Hibru 11:29 - Buka Blahi Ka Cheke Holo

²⁹ Naiknodi Israel gre neke fatutuani ni God. Naugna igne mare ne kasa ka khoꞌu biꞌo te kiloi “Thongna Ukru” neke nonolo jateula te tei kau glose te khapra neku. Nu kate fariuriu kasa ka khoꞌu tuana, armi gna Ijep mei toku tafrudi ne kafe knoho.

Hibru 11:29 ပူးပေါင်းရင်းမြစ်များ

Eksodas 14:13

Nu mae Moses ne cheke eghu ka naiknore, “Thosei mhaghu! Kegra heta eghuteuna ghotilo ginau na filoni Lord nate fakarha ghami ghotilo ka mae Ijep gre gognaro na! Ghotilo filodi mae Ijep are gognaro na, nu ke leghu na ghotilo ginau na nake theome filodi tathadire tifa tifa.

Nodi Khoje Hatimare Mae Jiu 78:13

God neke alha pea thongna na ka phei vido neke fakegra haghe jateula phei gringni thina biꞌo neku, eghuteuna hata fakasadi nogna naiknore ka keha phile na.

Josua 2:10

Ghehati nomhinihi thoutonu eimi ghotilo kate jiflami Ijep ia! Lord neke famojani Thongna Ukru na neke kasa ghotilo ka glose te moja. Eghuteuna ghehati jaola nomhinihi thoutonu eimi ghotilo te falehedi king Sihon ghe king Og, phei mae ka vikegna Amo te au ke maghati Khoꞌu biꞌo Jordan. Ghotilo neke falehedi phei mae igre baludi nodi naikno te gnafara.

Nodi Khoje Hatimare Mae Jiu 66:6

Tifa na mana neke fofota pea thongna biꞌo na neke khapra neke nonolo ka ghahe kolho neke kasa ka keha philegna khoꞌu na mae ku'eda tahatira. Ka narane tuare mae ku'eda tahatire neke thofno glealeꞌa fara ka unha teke edi mana igre. Eghume tahati glealeꞌa nei cheke fakelini eghu God.

Nehemaea 9:11

Eghuteuna iagho neke fota pea thongna na neke eni kaisei nabrou mala kasa nou naiknore ka glose te moja. Nu iheire teke ngolho leghudi nou naikno iagho re, mare ne knoho ka thongna te mamhara jateula thina te plulu ka nhorora ra neu.

Eksodas 14:22

Eghuteuna mae Israel gre ne kasa kate khapra na, aonu khoꞌu na ne kegra jateula bara neu ka phei philere!

Eksodas 14:27

Aonu hamerane boibongi, mae Moses ne tusu lao khame na ke kligna thongna, eghuteuna thongna na neke pulo mei ka mala augna na jateula teke tifa ia neu. Hatimare mae Ijep ra ne fariuriu rikha, nu faꞌiho theome tangomana, naugna Lord ne haglu laodi mare lamna thongna.