Galesia 6:14 - Buka Blahi Ka Cheke Holo

¹⁴ Nu iara theome fahaehaghedi nafnata glepo tuare. Iara ginauna tangomana te fahaehagheni kolho nogna gaju fafatha noda Lord Jisas Kraes. Naugna ka glehegna mana na, puhigna nauthoglu na theo nogna nolaghi te mala funei fruni ghau iara na. Iara tirogu leghuni fabrahu puhigna na.

Galesia 6:14 ပူးပေါင်းရင်းမြစ်များ

Letas Teke Riso Tei Mae Pol Ka Khiloau Rom 6:6

Tahati laseni fara igne. Nakarhada tifa na tahati jateula te tupijuru eghu balugna Kraes ke kligna gaju fafatha, mala tangomana God te roꞌeni nogna nolaghi nakhibo teke au ka nakarhada tifa na. Ka puhi igne nakhibo na theo kaisei nogna nolaghi te mala funei fruni ghita na.

Galesia 2:20

Faꞌunha? Eigna iara jateula tela lehehi eghu balugna mae Kraes ke kligna gaju fafatha. Neubane eghu ngau, iara karhau ngala naugna mae Kraes te au ke lamnagu iara. Iara fatutuani ni mae ihei teke namha ghau iara nei lehe tughu ghau iara.

Ululahu Korin 2:2

Naugna kate ari ka ghotilo ia, iara neke magnahaghei toutonu eigna mae Jisas Kraes nei glehegna ke kligna gaju fafatha eghu kolho. Tutuani, iara theome magnahaghei toutonu keha glepo delei ka ghotilo.

Filipae 3:3

Neubane eghu ngau, tahati nogna naikno God gre thofno laseni gaoghathogna tohi fagaglana. Naugna nogna Tharunga te Blahi God na te togho ghita tahati te mala pogho soru ranghini mana na. Tutuani, tahati gleale'a te kaisei balugna mae Jisas Kraes. Jaola theo kaisei noda fatutuani ka unha te eni ka thinida na.

Letas Teke Riso Tei Mae Pol Ka Khiloau Rom 1:16

Tutuani, iara theome mamajani te toutonuni u Nonomho te Keli na, naugna Nonomho te Keli na nogna nolaghi God mala fakarhidi gnafa iheire te fatutuani ni mana. Ulu lahu na mana fakarhidi naikno Jiu iheire te nomhini igne, eghuteuna ke leghu na mana jaola fakarhidi iheire te theome Jiu.

Galesia 5:24

Naikno te leghuni mae Jisas Kraes re mare neke tupijuruni hi puhi te diꞌa fateo te magnahagheni naiknogna nauthoglu gne baludi gaoghatho te diꞌa fateo te magnahaghei eni unha te diꞌa.

Ululahu Korin 3:21

Eghume ghotilo theome naba te cheke fahaehagheni unha te eni naikno na! Tutuani fara, gobigna lepore nomi ghotilo.

Ululahu Korin 15:58

Eghume kheraguro, naugna igne ghotilo kegra heta ka nomi fatutuani na nei thosei snakreni kaisei glepo mala ngali tafri ghami. Ghotilo mala rugusi fabrahu ka nogna gloku Lord na. Naugna ghotilo lasenihi nomi gloku ranghini Lord na theome tangomana te fiti luvu kolho.

Profet Esikiel 28:2

“Maegna ka nauthoglu. Cheke ranghini mae funei gna Taea iara Lord God te cheke igne: Iagho kaisei mae fahaehaghe fara cheke eghui, ‘Iara jateula kaisei god eghu, eghuteuna iara gnokro ka chea ka nogu nolaghi, aheva thongna te faligoho ghau iara. “ ‘Nu neuba iagho ne cheke eghu, iara jateula kaisei god eghu sia neu, iagho kaisei maemu ka nauthoglu igne kolho, eghuteuna iagho theome kaisei god.

