Hibru 5:12 - Buka Blahi Ka Cheke Holo

¹² Ghotilo naikno khiloaumi funu tifahi, eghuteuna ghotilo jame nabamihi te velepuhi na. Nu nabagna na kaisei mae ke pulo mei mala farirhiu ghami ghotilo eidi glepo ulu lahu teke nomhidihi ghotilo eigna mae Kraes. Ghotilo jateula sua te chuꞌu teu kolho te theome naba te ghamu gano te maku ia eghu puhimire.

Hibru 5:12 ပူးပေါင်းရင်းမြစ်များ

Hibru 6:1

Naugna igne tahati mala tei faꞌulu ka farirhiu jateula gano te maku eghu eigna mae Kraes te nabadi goro naikno biꞌo. Eghuteuna lisa lao u nafnata farirhiu eigna mae Jisas Kraes jateula chuꞌu teu te nabadi goro sua kolho. Na eghunu farirhiudi koba tahati unha teke edihi tifeiro ra eghu. Tulao, lisa laodi u nafnata farirhiu te mala hogri nagnafa eidi glepo te mala batu ghita kau glehe, nei farirhiu te mala fatutuani ni God

Ululahu Pita 2:2

Nu ghotilo mala jateula sua gegeꞌe te karha majaghani te magnahaghei chuꞌu ia eghu kolho. Naugna ghotilo nabami na magnahaghei farirhiu te famane klino nei bligi eghu kolho. Eghuteuna ghotilo ginauna tangomana te kotu haghe ka farirhiu igne nei ginauna hata u thofno nakarha eghu.

Hibru 5:13

Mae ihei te magnahaghei chuꞌu na, mana khogla jateula mae sua eghu kolho. Naikno tuana theome filo glanidi ngau kolho u farirhiu eidi unha te keli ba unha te diꞌa.

Kolose 3:16

Snakreni chekegna mae Kraes na mala bruara fabrahu ke lamnami ghotilo u glalase te mala farirhiu nei farerheta eghu fari themi. Eghuteuna te keli na, ghotilo kilo fnaknoni God ka nagnafamire kate koje tharai ka Sam, himu, nei keha khoje te tusu ranghi ghami mae Tharunga te Blahi na.

Nodi Khoje Hatimare Mae Jiu 34:11

Ghotilo kheragu mae majaghani iara ra, ghotilo mei mala fanomho ka iara. Iara ginauna na farirhiu ghami ghotilo mala ghatho tahuni Lord.

Matiu 17:17

Mae Jisas ne cheke eghu, “Tore, ghotilo naikno gre theome fatutuani ni God kolho! Puhimi ghotilo re thono kafe jafra fara! Niha fata au fabrahu iara balumi ghotilo sia? Iara hongo ghau fara ka ghotilo! Hata mei ka iara agne mae sitei na!”

Profet Isaia 55:1

Lord ne cheke eghu, “Ghotilo mei ka iara! ghotilo iheire te magnahaghei koꞌu ra, mei koꞌu ka iara. Khoꞌu na au ngala. Ghotilo iheire te theo nomi sileni ra, ghotilo mei ka iara. Ghotilo mei atha gano ka iara mala ima. Ghotilo mei mala koꞌu milk nei waen, uve, neubane theo sileni mei kolho.

Esra 7:10

Lord ne toghodi naiknodi Israel, naugna Esra neke loku heta fara kate hiro posidi nei leghudi teu nogna Vetula Lord. Eghuteuna mana neke farirhiudi naiknodi Israel igre u vetula nei cheke teu te au ka buka vetula na igre.

Fapea Samuel 16:23

Ka narane tuare, gaoghathodi naiknore, u cheke te edi mae Ahitofel igre thofno keli fara neke mei funudi ka God. Neubane mae Devet ba mae Absalom thofno leghudi fara nogna cheke mae Ahitofel igre.

