Fapea Pita 3:10 - Buka Blahi Ka Cheke Holo

¹⁰ Nu narane mala ke pulo meigna noda Lord na ginauna megei nga mei jateula kaisei mae te mala mei blau te theome laseni tahati narane meigna na ia eghu. Eghuteuna ka narane tuana kaisei naogla biꞌo na mei ka maloa na, eghuteuna maloa na ginauna luvu. Eghuteuna kaisei khaꞌaghi biꞌo ginauna ghamu fateo gobigna lepo te au ke lamnagna maloa na. Nauthoglu igne ginauna jaola dofini baludi gobigna lepo te au ke lamnagna re.

Fapea Pita 3:10 ပူးပေါင်းရင်းမြစ်များ

Thakle 21:1

Ke leghu na, iara ne filoni kaisei nauthoglu majaghani balugna kaisei maloa majaghani, nu theo kaisei nhorora te au teu jare na. Eghuteuna nauthoglu balugna maloa teke kulu au ra ne dofidi.

Matiu 24:35

Maloa ghe nauthoglu igre ginauna hui kolho, nu chekegu iara na ginauna na theo ka huigna.”

Fapea Pita 3:7

Nu ka chekegna God tuana la, maloa ghe glose te au teu gognaro gre na ofoniu kolho khaꞌaghi na mala nhako. Maloa ghe glose gre na ofou ghilei thoke mei narane God nate fatedi naikno te diꞌare, eghuteuna kafe faluvudi iheire te theome leghuni mana na.

Thakle 16:15

Aonu mae Jisas ne cheke eghu, “Fanomho fakeli! Tutuani, iara ginauna nake pulo mei ka ghotilo ka narane te theome ghathoni ghotilo na jateula kaisei mae te blau te mei ka narane te theome ghathoni naiknore. Mae ihei te tarabana teu teke pulo mei iara na, mana ginauna gleale'a fara kate filo ghau iara na. Mana jateula kaisei mae te ofoni teu ke pulo meigna mae kheragna na. Mana ginauna pipichi, dofrau nei gleale'a eghu kate filoni mana na. Jame te tarabana teu iagho teke pulo mei iara na, iagho na theome mamaja nou kate filo ghau iara na. Tutuani, iagho theome mamaja nou jateula iheire te soesole teu ka glalaba na ia eghu.”

Profet Isaia 51:6

Ghotilo filo haghe kligna, eghuteuna ghotilo jaola filo ka nauthoglu igne. Maloa igne ginauna dofini jateula khoveo eghu, eghuteuna nauthoglu igne ginauna thono diꞌa fara jateula kaisei pohe te thona eghu. Eghuteuna naiknore ginauna kafe lehe jateula sisimi eghu. Nu puhigu iara te mala toghodi nei atha fapulodi teu naiknore ginauna theome gnafa.

Ululahu Tesalonika 5:2

Ghotilo thofno laseni fara eigna theo kaisei naikno te laseni. Narane mala ke pulo meigna Lord tuana ginauna farhanidi naikno jateula kaisei mae blau te mei bongiro ia eghu.

Nonomho Te Keli Teke Risoi Mae Mak 13:31

Maloa ghe nauthoglu gre ginauna na hui kolho, nu chekegu iara na ginauna na theo ka huigna.”

Fapea Pita 3:12

Kate ofoni teu nogna narane biꞌo God igne, ghotilo loku heta mala faghose mei narane igne. Ka narane tuana khaꞌaghi na ginauna ghamu fateo maloa na, eghuteuna gobigna lepo ka maloa na ginauna branadi ghilei blalho kolho.

Profet Isaia 34:4

Naprai, glaba, nei nathunu teu ka maloa na are ginauna dofidi, eghuteuna maloa gne ginauna pipiri jateula vido pepa eghu. Eghuteuna nathunure ginauna khoko soru funu kligna jateula khakla grep ba gaju fig te moja ra eghu.

Thakle 3:3

Eghume thosei ghatho ihodi famane cheke teke farirhiu mare ka ghotilo ra. Ghotilo famane leghu fakelidi, nei lilisei puhimi te diꞌare eghu. Nu jame te theome ghaoghatho fakeli ghotilo na, iara ginauna ari posa ka ghotilo. Ghotilo ginauna theome laseni niha nau na teke mei iara na, naugna iara ginauna mei jateula kaisei mae te mala mei blau ia eghu.

Luku 12:39

Nu ghotilo laseni igne, jame mae khotogna suga na laseni narane te mala meigna mae mala blau na, mana ginauna filo fakeli eigna mana theome snakreni nogna suga na mala ruma mana.

Nodi Khoje Hatimare Mae Jiu 102:26

Gobigna lepo igre ginau hui, nu iagho themu ngala nate au fabrahu na. Uve, gobigna lepo igre ginauna na theome raugha diꞌa jateula pohe tiatifa te koko teke tughu kate majaghani ra eghu.

Thakle 20:11

Aonu iara ne filoni kaisei nogna sape nafnakno biꞌo mae King te vegha fara na, eghuteuna iara jaola filoni mae te gnokro teu tagna na. Eghuteuna nauthoglu ghe maloa re ne rikha kokoni mana ne dofidi.

Profet Nahum 1:5

Kate thakle mei mana na, thogele biꞌo te gnafa igre ginauna nghali tongana. Eghuteuna gukhu ikodi te gnafa igre ginauna ngali nei blalho eghu. Eghuteuna nauthoglu igne baludi iheire te au ke lamnagna igre ginauna mhaghu balu fififri.

Profet Joel 2:31

Naprai gne ginauna romno soru, eghuteuna glaba gne ginauna ukru jateula dadara eghu. Aonu ke leghugna igne, Nogna Narane Lord te mala fatedi naiknore igne ginauna thoke mei. Igne kaisei narane te mala mhaghuni naiknore.

