Eksodas 23:1 - Buka Blahi Ka Cheke Holo

¹ Mae Moses ne cheke soru ka naiknore chekegna Lord na, ne cheke eghu, “Kate tei ka fate na, ghotilo thosei toutonu chaghi ranghini ihei unha glepo te theome tutuani na, ba toghoni mae ihei te diꞌa puhigna na.

Eksodas 23:1 ပူးပေါင်းရင်းမြစ်များ

Nodi Khoje Hatimare Mae Jiu 101:5

Iara ginauna fakmudi iheire te cheke pouporu te magnahaghei goigonidi nanghadi keha naiknore. Eghuteuna iara ginauna khidi iheire te fahaehaghe fara.

Proveb 19:5

Te chaghi ka fate na, iagho ginauna au papara. Te chaghi fabrahu na, iagho ginauna theome snagla.

Eksodas 20:16

“Thosei vuavuha cheke ranghini ihei.

Nodi Khoje Hatimare Mae Jiu 35:11

Naikno te diꞌa igre mare fathoro mei ka iara keha puhi te diꞌa teke theome edi iara re.

Diutronomi 5:20

Thosei vuavuha cheke ranghini kheramu fofodu na.

Levitikas 19:16

“Eghuteuna ghotilo thosei cheke fadiꞌani ba chaghi eigna ihei. Eghuteuna jame kaisei kherami tei ka kot, eghuteuna iagho laseni unha teke eni mana na, iagho mala cheke fajiflani igne ka kot eigna puhi te tutuani na mala toghoni mana. Naugna iara Lord.

Thakle 12:10

Aonu iara ne nomhi kaisei cheke funu kligna, ne eha eghu fabiꞌo, “Gognaro na noda God la fakarha ghitahi! Mana ne falalasehi ka tahati nogna nolaghi te mala funei frunidi gobigna lepore, nei jaola falalasehi nogna Kraes te au nolaghi te mala funei frunidi. God la koko sorunihi mae Satan ka nauthoglu igne, mae ihei teke fathoro chaichaghidi naikno khiloaure ke ulugna God bongi narane.

Letas Teke Riso Tei Mae Pol Ka Khiloau Rom 3:8

U nafnata cheke tuana jateula cheke igne eghu, “Tore, tahati na eni fabrahu puhi te diꞌa na. Kate eni tahati tuana, kmana puhi te keli na thakle mei funu ka God.” Nu nafnata cheke tuana thofno diꞌa fara. Nu neuba, keha naiknore cheke fadiꞌa ghami ghehati nei chekedi ka ghehati nafnata cheke igre. Te keli na God ginauna fatedi naikno te chekedi nafnata cheke igre.

Proveb 19:9

Chaghi ka fate na, iagho ginauna au papara. Te chaghi fabrahu na, iagho ginauna lehe.

Ululahu Pita 3:16

Nu ghotilo blaknoi famane cheke tughu balu ghaoghatho fakeli. Eghuteuna ghotilo mala doglo nei keli eghu nagnafami fabrahu. Naugna igne, naikno teke cheke fadiꞌa ghami ghotilo eigna unha te leghuni ghotilo mae Kraes na, mare ginauna na mamaja nodi fara.

Fapea Timoti 3:3

Mare ginauna theome namhani ihei. Mare ginauna tirodi hata fadelei nakhibogna ihei. Mare ginauna vuavuha cheke eidi keha naiknore. Mare ginauna magnahaghei magra koba nei eꞌei puhi eghu. Mare ginauna theome magnahaghei kaisei glepo te keli.

Efesus 4:25

Eghume te keli na ghotilo lilisei puhi te chaichaghi gne. Eghuteuna unha te chekeni ghotilo ka naikno khiloaure glepo te tutuani na ngala, naugna tahati te gnafa na kaisei ngala ka thinigna Kraes.

Proveb 24:28

Iagho thosei cheke faparini mae kheramu te theome eni kaisei glepo te diꞌa na. Iagho thosei chaghini mana ka keha naiknore.

Proveb 21:28

Mae te chaghi ka fate na ginauna lehe. Mae te cheke tutuani ka fate na, mae mala fate re ginauna fanomho fakeli ka nogna cheke mana re.

