Jajis 16:28 - Buka Blahi Ka Cheke Holo

²⁸ Aonu Samson ne tarai, “Lord God, ghatho ghau iara. God, ke farheta ghau kaisei fata. Naiknodi Filistia igre bilo kokohi phei tathagu iara gre, eghume iara magnahaghei nigho iagho teke tughu fapulo unha teke eni mare ka iara na.”

Jajis 16:28 ပူးပေါင်းရင်းမြစ်များ

Profet Jeremaea 15:15

Aonu iara ne cheke eghu, “Lord, iagho lase fakelini nakarhagu iara na. Naikno igre para ghau iara fabrahu. Ghatho ghau nei reireghi ghau eghu iara sagho. Tughu fapulo sagho ka mare puhi te goigoni ghau iara fabrahu mare igne. Thosei faraugha te paradi mare na, na eghunu falehe ghau iara mare eghu. Filo sagho, mare cheke fadiꞌa ghau koba iara, naugna iara nou mae gloku iagho.

Nodi Khoje Hatimare Mae Jiu 143:12

Naugna te biꞌo iagho nou namha na ka iara gne, falelehe sagho nogu mae naoka iara gre, eigna mare goigoni ghau iara fara nou mae gloku gne.

Thakle 6:10

Tharunga igre ne eha eghu fabiꞌo ka God, “Lord, iagho thofno blahi fara nei tajini fabrahu nou nhaꞌa cheke na. Thosei faraugha te mala fate falehedi naiknogna nauthoglu igne. Eigna mare ne jafra fara. Gognaro na iagho mala paradi mare, naugna mare neke falehe ghami ghehati!”

Nodi Khoje Hatimare Mae Jiu 91:15

Kate kilo mei mare ka iara na, iara na cheke tughu ka mare. Nei iara ginauna au baludi kate thoke mei puhi ka mare na. Uve, iara na atha fajifladi ka puhi nei tusu ranghidi nafnakno.

Nodi Khoje Hatimare Mae Jiu 50:15

Eghume jame te eha ghotilo ka iara kate au ghotilo ka hoholo na iara na togho ghami ghotilo, eghuteuna ghotilo ginauna na pala hagheni nanghagu iara na.”

Fapea Timoti 4:14

Mae Aleksada, mae ihei te lase hohoro glepo ka aean gne edi kmana glepo diꞌa ranghi ghau iara. Lord ginauna nake tughu fapulo unha teke edi mana ka iara re.

Nodi Khoje Hatimare Mae Jiu 116:4

Aonu iara ne eha eghu lao ka Lord, “Lord God, fakarhi ghau.”

Fapea Kronikols 20:12

Nomi God, paradi sagho mare. Ghehati theome nheta te mala magra ka armi biꞌo te mei magra ka ghehati igne. Ghehati theome laseni unha nate eni na, nu ghehati filo ari ka iagho kolho te mala togho ghami na.”

Jajis 15:18

Samson roi koꞌu, eghuteuna mana ne tanhi eghu ka Lord, “Lord, God! Iagho togho ghau iara neke uludi soldia di Filistia, ba iagho magnahaghei ghau iara te lehe ka khamedi naikno bongihehedi Filistia igre?”

Jajis 5:31

“Lord God, snakredi nou naoka iagho re mala lehe jateula Sisera eghu! Nu snakredi iheire te namha nigho iagho igre mala phae jateula naprai te haghe hamerane ia eghu!” Eghume naiknodi Israel igre na au ka pharikeli nabagna phiatutu finogha.

Hibru 11:32

Eghume, na jare ghu gnafa iara. Iara theo nogu narane te mala tonudi ka ghotilo eigna mae Gidion, mae Barak, mae Samson, mae Jefta, mae Devet, mae Samuel nei hatimare mae profet.

Profet Jona 2:7

“Lord, iara ghatho nigho ka vido te namo lehe iara igne. Nogu tharai iara na ari posa ka nou Sugablahi iagho na.

Jajis 16:27

Sugablahi igne thofno fodu salaꞌui ka mae nalhaꞌu nei gaꞌase, eghuteuna mae funei te gnafadi Filistia re jaola au baludi mare. Eghuteuna sare ke tagru Sugablahi na, jame thilo thogha nalhaꞌu nei gaꞌase filo soru ka Samson ne maꞌeni mana.

Jajis 16:29

Aonu Samson ne loku kaisei khamegna ka kaisei khegra biꞌo eghuteuna keha khame na ka keha khegra biꞌo na neu ka Sugablahi na.

Nodi Khoje Hatimare Mae Jiu 10:12

God, mei sagho. Iagho mei mala fapuhini mae igne. Ghathodi sagho naikno te au kokhonidi igre.