Ululahu Pita 4:11

Ihei ka ghotilo te toutonuni chekegna God na, mana mala toutonuni cheke teke tusu mei God ka mana kolho. Eghuteuna ihei ka ghotilo te toghodi naiknore, mana eni igne ka nanheta teke tusu ranghini God na. Ka nafnata gloku te keli igre, naiknore ginauna kilo fnaknoni God ka nanghagna mae Jisas Kraes. Nafnakno nei nolaghi biꞌo te au balugna God tifa tifa. Amen.

Ululahu Korin 14:19

Nu kate au iara baludi ka khiloau na, iara magnahaghei te farirhiudi. Eghume, neuba iara ne cheke kolho kaisei ba phei cheke te naba nomhini mare na, tuana te keli uluni jame te chekedi iara niha thogha cheke ka nafnata cheke igre.

Letas Teke Riso Tei Mae Pol Ka Khiloau Rom 3:2

Uve, puhidi mae Jiure keli fara, naugna glepo mala togho ghita ka thua nafnata puhi fateo. Glepo te ulu na igne: te laseni naikno te gnafare, chekegna God na neke tusu lao ka khamedi mae kuꞌeda tahati mae Jiura.

Mae Khuru 7:38

Mae Moses gne neke au nekeu baludi naiknodi Israel re khapru tekeu ka namono nagou na. Mana neke toutonu ranghidi mae kuꞌeda ra unha teke chekedi u engel igne ka mana ka Thogele Sanai na. Mana neke nomhini cheke te au karha tagna te mei funu ka God, eghuteuna ke tusu mei u cheke tuare ka tahati.

Nonomho Te Keli Teke Risoi Mae Mak 9:19

Mae Jisas ne cheke eghu, “Tore, ghotilo naikno gre theome fatutuani ni God kolho! Niha fata au fabrahu iara balumi ghotilo sia? Iara hongo ghau fara ka ghotilo! Hata mei ka iara agne mae sitei na!”

Filipae 3:1

Uve kheraguro, igre nogu farirhiu leghu lahu iara ka ghotilo re. Iara magnahaghei ghami ghotilo te mala au gleale'a balugna Lord. Eghume neuba neke riso arihi iara ka ghotilo cheke igre tifeiro, iara keli tagu ngala na teke riso ari ngala cheke igre ka ghotilo. Naugna nogu cheke iara igre ginauna togho ghami fara ghotilo, mala theome tangomana kaisei naikno te roꞌeni nomi fatutuani ghotilo na.

Profet Isaia 28:13

Naugna igne nogna cheke Lord na ginauna na jateula mae ihei te farirhiudi goro sua ikodi te mala chekedi glepo tuarola eghu fabrahu kolho. Igne na thono bligi fara te mala nomhi fakelini mare na. Nu neuba, mare na theome leghuni kolho farirhiu igne. Naugna igne, mare snoꞌo ke lamnagna nodi phighoro hatimare mae naoka, eghuteuna mare theome tangomana te rikha na.

Ululahu Korin 14:20

Kheraguro, puhimi ghotilo re mala klino jateula sua eghu. Thosei edi glepo te diꞌare. Nu ghotilo mala au jateula mae tela biꞌohi eghu ka puhimire ka khiloau gne, thosei ghaoghatho jateula mae sua eghu.

Galesia 4:3

Tifa na, tahati jateula tuana neku. U vetula nei gobi nafnata glepo ka nauthoglu igne neke reireghi ghita, naugna tahati neke theome laseni God.

Hibru 5:11

Kmana glepo ghehati te romi chekedi ka ghotilo eigna mae Melkisedek, nu ninhigrana fara te famane ruruthadire eghu, naugna ghotilo theome tangomana te ghosei te lasedire glepo igre.

Hibru 10:32

Ghotilo ke ghathoni unha teke eni tifa ia, ka narane teke kulu fatutuani ni ghotilo mae Kraes na. Kau narane tuare neuba neke para ghami fara, ghotilo heta ghemi neke theome mhaghu.