu mae Jekop mae kmadi mare na ne cheke eghu ka mare, “Jame te eghu na, ghotilo na eghu agne. Hohono fafodu ka nomi gloi are keha gano te ulu fara ka namonoda tahati gne mala hata tei e namha ka mae funei na. Keha meresin, keha jurukuli, keha mur nei phei nafnata sitha te kiloni mare pistasio nei almond eghu.

Jenesis 43:11 ပူးပေါင်းရင်းမြစ်များ

Jenesis 37:25

Ke leghugna tela koko sorunihi mae Josep ka khora na, mare gnokro soru ne ghamu. Kate ghamu teu mare na, mare ne filodi vikegna mae Ismael re ne mei funudi Gilead mala tei Ijep. Nodi kamel re fodu ka wit nei meresin nei sedi mala ghiha ka thini eghu. Glepo igre mala tei sabiri ka kantri Ijep.

Profet Jeremaea 8:22

Kmana meresin au ka nohi Gilead, eghuteuna mae dokta aula jare. Eghume, naugna unha si nogu naikno iara igre te theome keli grea?

Profet Esikiel 27:17

“ ‘Maedi Juda baludi mae Israel foli famane glepo ka iagho ka soasopai nafnata famane wit, nei jurukuli, nei oliv oel, nei glepo mala ei oel nei insens.

Proveb 18:16

Jame te magnahaghei mei filoni iagho kaisei mae biꞌo na, iagho hata mei kaisei namha ka mana, mana ginauna kelitagna te mei iagho te filoni mana na.

Ululahu Samuel 9:7

Eghuteuna mae Sol ne cheke eghu, “Nu jame te tei tapa ka mana na, unha glepo gne nate tusu lao tapa ka mana na? Gognarona theo kaisei gano te au ka gloi tapa na.”

Mae Khuru 21:14

Ghehati theome tangomana ghami te cheke faꞌunha teu ka mana te mala tughu nagnafa mana na, aonu ghehati faꞌiho ghami kolho ne cheke eghu, “Unha te magnahagheni Lord na tuana ngala te mala eni na.”

Profet Esikiel 27:15

“ ‘Maedi ka moumolu Rodes baludi mae te au ka geri thongna mare ei bisnis balumu iagho, naugna mare foli kako ka iagho ka kheꞌi elefant nei gaju thubi, te kiloi eboni mala horo mumuju.

Famane Khoje 8:14

Kheraguo, Faghose mei ka iara! Iagho faghose mei jateula kaisei glepo tautagu te chari faghose fara ka thogele te au gaju te khakladi re famane sisiri fara!

Famane Khoje 4:10

Kheraguo, iagho khetogu iara. Nou namha iagho ranghi ghau iara na mamahe fara salaꞌuni famane waen, eghuteuna iara magnahagheni fara sisirimu iagho na salaꞌuni famane insens.

Proveb 21:14

Jame kaisei mae diꞌatagna ka iagho, iagho tufa glepo ka mana kate theo kaisei naikno te filo nigho na. Eghuteuna diꞌatagna mana igne ginauna hui.

Proveb 19:6

Kmana mae lase cheke famaemahe ka mae funei. Mae te kmanare magnahaghei fofodu ka mae ihei te tufa namha na.

Proveb 17:18

Mae te theome autagna glalase na, mana nhaꞌa cheke mala foli falehe nogna kaoni keha mae na.

Nodi Khoje Hatimare Mae Jiu 76:11

Tahati te gnafa na mala kafe mhaghuni hui noda Lord God. Ghotilo hui ka kantri te gnafa te au rhegna Israel mala tusu ranghini mana unha teke nhaꞌa chekedi ghotilo ka mana ra. Eghuteuna atha mei nomi namhare ka mana.

Nodi Khoje Hatimare Mae Jiu 72:10

Te keli na jame mae king gna Spen nei mae king di moumolu igre eghu ginauna mei tusu lao glepo mala namha ranghini mana. Jame te keli na phei mae king di Arebia ghe Itiopia gre mala hata mei glepo mala namha ka mana.

Nodi Khoje Hatimare Mae Jiu 68:29

Nolaghi igne jifla mei ka iagho ka sugamu Jerusalem, ka vido aheva hatimare mae king te hata mei namha ka iagho.

Nogna Buka Esta 4:16

“Iagho tei kilo fodudi naikno Jiu te gnafa te au ke lamnagna namono biꞌo Susa mala thosei ima nei koꞌu eghu nabagna thilo narane nei thilo bongi. Eghuteuna iara baludi nogu gaꞌase gloku te au balugu igre ginauna jaola na theome ima nei koꞌu eghu. Aonu ke leghudi thilo narane igre, neuba iara ne huhughuni vetula na, iara ginauna tei filoni king. Eghuteuna, neuba iara ne lehe, iara mala lehe ngala.”

Fapea Kings 20:12

Ka narane tuana, King Merodak-Baladan, thugna mae Baladan, ne king Babilon. Mana nomhini te fogra fara King Hesekaea igne. Aonu mana ne kurudi keha naikno baludi keha letas nei kaisei namha eghu mala tusu ranghini King Hesekaea.

