Jajis 16:20 - Buka Blahi Ka Cheke Holo

²⁰ Eghuteuna naꞌa ne eha eghu, “Samson dofra haghe! Maedi Filistia igre la mei!” Aonu Samson ne dofra haghe. Kate dofra haghe na, mana ghaoghathogna na ne keli neu kolho na snagla teu nogna eghu. Nu mana theome laseni nogna nolaghi Lord tela tei kokonihi mana na.

Jajis 16:20 ပူးပေါင်းရင်းမြစ်များ

Ululahu Samuel 16:14

Aonu Tharunga gna Lord na ne theome au balugna king Sol. Eghuteuna Lord ne kuru tei kaisei naitu mala mhaghu mana.

Ululahu Samuel 18:12

Lord ne au balugna mae Devet, nu mana theome au balugna mae Sol. Eghume gognarona mae Sol mhaghuni fara mae Devet.

Josua 7:12

Naugna igne, ghotilo theome tangomana te tapla faparidi nomi naokare. Ghotilo rikhadi mare, naugna ghotilo themi teke eni papara te thoke ghami ghotilo igne. Eghume, ghotilo te gnafa na mala lehe. Jame theome kafe gnubra ghotilo glepo teke blau ghotilo ra meuna, iara ginauna theome tangomana te togho ghami ghotilo na.

Fapea Korin 3:5

Tutuani, ghehati theo kaisei nomi nolaghi themi te mala chekeni ghehati nabami si te mala eni gloku igne teuna. Nu God ngala te fatangomana ghami ghehati te mala eni gloku igne na.

Profet Hosia 7:9

Nu puhi te pogho soru ka mumuju naiknodi Israel igne khogla nhaꞌa faparidi kolho thedi, nu mare theome laseni unha puhi biꞌo nate thokedi mare na. Mae igre khuekuꞌehi la nufahi phaꞌudi re la glaꞌehi thinidi re, nu mare theome filo glanidi kolho thedi eghu.

Profet Isaia 42:24

Ba, ihei teke snakredi mae naoka igre te mei goigoni ni Israel nei blau nomi gobigna lepo ghotilo re teku ra? Lord thegna ngala teke snakre meidi re, naugna tahati neke theome leghudi puhigna nei nogna vetula teu mana re.

Jajis 16:14

Kate thuru teu Samson na, Delila ne haru fitu glopo khaklagna mana igre ka pohe teke horo naꞌare, eghuteuna fagefe lao ka gajugna masin te mala ei pohe na. Aonu naꞌa ne eha eghu, “Samson dofra haghe! Maedi Filistia tela mei igre!” Aonu mana ne kegra haghe, eghuteuna mana kaisei fata korho haghe kolho khaklagna re baludi gaju nei pohe eghu teke maku ka masin teke chakhi tagna khakla igre.

Matiu 17:20

Mae Jisas ne cheke eghu ka mare, “Ghotilo theome tangomana ghami te brue teini naitu na, naugna nomi fatutuani ghotilo na theome naba. Tutuani fara te chekeni iara ka ghotilo na, neubane ikoi fara jateula sisi gaju mastad neu nomi fatutuani ghotilo na, ghotilo na tangomana te cheke eghu ka thogele igne, ‘Jifla agne mala tei jare.’ Teu ghotilo na, thogele tuana ginauna thugha tei. Eghume ginauna theo kaisei glepo nate ninhigrana ranghi ghami ghotilo na.

Matiu 17:16

Iara neke hata meihi ka nou mae fanomho iagho gre, nu mare theome tangomanadi teke fakeli fapuloni mana na.”

Jajis 16:9

Naꞌa pophoru neu keha mae lamna ka chogho rhegna te au repa na. Eghuteuna naꞌa ne eha eghu, “Samson, kegra haghe! Maedi Filistia igre la jifla mei mala loki nigho iagho!” Nu Samson ne tungnu kusu phukri igre jateula phukri te khusu ka khaꞌaghi ra neu. Aonu mare theome laseni unha te eni te rheta fara mana tagna igne.

Jajis 16:3

Nu Samson thuru ne ghilei farihotei bongiro. Aonu mana kegra haghe, eghuteuna mana mei ne loku ka grengatha biꞌogna namono igne. Eghuteuna mana korho grengatha igne baludi phei kegra re, nei bibilakhigna grengatha igne. Aonu mana pala ne tei gobigna lepo igre delei ke kligna thogele ke mosu namono Hebron te khaba fara.

Diutronomi 32:30

Ghathodi nogu ghusna iara gre. Faꞌunha eghu tangomana kaisei soldia kolho te uludi kaisei thogha mae ka magra na? Faꞌunha eghu tangomana phei soldia kolho te ngolhi teidi nabotho thogha mae ka magra na? Ghotilo mala filo glani tuana: Glepo igne na thoke mei naugna Lord nomi vido keli mala poru ghotilo naiknomi Israel igne tei koko ghami ghotilo.

Naba 14:9

Eghume ghotilo thosei figri tagruni Lord! Ghotilo thosei mhaghudi naikno te au ka vido tuana, naugna mare theome naba ka tahati! Tahati ginauna goigonidi mare! Lord na au baluda tahati sia, eghuteuna mana la uludihi nodi god mare re, eghume ghotilo thosei nanga nomi eghu!”

Jajis 16:19

Delila ne fathuru soruni Samson ka phei ghahegna re, eghuteuna mana ne thofno thuru iho. Eghuteuna kate thuru iho teu mana na, kaisei mae mei ne kuchi fitu glopo igre ka khaklagna mana re. Aonu ka puhi igne naꞌa ne funu faparini mana, eghuteuna nogna narheta mana na ne tei kokoni mana.

Jajis 16:21

Aonu maedi Filistia igre mei ne lokini mana ne bilo koko phei tathagna mana re. Mare ne hata tei mana Gasa. Ka namono igne, mare ne haruni mana ka chen biꞌo teke horo ka bras, nei liseini mana ka suga sosolo. Eghuteuna nogna gloku mana na mala figri thina biꞌo mala ghorhu wit mala ei flaoa.

Ululahu Samuel 18:10

Kaisei narane ke leghugna igne, naitu teke kuru mei God ka mae Sol igne ne mei faheta fara ne jateula mae te nolinira neu mana. Aonu mae Devet ne jateula te sughu edi thegna leghu naranera neu ne atha nogna ghita na ne lalahu ka mana. Nu mae Sol ne atha kaisei jata ne cheke eghu ka gaoghathogna na, “Iara ginauna fadi jatani mae igne mala chakhi mana ka gringni ana.” Mana phia fata fariu riu fadi faleheni mae Devet, nu jata igre ne jafra kolho ka mae Devet.