Fapea Kings 19:1 - Buka Blahi Ka Cheke Holo

¹ Kate nomhini King Hesekaea nodi ripot mare igne, mana diꞌanagnafa gna fara ne rerheku nogna pohe na. Mana pipichi ka pohe thona ne tei ka nogna Sugablahi Lord na.

Fapea Kings 19:1 ပူးပေါင်းရင်းမြစ်များ

Fapea Kings 18:37

Aonu mae Eliakim, mae Sebna nei mae Joa eghu ne thofno diꞌa nagnafadi fara ne rerheku nodi pohere. Aonu thilo mare tei ka King Hesekaea ne toutonu ka mana gobigna lepo teke chekedi mae komanda gna Asiria igne.

Ululahu Kings 21:27

Kate nomhini King Ehab nogna cheke mae Profet Elija igre, mana diꞌanagnafa gna fara ne rerheku nogna pohe na. Eghuteuna mana ne pipichi kolho ka pohe te thona kolho. Mana tirogna ghamu ne nolo tafri balu diꞌanagnafa.

Jenesis 37:34

Mae Jekop ne tanhini mae thugna na ne rerheku nogna pohe na, eghuteuna mana ne hata kaisei nabreku pohe te tiatifa ne pipichi, igne fagaglana gna te diꞌanagnafani mae thugna na. Kmana narane mana ne tanhi ni mae thugna na.

Matiu 11:21

Mana ne cheke eghu, “Puhi biꞌo ka ghotilo naiknomi ka namono Koresin! Puhi biꞌo ka ghotilo naiknomi ka namono Betsaeda! Naugna ghotilo ne tiromi leghuni chekegna God. Kofubobhoi te edi iara ka ghotilo ra, jame edi ka namonodi mae bongihehe Taea ghe Sidon gre meuna, mare jame gnokrohi pari balu pohe thapa nei ghiha nakrofuhi eghu ka thinidire, fagaglana gna tela tughu nagnafahi nei koko nakhibohi teuna.

Profet Jona 3:8

Tahati mala pipichi pohe thona, eghuteuna haru tafru ka pohe thona noda buluka ra. Eghuteuna tahati te gnafa na mala tarai heta ka God, eghuteuna tahati mala koko puhida te diꞌa gre.

Profet Jeremaea 36:24

Kate nomhidi mae king cheke igre, baludi nogna mae biꞌo re, mana jaola theome mhaghu, nei jaola theome rerheku nogna pohe na neu, fagaglana gna nogna diꞌanagnafa na.

Nodi Khoje Hatimare Mae Jiu 35:13

Nu iara theome jateula mare eghu. Thono theo fara. Kate fogra mare na iara pipichi pohe thona nei theome ghamu eghu, fagaglanagna nogu diꞌanagnafa eidi mare na. Eghuteuna iara neke tore nigho iagho mala toghodi mare.

Esra 9:3

Kate nomhini igne, iara thono diꞌanagnafagu fara ne rerheku nogu pohe na, eghuteuna iara rarathu khakladi phaꞌugu nei gremohogu teure, aonu iara tei ne gnokro pari naugna iara ne thono faꞌiho ghau fara.

Fapea Kings 6:30

Kate nomhini king cheke igne, mana ne diꞌanagnafa gna fara ne rerheku nogna pohe na. Aonu kate nolo tafri mana ke kligna gna bara thina gna namono na, naikno te au rhegna bara thina igne ne filoni king te pipichi pohe thapa eigna nogna diꞌanagnafa na.

Fapea Kings 5:7

Kate iuꞌiju king gna Israel letas igne, mana diꞌatagna ne rerheku nogna pohe na. Mana ne cheke eghu, “Kaisei puhi biꞌo signe! King gna Siria gne na fagnafani iara fogra mana igne eghu ka gaoghathogna na, nu iara theome God. Iara theo nogu nolaghi te mala fakarhini ba te mala faleheni naikno na. Iara laseni, mana magnahaghei te hironi kaisei nabrou te mala magra ka iara na kolho.”

Ululahu Kings 21:29

“Ba, iagho filoni King Ehab tela nhaꞌa faparini thegna gognarogne? Naugna tela nhaꞌa faparini thegna mana ke ulugu iara igne, iara ginauna theome eni kaisei puhi biꞌo mala thokeni mana kate karha teu mana na. Nu puhi biꞌo igne ginauna thokedi vikegna manare ka narane te king thugna mana na.”

Ululahu Samuel 4:12

Kaisei mae ka tharaknagna mae Benjamin teke rikha ka magra na, mana ne tei posa Saelo ka narane tuanala. Mana ne rerheku nogna pohe na ne ghiha glose ka phaꞌugna na fagaglana te diꞌanagnafa na.

Matiu 26:65

Kate nomhini igne, mae pris biꞌo na ne rerheku nogna phoko na, naugna mana diꞌatagna fara. Aonu mana ne eha eghu fabiꞌo, “Tore! Mae igne cheke faparini God! Gognarona tahati theome magnahaghei keha thoutonui eigna mana. Naugna ghotilo nomhinihi themi mana cheke faparini God.

Thakle 11:3

Eghuteuna ke lamnadi narane igre, iara ginauna tusu lao nolaghi ka phei nogu mae profet igre mala toutonuni phiamare chekegna God na. Phiamare ginauna pipichi pohe pipito teke hohoro ka khakla nanigot, fagaglana gna nodi diꞌanagnafa na.”

Profet Isaia 37:37

Aonu King Senakerib baludi nogna naikno te karha teure ne jifla ka namono igne neke pulo Ninive.

Profet Jona 3:5

Naiknodi Ninive igre ne fatutuani ni chekegna God igne ne tughu nagnafa. Neubane mae nafnakno ba theo, mare te gnafa na ne theome ima. Eghuteuna mare ne pipichi ka pohe thona, fagaglana eigna nodi diꞌanagnafa na.