Fapea Korin 6:14 - Buka Blahi Ka Cheke Holo

¹⁴ Ghotilo nhogri ka iheire te theome fatutuani, eghume thosei fariuriu loku baludi. Eigna unha te keli na theome tangomana te loku fodu ka unha te diꞌa na. Eghuteuna u naphae na theome tangomana te au fodu ka gromno na.

Fapea Korin 6:14 ပူးပေါင်းရင်းမြစ်များ

Ululahu Korin 15:33

Thosei snakredi naiknore mala chaghi ghami eigna karha fapulo na. Eigna ghotilo lasenihi u cheke igne, “Jame te kaisei ghotilo baludi naikno te diꞌare, mare ginauna fadidiꞌa puhimi ghotilo te kelire.”

Ululahu Korin 10:21

Theome naba ghotilo te koꞌu ka nogna hinao Lord na nei jaola koꞌu ka nogna hinao naitu na. Eghuteuna ghotilo theome naba la te ima ka nogna tevo Lord na nei jaola ima ka nogna tevo naitu na.

Jemes 4:4

Ghotilo te tei kokoni God na, ghotilo ginauna na jateula kaisei gaꞌase te tei kokoni khetogna na te mala au fodu balugna kaisei mae delei ngau ia eghu. Ghotilo theome lasenihi igne? Mae ihei te magnahagheni kolho glepo te diꞌa ka nauthoglu igne na, mae tuana nogna mae naoka God. Naugna mae ihei te magnahaghei leghuni kolho nogna gaoghatho naiknogna nauthoglu igne na, mana theome tangomana te leghuni gaoghathogna God na.

Levitikas 19:19

“Ghotilo mala leghudi nogu vetula iara gre. “Ghotilo thosei snakreni kaisei nafnata glepo tautagu mala ei sua ka keha nafnata glepo tautagu te jafra. “Eghuteuna ghotilo thosei joꞌu phei nafnata khatu ka kaisei nagare kolho. “Eghuteuna ghotilo thosei pipichi pohe teke horo mare phei soasopai glepo jateula ghajo ghe wul.

Ululahu Korin 5:9

Ka letas teke riso ari iara ka ghotilo tifei ia, iara neke chekehi ka ghotilo mala thosei fofodu baludi iheire te tapla jafra ka nakhibo are.

Ululahu Kings 18:21

Profet Elija kegra ke uludi naiknore ne cheke eghu, “Niha fata au tami si ghotilo phei nafnata gaoghatho igre ia? Jame Lord gne te God tutuani na, leghuni mana, nu jame Baal gne te god tutuani na, leghuni mana.” Nu naiknore ne theome ghagri kaisei cheke.

Proveb 22:24

Iagho thosei fren ka mae te diꞌatagna fara na, eghuteuna iagho thosei au balugna mae te ghosei te diꞌatagna na.

Filipae 2:15

Nu au fadelei ka glepo te diꞌare, mala nu theo kaisei naikno te filoni kaisei najafra ka ghotilo na eghu. Ghotilo ginauna mala goro thugna God eghu mala theo kaisei najafra tami. Nu ghotilo ginauna au ngala kau nauthoglu igne baludi naikno te thono diꞌa fara puhidi are. Uve, ghotilo mala jateula u nathunu te phae kate romno ka maloa na ia eghu ka mare.

Profet Malakai 2:11

“Ghotilo naiknomi Juda huhughuni nhaꞌa cheke teke eni tahati balugna God. Uve, ghotilo Jerusalem nei keha vido te gnafa ka kantri igne edi glepo te thono diꞌa fara. Ka puhi te tolaghi ghotilo ka gaꞌasedi keha kantri delei te pogho soru te tarai ka mumuju, eghuteuna ghotilo mei ne eni puhi te diꞌa na ka nogna Sugablahi Lord.

Proveb 29:27

Naikno te doglore theome magnahaghedi naikno te diꞌare. Eghuteuna naikno te diꞌare theome magnahaghedi naikno te doglore.

Nodi Khoje Hatimare Mae Jiu 119:63

Iara kaisei loku fodu baludi iheire te ghatho tahu nigho re, nei iheire te leghudi nou famane cheke iagho re.

Jone 7:7

Naiknogna nauthoglu igne mare na theome diꞌa tadi ka ghotilo. Nu ka iara na mare diꞌa tadi fara, naugna iara ne cheke thakledi u puhidi mare te diꞌare.

Profet Malakai 2:15

“Nu kate eni repa nhaꞌa cheke igne, God loku fodudi repa mala jateula kaisei thini nei kaisei gaoghatho eghu ngala repa. Naugna unha si God te eni ignea? God neke eni igne mala au sua vuragha ghotilo neku, eghuteuna goro sua igre mala goro thugna God. Eghume ghotilo mala reireghi fakelini nakarhagna thegna na, thosei huhughuni nhaꞌa cheke teke eni ghotilo ka narane teke loku fodu ghami God.

Ululahu Korin 7:39

Gaꞌase tholaghi na mala au fabrahu balugna khetogna na. Nu jame te lehe khetogna na, naꞌa tangomana teke tolaghi ka ihei te magnahagheni naꞌa na, eghu jame te kaisei mae khiloau mana na.

Eksodas 34:16

Glahu atha ghotilo thudi gaꞌase mare tuare mala tolaghi ka thumi nalhaꞌu re, ka nafnata puhi igre, goro gaꞌase tuare ginauna korho thumi nalhaꞌu ghotilo tuare mala tei koko ghau iara mala tei leghudi nodi god naikno bongihehe igre.

Nodi Khoje Hatimare Mae Jiu 16:3

Nogna naikno God ka nauthoglu igne thofno keli fara. Iara thofno keli tagu fara te au nogu baludi mare.

Esra 10:19

Mare ne nhaꞌa cheke mala koko khetodire. Eghuteuna naugna eidi nakhibodire, mare hata kaisei sua sipu mala fafara ka God.

Fapea Kronikols 19:2

Ka narane tuana kaisei profet, nanghagna na mae Jehu thugna mae Hanan, mana tei ne thafoni King Jehosafat, ne cheke eghu ka mana, “Ba? Ka gaoghathomu iagho na, puhi doglo te tei toghoni iagho mae te diꞌa na nei fofodu balugna mae ihei te tirognani Lord na teuna? Uve, Lord na diꞌatagna fara ka iagho eigna glepo igne!

Mae Khuru 4:23

Mae Pita ghe mae Jone ne jifla ka nodi faidu hatimare mae biꞌodi Jiure neke tei ka nodi tothoghei thedi na. Phiamare ne toutonu ranghidi gobigna lepo teke chekedi hatimare mae pris biꞌo nei hatimare mae funei ka phiamare re.

Jenesis 24:3

Iara magnahaghei nigho iagho te mala nhaꞌa cheke ka nanghagna Lord God, mae ihei te fnakno kligna nei pari teu igne. Thosei hata kaisei gaꞌase agne Kenan ka kantri te au teu iara igne te mala khetogna mae thugu iara mae Isak gne.

Ululahu Korin 6:6

Nu ghotilo magnahaghei te tei toreni mae bongihehe na te mala fadoglini puhi teke eni kaisei mae ranghini keha mae thabusigna ka khiloau na!