Jenesis 1:28 - Buka Blahi Ka Cheke Holo

²⁸ God ne fablahidi ne cheke eghu ka repa, “Ghopa mala au sua kmana mala reireghidi glepo te gnafa te au ka nauthoglu na igre. Iara neke lilisei sasa nei nanghaji nei thua nafnata glepo te tautagu teu ka nauthoglu na igre mala reireghidi ghopa.”

Jenesis 1:28 ပူးပေါင်းရင်းမြစ်များ

Jenesis 9:1

Aonu God ne fablahini mae Noa baludi mae thugnare, ne cheke eghu, “Au sua kmana mala fodu nauthoglu gne.

Jenesis 9:7

God ne cheke eghu ka mae Noa, “Ghema Noa, iara magnahaghei ghami ghotilo te au thumi mala vuragha e thovu ka nauthoglu gne.”

Levitikas 26:9

“Eghuteuna iara ginauna fablahi ghami ghotilo, mala au kmana thumi ghotilo, jateula teke chekeni iara ka nhaꞌa cheke teke eni iara balumi ghotilo ia eghu.

Jenesis 1:22

God ne fablahidi ne cheke eghu ranghidi, “Ghotilo soasopaigna nafnata glepo te au ke lamnagna thongna na igre ginauna na vuragha mala fodu ke lamna thongna. Eghuteuna ghotilo nanghaji ra mala vuragha ke lamnagna nauthoglu igne.”

Profet Isaia 45:18

Lord na mana God mae ihei teke vuavuha maloa baludi gobigna lepo te au ke lamnagna, eghuteuna mana jaola neke eni famaku nauthoglu igne mala au fabrahu tifa tifa. Mana neke theome eni nauthoglu igne mala fiti au kolho neku, theo, mana neke eni nauthoglu igne mala au naikno tagna. Lord neke cheke eghu, “Iara ngala Lord na. Theo kaisei god ahevanga.

Jenesis 17:20

Iagho neke tore ghau iara mala fablahini mae Ismael. Uve, iara neke nomhinihi nou cheke iagho na. Iara ginauna na fablahini mana nei na tusu ranghini mana kmana sua eghu mala biꞌo vikegna mana na. Mana ginauna na kmadi nabotho phei mae king.

Jenesis 8:17

Hata jifla balumi glepo tautagu te gnafa nei nanghaji te gnafa teu te au ka vaka na igne. Thua nafnata glepo igre ginauna na kmana thudi nei ginauna na vuragha e thovu ka nauthoglu igne eghu.”

Nodi Khoje Hatimare Mae Jiu 107:38

Mana fablahidi koba naiknore, mala vuragha e thovu nei mala kmana nodi buluka eghu.

Ululahu Kronikols 4:10

Kaisei fata mae Jabes neke tarai eghu ka nodi God maedi Israel, “God, fablahi ghau nei tusu mei ka iara kmana vido glose. Iara tore nigho iagho mala au balugu iara, thosei snakreni kaisei hoholo mala thoke ghau iara mala theome haimini iara kaisei khabru.” Aonu God ne tusu ranghini mana gobigna lepo teke toredi mana igre.

Jenesis 26:24

Ka bongi tuana Lord ne thakle ka mae Isak ne cheke eghu ka mana, “Thosei mhaghu, iara nogna God mae kmamu iagho Ebraham. Iara neke eni kaisei nhaꞌa cheke ka mae Ebraham. Ka nhaꞌa cheke igne iara na au balumu iagho, nei fablahi nigho nei na fabruaradi eghu vikemu iagho gre.”

Jenesis 17:16

Iara ginauna na fablahini Sera nei tusu ranghini naꞌa kaisei mae thugna eghuteuna iagho ginauna mala kmagna mana. Sera ginauna mala idodi naikno te kmana re, eghuteuna kehare ginauna mala mae king.”

Jenesis 49:25

Mana na tusu ranghi nigho iagho glepo te keli funu kligna nei funu pari ke lamna thongna nei tusu ranghi nigho kmana vike eghu.

Jenesis 33:5

Mae Iso ne filo teidi gaꞌase te balu thudi re ne cheke eghu, “Iheire te mei balumu iagho igre?” Mae Jekop ne cheke eghu, “God neke fablahi ghau iara nou mae gloku iagho gne ne tusu mei sua igre ka iara.”

Jenesis 24:60

Kate namo jifla kokoni naꞌa namono na tharaknagna Rebeka re ne fablahini naꞌa, ne cheke eghu, “Gregaguo, iagho ginauna mala idodi thogha naikno ka nauthoglu igne. Eghuteuna vikemu iagho re ginauna na tapla sorudi mae naokare, nei na hata nodi namonore eghu.”

Nodi Khoje Hatimare Mae Jiu 69:34

Gobigna lepo te au ka maloa gne nei gobigna lepo te au ka nauthoglu igne eghu ghotilo cheke fakelini God. Uve, gobigna lepo te au ke lamna nhorora ra, ghotilo jaola cheke fakelini mana.

Thoutonu Eigna Mae Job 42:12

Aonu Lord ne fablahini mae Job eigna fapea vido ka nakarhagna mae Job, salaꞌuni vido ulu lahu ka nakarhagna mana na. Eghume gognarona mana au nabotho fati thogha sipu, eghuteuna namno thogha kamel, eghuteuna phei thogha buluka, eghuteuna kaisei thogha dongki.

Ululahu Timoti 4:3

Nafnata naikno igre cheke ka keha naiknore theome keli te tolaghi ba te ima kmana nafnata gano na. Nu God neke vuavuha gano igre mala ima tahati. Naugna tahati te fatutuani ni God nei laseni nogna cheke te tutuani na, tahati tangomana te ima gano igre balu kilo fafnaknoni God.

Nodi Khoje Hatimare Mae Jiu 8:6

Iagho neke vahi ghami mala funei frunidi nei reireghidi eghu gobigna lepo teke vuavuha iagho gre.

Jenesis 6:1

Kate karha te thovu fara naikno na ka nauthoglu igne, mare ne karha thudi gaꞌase.

Thoutonu Eigna Mae Job 39:11

Neuba ne nheta fara naꞌa, iagho theome tangomana te ronuni naꞌa thegna te mala edi nou gloku iagho re.

Nodi Khoje Hatimare Mae Jiu 8:7

Uve, sipu nei buluka nei bosu mhata

Nodi Khoje Hatimare Mae Jiu 115:16

Kligna na nogna namono Lord kolho, nu nauthoglu igne mana neke tusu ranghini naikno.