Fapea Korin 12:9 - Buka Blahi Ka Cheke Holo

⁹ Nu Lord neke cheke eghu ka iara, “Nogu khokofakasai iara igne ngala te nabamu iagho na, naugna kate nigra iagho na, nogu nolaghi iara na heta fara!” Eghume iara gleale'a fara te cheke fahaehaghe eigna nogu nanigra na, eghuteuna nogna nolaghi Kraes na tangomana te au balugu iara na.

Fapea Korin 12:9 ပူးပေါင်းရင်းမြစ်များ

Filipae 4:13

Iara tangomana te edi glepo igre, naugna mae Kraes mae ihei te au nolaghi na te togho ghau iara na.

Fapea Korin 12:10

Eghume iara gleale'a fara kate papara naugna iara nogna mae Kraes. Tutuani, kate nigra na, kate cheke fadiꞌa ghau na, ba ka vido te ninhigrana ba ka vido te au papara, ba ka thua nafnata hoholo fateo, iara gleale'a fara naugna ka vido igre Kraes tangomana te tusu mei ka iara nogna u nolaghi biꞌo na.

Efesus 3:16

Iara toreni God ka nogna nafnakno biꞌo kligna mala snakre meini nogna Tharunga te Blahi na ka ghotilo, mala tangomana ghotilo te heta ka nagnafamire.

Josua 1:9

Iara la chekehi ka iagho. Eghume iagho kegra heta, thosei mhaghu, ba suaraghi. Naugna aheva te tei iagho na, iara Lord nou God ginauna au balumu iagho fabrahu.”

Profet Isaia 43:2

Kate thoke mei puhi biꞌo ka ghotilo jateula te kasa ghotilo ke lamna nhorora ra teuna, iara ginauna au balumi ghotilo mala togho ghami ghotilo. Eghuteuna kate au ghotilo ke lamnadi narane te ninhigrana te jateula te kasa ghotilo ka khoꞌu biꞌo te britha ra teu igne, ghotilo ginauna theome kmerhu. Uve, kate thoke mei puhi biꞌo te jateula te tapla ghotilo ke lamna khaꞌaghi ra teuna, ghotilo ginauna na theome nhako.

Ululahu Korin 10:13

Gobigna lepo te mei fariuriu ghami ghotilo igre, nafnata glepo thoke dila naikno te gnafare. Nu God ginauna theome ghatho ihoni nogna nhaꞌa cheke te mala togho ghami na. Tutuani, mana ginauna theome snakreni kaisei fariuriu mala funei frunini nomi nolaghi ghotilo na. Naugna kate thoke mei ka ghotilo fariuriu na, God ginauna togho ghami ghotilo mala tangomana ghotilo te kegra heta na. Aonu, God ginauna jaola tusu ranghi ghami kaisei nabrou te mala gnafagna u fariuriu tuana.

Hibru 4:16

Naugna igne tahati thosei mhaghu te mei ka God Kmada mae ihei te kokhoni ghita. Mana ginauna na kokhoni ghita nei lolokeli ghita, eghuteuna mana ginauna na tusu meini nogna namha te mala togho ghita ka vido te magnahaghei tothogho na.

Fapea Korin 12:5

Eghume iara na cheke fahaehaghe ka unha teke eni ka iara na. Nu iara ginauna theome cheke fahaehaghedi kmana glepo teke edi ka nakarhagu na nu iara ginauna cheke fahaehaghedi glepo te falaseni te mae nigra kolho iara na.

Ululahu Korin 15:10

Nu ka nogna khokofakasai God iara theome fiti au gognaro na. Theo. Nogna khokofakasai na togho ghau iara te mala nogna mae gloku God. Naugna iara loku heta fara ke uludi keha mae khurure, nu theome nogu gloku iara thegu. Nogna khokofakasai God te au balugu iara na mala togho ghau iara.

Ululahu Korin 2:5

Eghume ghotilo fatutuani naugna ghotilo ne filoni nogna nolaghi God na, theome naugna te nomhini ghotilo nogna glalase naikno kolho.