Fapea Kings 8:8

Aonu king ne cheke eghu ka mae Hasael nogna mae gloku na, “Hata kaisei namha balumu tei thafoni mae nogna mae gloku God. Eghuteuna iagho toreni mana mala ghusna eghu ka Lord, ‘Ba, king gna Siria nake keli fapulo ka fogra igne ba theo?’ ”

Ululahu Kings 15:19

Aonu, King Asa ne fatei cheke ka mae King Ben-Hadad, ne cheke eghu ka mana, “Iara magnahaghei ghita tapa te fofodu jateula teke edi phei mae kmada tapa tifa ra eghu. Eghume, iara faꞌari ka iagho silva nei gol teu igre jateula kaisei nogu namha eghu ka iagho. Iara magnahaghei nigho iagho te ghatho ihoni u nhaꞌa cheke teke eni iagho balugna mae Basa king gna Israel ia. Jame te eni iagho igne na, mana ginauna na hata nogna armi na jifla kokoni nogu kantri iara gne.”

Ululahu Kings 10:25

Leuleghu finogha na naiknore hata mei namha ka King Solomon. Mare hata mei glepo te horo ka gol nei silva, famane pohe, glepo mala magra, sitha mala insens, hose nei dongki.

Ululahu Kings 10:15

Eghuteuna mana jaola hata sileni ka takis te foli hatimare mae bisnis ka mana, hatimare mae king di Arebia, nei hatimare mae gavana ka provins te gnafa Israel folini mana koba.

Ululahu Kings 4:21

King Solomon ne funei frunidi kantri te ikodi te gnafa funu ka Khoꞌu biꞌo Iufretis ke raru na tei posa Filistia ke mosu na, eghuteuna tei posa ka nohi Ijep ke mata. Eghuteuna kantri igre foli takis ka mana, nei au ke parigna nogna nolaghi mana kate karha teu mana na.

Ululahu Samuel 25:27

Iara atha mei keha glepo ka iagho funei maladi nou mae soldia iagho gre.

Diutronomi 33:14

Snakreni mana mala agha mei fakeli naprai na ka nomi nagare ghotilo are, eghuteuna leuleghu nhigra na nagare ghotilo are mala vuragha ka gano.

Jenesis 43:14

Iara toreni God mae ihei te nolaghi fara na mala toghoni gaoghathogna mae funei igne mala kokhoni ghami ghotilo. Iara toreni God mala snakredi mae Simion ghe mae Benjamin gre mala ke pulo mei balumi ghotilo. Nu jame teke gaoghathogna God teke mala hata fadeleidi mae thugu iara gre teku na, mare na hata fadeleidi ka iara.”

Jenesis 33:10

Aonu mae Jekop ne cheke eghu, “Theo! Thabusigna, te keli tamu iagho ka iara na, iagho hata glepo te tusu ari iara ka iagho are. Kate filodi iara tathamu nei foflomu teu iagho are, iara gne jateula te filodi eghu tathagna nei foflogna eghu God, naugna iagho ne keli tamu fara ka iara.

Levitikas 20:24

Nu iara neke nhaꞌa chekehi ka ghotilo te mala atha ghotilo nodi glose mare na. Uve, iara ginauna tusu ari ka ghotilo mala khotogna namono aheva glosegna na thofno keli fara, eghuteuna leuleghu fata na au kmana gano.” Iara Lord, nomi God ghotilo. Iara neke vahi ghami ghotilo neke hata fajifla ghami ka keha naikno re, mala nogu naikno iara.

Jenesis 43:10

Jame theome lhoti ghami iagho meuna, ghehati gne jame nabau ngala te tei nei ke pulo mei teu hi phia fata na.”

Jenesis 43:15

Aonu hatimare mae thugna mana re ne kafe hata glepo te mala namha re, eghuteuna sileni te hata mare gognaro na jateula te phei fata eghu thutagna na ka teke hata mare ka thei ulu lahu ia. Eghuteuna mare jaola ne hata mae Benjamin na baludi ne tei. Eghuteuna kate posa mare Ijep na, mare ne tei filoni mae Josep.

Jenesis 43:25

Kate nomhini mare mae Josep gne nate mei ima naublatha baludi na, mare ne tarabana nodi namha re mala tusu lao ka mana.

Jenesis 43:26

Kate posa mei mae Josep ka suga na, mare ne tusu lao nodi namha re ka mana. Aonu mare ne pogho soru pari ke ulugna mana.

Profet Esikiel 27:22

“ ‘Mae bisnis ka kantri Seba baludi mae bisnis ka namono Rama mae igre ei bisnis balumu iagho, naugna mare foli glepo keli ka iagho ka famane thina, nei gol, nei insens mala lilisei oel mala famane sisiri.

Eksodas 3:8

Eghume iara na soru mala fakarhidi ka nodi nolaghi naiknodi Ijep eghuteuna batu fajifladi ka namono igne. Iara ginauna athadi tei ka kaisei namono te krepa nei keli eghu, eghuteuna glosegna na thono keli fara, eghuteuna leuleghu fata na au kmana gano fara. Namono igne gognarona, vikegna Kenan, nei vikegna Hit, nei vikegna Amoa, nei vikegna Peres, nei vikegna Hivi, nei vikegna Jebus eghu te au teu tagna na.