Profet Emos 9:5

Lord God, mae ihei te au nolaghi fateote'o, mana tangomana te habo kolho ka nauthoglu nei glose teu igre mala nghali, eghuteuna naikno te gnafa re ginauna diꞌanagnafa nei tanhi eghu. Ginauna na jateula kaisei nakheu eghu na nghali tongana namono te gnafa ka kantri igne, eghuteuna glose igne ginauna haghe nei soru eghu jateula Khoꞌu biꞌo Nael te britha biꞌo ra eghu.

Ululahu Korin 5:5

Ka narane te salo fodu tuana, tahati lisa laoni mana ka khamegna mae Satan mala roꞌeni thinigna mana na. Ka puhi igne God ginauna tangomana te fakarhini tharunga gna mana na ka narane gna noda Lord na.

Profet Maeka 1:4

Tutuani, thogele igre ginauna blalho, jateula kadele te au rhegna khaꞌaghi eghu. Mare ginauna thofa soru pari ke lamna glogu, jateula khoꞌu te loloro soru funu ka thogele ro.

Profet Isaia 24:19

Glose igne ginauna nghali tongana ghilei bagra pea, eghuteuna ginauna au glave biꞌo tagna.

Nodi Khoje Hatimare Mae Jiu 97:5

Ka tathagna Lord nodi mae funei naikno te gnafa ka nauthoglu igne na, thogelere ne blalho jateula kadele te nhaꞌa lao ka khaꞌaghi ra neu.

Profet Emos 9:13

Lord neke cheke eghui, “Kaisei narane, glose igne ginauna nake keli, eghuteuna gano re ginauna kmana fara ke lamna nagare, eghuteuna naiknore ginauna theome naba nate hata fahuidi re. Jaola ka narane tuana, sisidi gaju grep re ginauna kmana fara, eghuteuna mae nalhaꞌure ginauna theome naba nate ei waen tagna na. Eghuteuna mare tangomana te ei kmana waen fara te jateula kholodi sisi igre te thofa soru ka geri thogele na te pila glose naia eghu.” Igne nogna cheke Lord.

Profet Joel 2:1

Nogna Narane Lord te mala fatedi naiknore la namohi gognarona. Eghume, ghotilo kufli nei belo eghu ke kligna Thogele blahi Saion mala kulu laseni naiknore. Eghuteuna naikno te au ka kantri Juda igre ginauna mhaghu nei fififri eghu ka narane igne.

Profet Joel 1:15

Naugna nogna narane Lord te mala fatedi naiknore ginauna ninhigrana fara. Narane igne la namo meihi, eghuteuna Lord mae ihei te au nolaghi fateoteꞌo igne ginauna mei goigoni fahui gobigna lepo ka nauthoglu igne.

Profet Isaia 2:12

Ka narane tuare, Lord mae ihei te au nolaghi fateote'o igne ginauna nhaꞌa faparidi iheire te fahaehaghe.

Letas Teke Riso Tei Mae Pol Ka Khiloau Rom 8:20

Ke leghugna te vuavuha God glepo igre mana neke tughu glepo igre mala theo nafudi. Glepo igre theome magnahaghei mala eghu neku thedi, nu leghuni gaoghathogna God na. Eghuteuna God laseni igne eigna thogheiro na mana ginauna fasnagladi gobigna lepo ka nauthoglu gne ka nolaghi te goigonidi gobigna lepo igre. Eghuteuna gobigna lepo igre ginauna majaghani kligna, jateula tahati goro thugna God gre ginauna jaola majaghani ka nakarha te ulu tulao.

Profet Malakai 4:5

“Nogu narane biꞌo iara na ginauna mei, eghuteuna naiknore ginauna mhaghu nodi fififri fara kate thokei meigna narane igne. Nu ulu lahu na iara na kuru meini mae profet Elija ka ghotilo ame thoke mei nga narane te mala fatedi naiknore.

Profet Joel 3:14

Kmana thogha naikno ginau khapru mei pari agne, naugna nogna Narane Lord na la namo meihi. Uve, ka narane tuana, mana ginauna fatedi naikno te gnafa te au ka namono igne.

Nodi Khoje Hatimare Mae Jiu 46:6

Kate diꞌatagna God te fnaja fabiꞌo jateula fila teuna, naikno bongihehe ka nauthoglu gne ginauna blalho jateula khoꞌu eghu. Eghuteuna naiknore ginauna mhaghu nodi fara kate nghali te diha nodi namono na.

Letas Teke Rioriso Mae Jud 1:6

Eghuteuna ghotilo ke ghatho fapulo dila hatimare mae engel. God neke tusu ranghidi nolaghi biꞌo. Nu keha ka mare theome magnahagheni nolaghi igne ne rikhani nodi famane namono nafnakno na. Aonu God ne reridi ka chen te maku ne koko laodi ka namono te romno fara na. Mare na ofou ka namono tuana ghilei thokeni narane biꞌo te mala fatedire.

Ululahu Tesalonika 5:4

Nu kheraguro, ghotilo theome au kate romno. Eghume narane tuana ginauna theome farhani ghami ghotilo jateula kaisei mae te mei ka suga na te mala blau.

Fapea Pita 3:11

Eghume gobigna lepo ka nauthoglu gne ginauna groꞌe dofidi, na unha nafnata naikno ghotilo gognaro na? Ghotilo mala au blahi nei au ka nafnata nakarha te magnahagheni God.

Thakle 6:14

Eghuteuna u maloa na jaola ne pipiri jateula khifra neu ne tei delei. Eghuteuna thogele te gnafa nei moumolu te gnafa teure ne riu fadelei ka mala au dire.