Kolose 1:11

God te au nolaghi biꞌo fateote'o, eghuteuna ghehati tarai ka mana mala tusu ranghi ghami nolaghi igne mala tangomana ghotilo te kegra heta ka unha puhi biꞌo te mei ke uluda.

Luku 21:15

Naugna iara ginauna na tusu ari ka ghotilo glalase te mala chekedi kmana glepo te theome tangomana nomi mae naoka ghotilo re te cheke fapari ghami ghotilo ne jafra ghotilo teuna.

Fapea Korin 11:30

Jame te cheke fahaehaghe iara gognaro na, iara ginauna cheke fahaehaghe eidi kolho glepo te falaseni te nigra iara na.

Ululahu Timoti 1:14

Nu mae Jisas Kraes noda Lord neke bruara khokofakasai te biꞌo ke klignagu iara eghuteuna tusu ranghi ghau iara fatutuani nei namha maladi naiknore.

Profet Sefanaea 3:17

God, nomi Lord ghotilo na au balumi. Nogna nolaghi mana na ginauna togho ghami mala uluni ghotilo magra na. Lord ginauna kelitagna ka ghotilo, eghuteuna nogna namha na ginauna tusu ranghi ghami nakarha majaghani. Aonu mana ginauna koje jateula naikno te gleale'a te koje ka narane biꞌo ra eghu.”

Nodi Khoje Hatimare Mae Jiu 8:2

Goro sua nei gegeꞌe teu igre jaola cheke fakelini nanghamu iagho na. Iagho au ka vido te keli te theome tangomana nou naoka nate ari te magri nigho na. Eghuteuna naikno te tirodi leghudi nou cheke iagho re, mare theome tangomana te ari te goigoni nigho na.

Matiu 28:20

Nu farirhiudi mala leghudi mare gobigna lepo te chekedi iara ka ghotilo ra. Ghotilo laseni, iara ginauna na au balumi ghotilo fabrahu ghilei thoke ka huigna nauthoglu igne.”

Matiu 28:18

Ka narane igne, mae Jisas mei ne cheke eghu ka nogna mae fanomho re, “Mae Mama snakre meihi ka iara nolaghi te gnafa kligna nei pari.

Profet Isaia 11:2

Eghuteuna Tharungagna Lord na ginau mei au ka mana mala tusu ranghini gaoghatho te keli nei glalase. Tharunga igne ginauna tusu ranghini mana cheke te keli nei nolaghi mala funei fruni. Tharunga gna Lord na ginauna au balugna mana, mala batuni mana. Eghuteuna Tharunga igne ginauna toghoni king mala laseni unha Lord te magnahagheni te mala laseni mana na, nei mala ghatho tahuni mana.

Fapea Korin 12:15

Eghume iara thofno gleale'a fara te tusu ari ranghi ghami gobigna lepo te au ka iara igre nei jaola snakreni thinigu na mala togho ghami ghotilo. Ba, ghotilo ginauna namha faꞌikoi ghau iara kolho, naugna te namha ghami fabiꞌo fara iara gne?

Fapea Kings 2:15

Glimafulu mae profet di Jeriko ne filoni unha te eni mae Elisa ka narane igne. Eghuteuna mare ne cheke eghu, “Tore! Nolaghi te mala cheke jateula mae profet Elija teuna la meihi ka mae Elisa!” Aonu mare tei ne thafoni mana, eghuteuna mare ne pogho soru pari ka glose na ne fafnaknoni mana.

Ululahu Korin 2:3

Kani teke ari posa iara ka ghotilo mala toutonu teku ia, iara neke nigra fara nei mhaghu neku eigna glahula theome magnahaghei ghau iara ghotilo.

Fapea Korin 12:1

Iara mala cheke fahaehaghe fabrahu, neubane theome tangomana te togho ghita na. Iara na chekedi mifi nei glepo teke poru eghu te fatakle Lord ranghi ghau iara re.