Esra 9:1 - Buka Blahi Ka Cheke Holo

¹ Ke leghudi glepo igre, keha mae lida mei ne filo ghau iara ne cheke eghu, “Esra, hatimare mae pris nei mae Livaet nei naiknodi Israel teu igre mare theome au fadeleidi thedi ka puhidi naikno bongihehe te thono diꞌa fara te au faligoho ghita tahati igre. Mare leghudi puhidi naiknodi Kenan, nei naiknodi Het, nei naiknodi Peris, nei naiknodi Jebus, nei naiknodi Amon, nei naiknodi Moab, nei naiknodi Ijep nei naiknodi Amo.

Esra 9:1 ပူးပေါင်းရင်းမြစ်များ

Nehemaea 9:2

Iheire teke karha mei ka vikegna Israel kolho te kegra ka vido igne, eghuteuna theo kaisei mae ka keha vikere te au baludi mare na. Mare cheke thakledi nakhibodi re baludi puhidi kuꞌedi te diꞌa tifa ra.

Eksodas 33:16

Jame te theome tei iagho balumi ghehati na, faꞌunha eghu laseni naiknore te tei iagho balumi ghehati na? Nu jame te au iagho balumi ghehati na, keha naiknore ginauna laseni te ghehati gne nhogriu ka keha naikno ka nauthoglu igne.”

Profet Jeremaea 26:16

Nu mae biꞌo mala baubatu igre baludi keha naiknore ne cheke eghu ka mae pris nei ka mae profet teure, “Mae igne chekeni koba ka tahati nanghagna Lord noda God. Theome keli tahati te faleheni mae igne na!”

Profet Jeremaea 26:10

Kate nomhini igne, nodi mae mala baubatu mae Jiu igre ne kafe jifla mei ka nogna suga king na. Mare mei ka Sugablahi igne ne gnokro soru ka nodi sape mala fate te au rhegna grengatha te kiloi mare Grengatha Majaghani.

Profet Isaia 52:11

Jifla mei ka namono Babilonia! Jifla mei ka namono te diꞌa tuana! Thosei haboni kaisei glepo te thona ka tathagna God. Ghotilo mae te atha te mei glepo te blahi ka sugagna Lord ra, ghotilo mala jifla mei ka namono tuana, eghuteuna ghotilo mala gae ka tathagna God.

Nehemaea 4:3

Aonu mae Tobaea mae biꞌogna Amon igne kegra haghe rhegna mana ne cheke eghu, “Gringni thina te loku mare tuana theome maku! Jame apla haghe kaisei sua khuma ikoi ke klignagna meuna, ginauna tangomanau kolho nate grofo na sana ia tore!”

Esra 10:8

Mare lilisei nabagna thilo narane te mala mei mare ka faidu igne. Eghuteuna te chekeni mare na jame mae ihei te theome mei ka narane igne na, mare ginauna hata koko gobigna lepo teke khotodi mana re, eghuteuna nhaꞌa fadeleini ka naiknodi Israel.

Fapea Kronikols 33:2

Mae king igne neke edi puhi te diꞌa re ka tathagna Lord na. Mana neke leghudi puhi te diꞌa teke edi naikno bongihehe tifa, iheire Lord teke khi fajifladi ka nodi namono naiknodi Israel.

Ululahu Kings 11:1

King Solomon magnahagheidi fara kmana gaꞌasedi keha kantri are. Ulu lahu na mana tolaghi ka thugna gaꞌase king gna Ijep, eghuteuna mana tolaghi ka keha gaꞌase ka vikegna mae Het, nei gaꞌase di Moab, Amon, Idom, nei Saedon.

Diutronomi 18:9

Mae Moses ne cheke eghu, “Kate tei ghotilo ka glose aheva Lord nomi God teke tusu lao ka ghotilo na, ghotilo thosei leghudi puhidi naikno te diꞌa te au ka vido tuana.

Naba 23:9

Kate kegra iara ka thogele goro na, iara tangomana filodi mare. Uve, iara filo fakelidi mare kate kegra iara ka thogele na. Mare au kolho thedi. Mare laseni eigna te naikno blahi thedi ke tulaodi keha naiknore.

Levitikas 18:3

Tifa na ghotilo neke au Ijep, eghuteuna gognarona iara hata ghami ghotilo tei Kenan, nu ghotilo thosei leghudi puhi te diꞌa te edi naiknodi phei kantri Ijep ghe Kenan.

Eksodas 23:23

Nogu engel iara na ginau na baubatu ghami ghotilo tei au ka nodi namono hatimare mae Amo nei hatimare mae Hit nei hatimare mae Peres nei hatimare mae Kenan nei hatimare mae Hivi nei hatimare mae Jebus, iara ginau na thofno paradi fara mare.

Eksodas 13:5

Lord na neke kulu nhaꞌa chekehi ka mae kuꞌemi ghotilo tifa ra te mala atha mei ghami ghotilo ka nodi glose hatimare mae Kenan, hatimare mae Hit, hatimare mae Amo, hatimare mae Hivi nei hatimare mae Jebus. U glose igne thofno keli fara te mala karha gano na. Eghume kate atha ari ghami Lord ka vido glose igne na, ghotilo mala eni Gaghamu biꞌo eigna Bret te Theo Isi gna na leuleghu finogha ka nhigra Abib.