Galesia 1:4

Mae Jisas neke snakreni thegna mala lehe tughudi nakhibodare mala snagla tahati ka puhi te diꞌa te funei frunini nauthoglu igne. Tutuani fara mae Jisas neke eni igne, naugna igne unha teke magnahagheni God Kmada na.

Ululahu Korin 1:23

Nu tahati toutonu eigna Kraes kolho, mae ihei teke lehe ke kligna gaju fafatha. Hatimare mae Jiu theome magnahaghei nomhini u thoutonu igne, eghuteuna ka hatimare mae te theome Jiure u thoutonu igne theo nafugna kolho.

Letas Teke Riso Tei Mae Pol Ka Khiloau Rom 6:2

Theo fara! Tahati jateula mae te lehehira eghu theome eni kaisei nakhibo. Teuna, faꞌunha si tahati te au fabrahu teu ka nafnata puhi igne?

Fapea Korin 11:12

Keha naiknore magnahaghei fara te mala fahaehaghedi thedi nei chekeni koba nodi glokure te kaisei nanaba ka ghehati mae khuru gre teuna. Nu iara magnahaghei te mala fanogradi mare ka igne. Naugna igne, iara leghuni fabrahu kolho puhigu thegu na.

Nodi Khoje Hatimare Mae Jiu 52:1

Iagho mae biꞌo te nheta fara kau magra ia, naugna unha sagho te fahaehaeghedi fara puhi te diꞌa grea? Eigna puhigna God te keli ranghini naikno na au fabrahu tifa tifa.

Luku 20:16

Mana ginauna tei ka nagare na mala falehedi mae greireghi nagare igre. Aonu mana ginauna snakre lao nagare na ka keha mae greireghi nagare delei mala reireghi mare.” Kate nomhini naiknore cheke naba igne, mare ne cheke eghu, “Theo, theome jateula tuana eghu!”

Galesia 2:17

Ghehati fatutuani ni God mala fadogli ghami eigna ghehati nogna mae Kraes. Nu jame naiknore cheke eghu, “Mae Jiu gre jateula naikno te theome Jiu gre eghu huhughuni nogna vetula mae Moses na sigre!” Ba, mae Kraes na neke togho ghami ghehati mala huhughuni vetula na sia? Theo, theome tutuani!

Galesia 2:19

Nu iara tirogu leghuni vetula na naugna iara gognaro na thofno laseni vetula te theo kaisei nolaghi te mala fakarhi ghau iara ka nakhibo na. Eghume ka vetula na iara la lehehi.

Galesia 3:21

Ba, vetula na cheke faparini nogna nhaꞌa cheke God na sia? Theo fara! Nu jame neke tusu meihi God kaisei vetula te tangomana te mala hata meini thofno karha na ka naiknore meuna, naiknore tangomana hi te doglo na kate leghuni vetula igne.

Filipae 3:18

Iara chekeni igne ka ghotilo, naugna kmana naikno chekeni koba ne fatutuani ni mae Kraes teuna, nu theome tutuani eghu, naugna nakarhadire thono diꞌa fara ngala. Iara neke chekehi ka ghotilo eidi naikno igre tifeiro. Eghuteuna iara gognaro na nake chekei ngala ka ghotilo balu tanhi eidi naikno igre, naugna mare naoka eigna gaju fafatha nogna Kraes.

Kolose 2:20

Ghotilo jateula igne eghu, kate lehe mae Kraes na, ghotilo jaola lehe balugna mana. Eghuteuna mana neke fakarha ghami ghotilo ka nogna nolaghi nauthoglu. Ba, naugna unha si ghotilo te leghuni teu ngala nogna vetula nauthoglu te cheke eghu, “Ghotilo thosei loku ka glepo igne,” “Ghotilo thosei ghamu ana,” “Ghotilo thosei habo ka glepo ana” teu gnea?