Eksodas 29:21 - Buka Blahi Ka Cheke Holo

²¹ Iagho atha keha dadara te au kligna olta, eghuteuna ngigno balu katha oel blahi, eghuteuna iagho thoghei fuafusa lao ka mae Eron, nei ka nogna pohe blahi mana re. Eghuteuna iagho jaola thoghei fuafusa ka thugna mana re baludi nodi pohe blahi re. Eghuteuna ka puhi igne, iagho ginauna fablahini mae Eron nei thugna mana re, baludi nodi pohe blahi mare.

Eksodas 29:21 ပူးပေါင်းရင်းမြစ်များ

Hibru 9:22

Tuani fara, te mala leghuni vetula na, teke fuafusa mare dadara na thogra glepo te gnafare te mala gae ke ulugna God. Te theome thofa dadara na, God ginauna theome atha fadelei nakhibodi naiknore.

Levitikas 8:30

Aonu mae Moses ne atha katha oel blahi balugna katha dadara teke lilisei ka olta na, eghuteuna mana fuafusa thoghei ne tei ka mae Eron nei ka nogna pohe mana re, nei ka thugna neu nodi pohe teu mare re. Ka puhi igne, mana ne taofidi mare balu nodi pohe.

Eksodas 29:7

Eghuteuna iagho atha oel blahi igne mala tofa ka phaꞌugna mana na mala taofini mana.

Eksodas 29:1

Lord ne cheke eghu ka mae Moses, “Igne unha nate eni iagho kate taofidi mae Eron nei thugna manare teu te mala loku mare nogna gloku mae pris na ranghi ghau iara. Iagho mala atha kaisei sua buluka nalhaꞌugna nei phei sipu nalhaꞌudi te theo kaisei thona ka thinidire.

Hibru 10:29

Te eghu na, unha nate eni God ranghini mae ihei te filo soruni Thugna God na? Unha nate eni God ranghini mae ihei te filo soruni dadaragna mae Kraes teke horoghoto ka nogna nhaꞌa cheke God na ngala nate fagaeni mana ka nakhibo na? Unha nate eni God ranghini mae ihei te filo soruni mae Tharunga te Blahi te falalase nogna namha na ka mana? Mae igne nabagna na mala au papara fara!

Jone 17:19

Iara na fablahi ghau thegu mala loku ranghi nigho iagho, mala tangomana langau mare te thofno blahi fara te mala loku ranghi nigho iagho na.”

Nodi Khoje Hatimare Mae Jiu 133:2

Nafnata puhi te au fodu igne thofno keli fara, jateula teke eni mare kani teke taofini mae Eron ia eghu. Mare neke tofa oel te siri keligna na ka phaꞌugna mana na, eghuteuna oro me soru ka gremohogna nei pohegna teku mana ra.

Levitikas 14:29

Vido oliv oel au teku ka khame gne mana igne tofa lao ka phaꞌugna mae tuana. Ka puhi igne, mana ginauna eni mae tuana mala klino ka tathagu iara na.

Eksodas 29:20

Iagho aknu falehe sipu tuana eghuteuna atha katha dadara tagna, eghuteuna ghiha lao keha dadara ka khukru khuli fei khame nhetagna mae Eron, nei jaola ka thugna mana re. Eghuteuna iagho ghiha lao dadara igne ka geghesu biꞌo fei khame nhetadi mare, eghuteuna jaola ka geghesu biꞌo fei ghahe nheta. Aonu iagho atha dadara teke salaꞌui igne mala fuafusa ka fati khukrugna olta na.

Eksodas 29:22

“Fapea sipu igne, fafara mala taofi mae pris. Iagho vavahe garofa gna sipu igne, balu sekogna te au kmana tagna na, eghuteuna garofa igre thafru lamna ka thiꞌagna na. Eghuteuna iagho atha famane vido ka khebugna na, nei phei chauchau gna balu garofadi, nei grege ghahe fei nhetagna.

Levitikas 8:23

Mae Moses aknu falehe sipu igne ne atha keha dadara ne tihi lao fei khuli nhetagna mae Eron, nei ka geghesu biꞌo fei khame nhetagna, nei ka geghesu biꞌo fei ghahe nhetagna.

Levitikas 7:35

Funu ka narane mae Moses teke fablahini mae Eron baludi mae thugna re te mala nogna pris Lord na, Lord neke vahi fadeleihi phei nafnahi igre malagna mae Eron balu goro thugna.