Jenesis 15:16

Gramu iagho re ginauna na theome ghosei ke pulo mei ka namono igne. Mare nake pulo mei ka namono igne kate thokeni mare fati phagusu na. Naugna naiknodi Amor gre ginauna kulu edi kmana glepo te diꞌa fara ka namono igne. Ke leghugna igne, iara ginauna na paradi nei kuru fajifladi eghu naikno tuare ka namono igne.”

Nehemaea 4:7

Nu kate nomhini mae Sanbalat ghe mae Tobaea baludi naiknodi Arebia, nei naiknodi Amon, nei naiknodi Asdod teu tekela babana fapulo ghehati vido ka gringni thina gna namono Jerusalem teke groꞌe igne, mare ne thono diꞌatadi fara.

Nehemaea 13:23

Keha glepo te filoni iara ka narane igne. Ulu lahu na, kmana maedi Juda tolaghi ka gaꞌasedi Asdod, nei Amon, nei Moab.

Profet Malakai 2:11

“Ghotilo naiknomi Juda huhughuni nhaꞌa cheke teke eni tahati balugna God. Uve, ghotilo Jerusalem nei keha vido te gnafa ka kantri igne edi glepo te thono diꞌa fara. Ka puhi te tolaghi ghotilo ka gaꞌasedi keha kantri delei te pogho soru te tarai ka mumuju, eghuteuna ghotilo mei ne eni puhi te diꞌa na ka nogna Sugablahi Lord.

Naba 25:6

Aonu mae Moses baludi naiknodi Israel re ne kegra ke ulugna Suga Thapuale te blahi na ne loku ka tanhi na. Ka vido tuana, kaisei mae ne tathalei ne mei gaꞌase ka vikedi mae Midian re ka nogna suga thapuale thegna na, nu naikno te gnafare ne kafe filoni mana.

Diutronomi 7:1

Aonu mae Moses ne cheke eghu, “Lord, nomi God ghotilo na ginauna hata ghami ghotilo tei mala hata glose ka vikegna mae Het, nei ka vikegna mae Gigas, nei ka vikegna mae Amoa, nei ka vikegna mae Kenan, nei ka vikegna mae Peris, nei ka vikegna mae Hivi, nei ka vikegna mae Jebus. Mana ginauna ngolhi fajifladi keha naikno te au ka glose igne. Eghuteuna neuba fitu vike igre ne nheta ulu ghami ghotilo,

Diutronomi 23:8

Gradi nafnata mae igre au nogna nolaghi te mala au ka kaisei nodi faidu nogna naikno Lord.”

Josua 23:12

“Ghotilo laseni igne, jame te figri tagruni nei theome leghuni teu ghotilo Lord te loku fodu baludi naikno bongihehe are ba tolaghi ka thudi gaꞌase mare re, ba snakredi mare mala tolaghi ka thumi gaꞌase ghotilo re, Lord ginauna tirogna togho ghami ghotilo. Eghuteuna jame te fofodu ghotilo ka naikno bongihehe are nei tei magra baludi mare teuna, Lord ginauna tirogna ngolhi fajifladi naikno bongihehe te au ka nomi namono ghotilo are. Jame te loku fodu ghotilo ka puhidi mare te thono diꞌa fara are na, mare ginauna na jateula kaisei phighoro eghu mala fakhale ghami ghotilo. Eghuteuna ghotilo ginauna na jateula te snoꞌo ke lamnagna kaisei khora ra eghu. Eghume puhidi mare te diꞌa tuare ginauna para ghami ghotilo jateula te puphuri naikno ka thagrumi ghotilo ra eghu, ba jateula nila te churu ka tathami ghotilo ra eghu. Eghuteuna ginauna na theo kaisei naikno ka ghotilo nate au ka namono teke tusu arihi mana ka ghotilo igne.

Fapea Kronikols 8:7

Ka narane igre, naiknodi Israel gre hata namono te gnafa te au ka kantri igne, eghuteuna mare neke theome aknu falehe naikno teke kulu au ka namono te gnafa ke lamnagna kantri igne. Naikno igre vikedi mae Het, mae Amo, mae Peris, mae Hivi, nei mae Jebus. Eghume naikno te au teu ka nodi namono maedi Israel gognaro igre theome naiknodi Israel. Aonu King Solomon ne huhurudi naikno igre ne loku fabrahu Israel jateula naikno sneka neu. Mana ne lilisei phei gobi glimafulu maedi Israel mala reireghidi mae sneka igre. Eghuteuna mana theome magnahaghedi mae Israel gre te loku jateula sneka teuna. Mana magnahaghedi mae Israel te mala soldia nei komanda ka armi. Eghuteuna kehare mala funeidi mae te loku ka chariot nei mae soldia te saghe ka hose.

Esra 10:2

Aonu mae Sekanaea, thugna mae Jehiel vikegna mae Elam igne ne cheke eghu ka mae Esra, “Tutuani fara, ghehati la huhughuni chekegna God na kate tolaghi ghehati ka gaꞌase bongihehe igre. Nu neuba ngau, tahati au noda grouronu eigna God ginauna theome goigoni ghita tahati naiknoda Israel.