Hibru 12:15 - Buka Blahi Ka Cheke Holo

¹⁵ Fiofilo fakeli ghotilo ia mala theome kaisei naikno figri tagruni nogna namha te biꞌo God na. Na eghunu jateula kaisei gaju te fahoihoti ia eghu kaisei naikno ke lamnami ghotilo. Nafnata naikno tuana tangomana te goigonidi kmana naikno.

Hibru 12:15 ပူးပေါင်းရင်းမြစ်များ

Hibru 3:12

Eghume, kheraguro, fiofilo fakeli ghami ghotilo ia, na eghunu tei fajafra gaoghathomire mala theome fatutuani ni mae Kraes nei figri tagruni God mae ihei te nolaghi tulao na eghu!

Diutronomi 29:18

Eghume ghotilo fiofilo ghami eghuteuna thosei snakreni kaisei naikno mala figri thagrugna na ka Lord nomi God. Neuba kaisei mae, ba kaisei gaꞌase, ba kaisei tharakna, ba kaisei vikemi ghotilo, theo kaisei naikno te tangomana te tei tarai nei pogho soru ka nodi god keha naiknore. Theome keli kaisei ka ghotilo te biꞌo haghe jateula kaisei gaju te ure sisi poesen ra eghu.

Galesia 5:4

Ghotilo iheire te mala doglo nomi balugna God teu te fariuriu leghuni vetula na, Kraes na la theo nafugnahi ka gaoghathomire. Ghotilo la tei kokonihi nogna khokofakasai God na.

Fapea Korin 6:1

Ghehati kafe orio loku balugna God, eghume ghehati thofno tore ghami ghotilo mala ghatho tahuni u khokofakasai teke hata ghotilo ka God igne. Thosei lisa lao khokofakasai igne mala theo nafugna.

Fapea Jone 1:8

Fiofilo ghami, thosei jateula mare eghu. Nu ghotilo mala hata fahui nomi taba teke kmusani themi na.

Ululahu Korin 15:33

Thosei snakredi naiknore mala chaghi ghami eigna karha fapulo na. Eigna ghotilo lasenihi u cheke igne, “Jame te kaisei ghotilo baludi naikno te diꞌare, mare ginauna fadidiꞌa puhimi ghotilo te kelire.”

Fapea Pita 3:14

Uve kheraguro, kate ofoni teu ghotilo narane tuana, hatini nhetami na mala au ka pharikeli balugna God. Nakarhami ghotilo re mala keli fara, eghuteuna ghotilo mala doglo fara ke ulugna mana.

Hibru 4:1

Tutuani fara, God neke nhaꞌa soru nhaꞌa cheke igne mala tei gnafa tahati balugna mana. Eghume fiofilo ghitai eghu, na eghunu keha ka ghotilo theome ari thokeni namono mala gnafa na jateula mae Israel tifa ra eghu.

Ululahu Korin 5:6

Nomi fahaehaghe ghotilo eidi puhi te diꞌare theome doglo. Naugna ghotilo lasenihi cheke igne, “Katha isi ikoi kolho te mala fabiꞌodi bret te gnafare.”

Profet Jeremaea 2:21

Nu kaisei iara ngala teke lisei ghami ghotilo ka nogu glose na jateula mae ihei te joꞌu kaisei famane gaju grep te keli fara fuꞌagna na ia neku. Eghume, naugna unha si ghotilo te jateula grep nathuꞌa te raha fuꞌagna na ia teu gnea?

Proveb 4:23

Saghe leghu fakelini nagnafamu na, eigna nakarhamu iagho na jifla mei jare.

Hibru 4:11

Tahati fariuriu fara mala tei thoke ka namono igne mala gnafa tifa tifa balugna God. Na eghunu jateula teke edi mae tifa teke patugama ra eghu keha naikno ka tahati te figri tagruni God na, naugna mare neke theome thokeni namono tuana.

Fapea Korin 13:5

Ghotilo mala fariuriu ghami themi koba mala laseni ghotilo te thofno fatutuani ni Kraes ba theo. Tutuani, ghotilo thofno laseni mae Jisas Kraes te au ke lamnami na, na eghunu theome fatutuani ni mana ghotilo eghu!

Ululahu Korin 10:12

Eghume, ihei la kegra hetahi thegna ka fatutuani na teu ka gaoghathogna na, filo fakeli eghu, glahu uka kolho.

Ululahu Kings 14:16

Lord ginauna lisa koko ghita, naugna King Jereboam ne tapla jafra ka nakhibo, eghuteuna mana batudi naiknore mala jaola tapla jafra tahati ka nakhibo.”

Hibru 6:11

Ghehati magnahaghei ghami fara ghotilo hui te mala loku famaku ka nomi fatutuani na ghilei thoke mei narane leghu lahu na. Ka narane tuana ghotilo na athini unha teke ghatho branani ka nagnafami na. Thosei babaꞌo.

Diutronomi 32:32

Puhidi mae naoka gre diꞌa, jateula puhidi maedi Sodom ghe Gomora tifa ra neu. Mare jateula gaju grep te raha sisigna ra nei poesen teura eghu.

Diutronomi 4:9

“Nu fiofilo ghami eghu! Na eghunu ghatho ihodi ghotilo glepo tela filo tathamihi igre eghu. Leuleghu fata ka nakarhami re, ghotilo mala ghathodi glepo igre. Eghuteuna ghotilo mala farirhiudi thumi are nei grami te ikodi are eghu.

Fapea Pita 2:18

Mare fahaehaghedi fara eidi nodi cheke te theo nafudire. Mare batudi keha naiknore mala eni unha te diꞌa na ka thinidire. Ka puhi igre mare korho fapulodi naikno teke funu rikha kokodihi puhi te diꞌare.

Kolose 3:5

Eghume, kafe nhaꞌa fadelei ka nagnafamire puhigna nauthoglu te diꞌa igre, tulao: puhi gnognoro, puhi diꞌa te gnafa, puhi te sneka ka gaoghatho te diꞌa, nei puhi magnahaghei glepo te diꞌa. Eghuteuna ghotilo jaola nhaꞌa fadelei ka nagnafamire puhi te mamagnadi nodi glepo keha naikno gre, naugna puhi igne jateula te tufru soruni eghu mumuju.

Efesus 5:3

Nu te gnognoro ba eni te kaisei nafnata glepo te diꞌa ba mamagna teu igre, thofno theome naba ghotilo naikno blahi nogna God ra te edire.

Galesia 2:13

Eghuteuna keha mae Jiu te fatutuani ni mae Jisas ka namono tuana jaola leghuni mae Pita ka nafnata puhi te theome doglo igne. Eghuteuna mare jaola batu fadiꞌani mae Banabas ka nafnata puhi igne.

Ululahu Korin 13:8

Nogna namha mana ranghidi keha naiknore na theome gnafa. Nu nolaghi te mala toutonuni mana chekegna God na, ginauna hui nei nogna nolaghi te mala chekeni chekegna God ka soasopai nafnata cheke na ginauna hui, nei nogna glalase biꞌo eigna puhigna God na ginauna jaola hui.

Eksodas 32:21

Moses ne cheke eghu ka Eron, “Unha teke edi naikno gre ka iagho na mala batudi iagho ka nakhibo biꞌo te thono diꞌa fara igne?”

Fapea Pita 3:11

Eghume gobigna lepo ka nauthoglu gne ginauna groꞌe dofidi, na unha nafnata naikno ghotilo gognaro na? Ghotilo mala au blahi nei au ka nafnata nakarha te magnahagheni God.

Fapea Pita 1:10

Eghume, kheraguro, God neke kilo ghami nei vahi ghami mala nogna thegna. Hati nhetami na mala filo glani igne ka nakarhami na. Jame eni ghotilo igne na, ghotilo ginauna theome tangomana te tei kokoni u nabrou te tei thokei ka thofno nakarha te tutuani na.

Profet Isaia 5:7

Tutuani, nogna nagare grep Lord mae ihei te au nolaghi fateote'o igne, naiknodi Israel. Uve, ghotilo naiknomi Juda igre jateula kaisei nagare te thono magnahagheni fara ia eghu. Lord na thono rouronu fara ka ghotilo te mala fatedi keha naiknore ka puhi te doglo, nu ghotilo falehedi koba naiknore. Mana rouronu ka ghotilo te mala leghuni puhi te doglo na, nu ghotilo paradi koba naiknore eghu.

Profet Isaia 5:4

Iara la edihi gobigna lepore ka nogu nagare iara igne eghuteuna iara theome laseni unha nate eni tagna na. Kate tei mala hata sisi teu iara tagna na, iara ne filodi kolho sisi te diꞌare.

Josua 6:18

Nu fiofilo ghami eghu! Thosei hata kaisei glepo malami themi, naugna glepo igre mala gnubra fahui jateula kaisei fafara eghu ka Lord. Jame te eni ghotilo kaisei glepo te diꞌa na, Lord ginauna falehe ghami ghotilo.

Luku 22:32

Nu iara tarai eimu iagho mala theome blogho iagho ka nou fatutuani na. Eghuteuna kate figri mei iagho ka iara na, iagho ke toghodi mae kheramu are mala ke heta fapulo mare nodi fatutuani na ka iara.”

Taetus 1:15

Mae ihei te famane keli u gaoghathogna na ke ulugna God na mana filo glanidi gobigna lepo te kelire. Nu eigna mae ihei te theome keli ke ulugna God nu theome fatutuani ni mae Jisas Kraes teuna, mana theome tangomana te filo glani kaisei glepo te keli na. U nafnata naikno tuana au u gaoghatho te diꞌa nu u glalase eigna God na theome keli kolho ka mana.