Proveb 10:18

Jame mae te pophoru nagnafa te theome namhani keha mae na, mana kaisei mae chaichaghi. Eghuteuna mae te fameomekro na, vuavuha cheke eigna keha mae na.

Nodi Khoje Hatimare Mae Jiu 15:3

mana theome mala chaichaghi tafridi keha naiknore. Mana theome mala eꞌei puhi te diꞌa ranghini kheragna fofodu na, ba theome mala vuavuha cheke te mala goigoni ni nanghagna ihei te au ka namonogna na.

Levitikas 19:11

“Ghotilo thosei blau, ba thosei chaghi tafridi keha kherami re.

Luku 19:8

Nu mae Sakias ne cheke eghu ka mae Jisas, “Lord, funu gognarogne iara ginauna na tufa keha philegna nogu glepore ka naikno te kumare. Eghuteuna ihei teke chaghini iara na, iara nake tusu fapulo ka mana fati fata uluni unha teke hata iara ka mana na.”

Luku 3:14

Keha mae soldia langau ne ghusna eghu ka mana, “Ghehati ba? Unha nate eni ghehati na?” Mana ne cheke eghu ka mare, “Thosei chaghi nei huhurudi eghu naiknore mala tusu ari sileni ka ghotilo. Nu gleꞌani ngala nomi vido taba na.”

Matiu 19:18

Mana ne cheke eghu ka mae Jisas, “Vetula aheva gre?” Mae Jisas ne cheke eghu ka mana, “Thosei falehe naikno. Thosei tolaghi pedo. Thosei blau. Thosei chaghi eigna kaisei mae kau fate.

Profet Jeremaea 20:10

Iara nomhidi naiknore buiburi eghu eigu iara, “Mae profet igne chekedi koba glepo te mhaghudi tahati te au falithui ghita igre. Tahati na kiloni mana ka nangha igne, Namhaghu na Aufalithui Heva Heva! Tahati na tei cheke ka mae biꞌo ra!” Mae kheragu iara gre jaola ofo ghau iara te mala eni iara unha glepo te jafra na ne cheke eghu fabrahu, “Tahati na saosagroni mana mala tangomana tahati te uluni mana na, eghuteuna ke tughu fapulo unha teke edi mana ka tahati ra eghu.”

Proveb 25:23

Khoburu na hata mei nakhete, buiburi na hata mei diꞌatada.

Proveb 25:18

Kate chaghi iagho eigna mae kheramu fofodu na, iagho jateula naflahi, ba gaju, ba jata eghu kolho.

Proveb 19:28

Jame te facheke mae te diꞌa puhigna na ka fate na, mana ginauna keli tagna te mala cheke chaichaghi na. Foflogna mae te diꞌa na magnahaghei te ghamuni puhi te diꞌa na.

Proveb 17:4

Mae te diꞌa na magnahaghei te fanomho ka cheke te diꞌa. Eghuteuna mae te chaichaghi na kelitagna te fanomho ka chaghi na.

Proveb 12:17

Mae te doglo na chekeni cheke te tutuani na ka fate. Nu mae te chaichaghi na mana na chaghi kolho.

Nodi Khoje Hatimare Mae Jiu 120:3

Ghotilo naikno te chaichaghi ra, ghotilo theome laseni kolho unha nate eni God ka ghotilo na. Mana ginauna na thono para ghami fara ghotilo.

Nodi Khoje Hatimare Mae Jiu 27:12

Thosei snakre lao ghau ka khamedi nogu naoka gre mala magri ghau ka nodi cheke te chaichaghi nei ka nodi cheke te nheta eghu te famamhagu ghau iara gre.

Fapea Samuel 19:27

Eghuteuna mana ari chaghi neke cheke faparini nanghagu iara na. Nu iagho funei, iagho jateula nogna engel God eghu. Eghume iagho eni glepo te doglo na ranghi ghau iara.

Fapea Samuel 16:3

Eghuteuna king ne ghusna eghu, “Nu iara magnahaghei te laseni nou mae funei iagho mae Mefiboset ia, mana na au aheva?” Mae Siba ne cheke eghu, “Mana na auꞌau Jerusalem, naugna te ghathoni mana gognarona, naiknodi Israel ginauna vahini mana mala king jateula kuꞌegna mana mae king Sol tifa ia eghu.”

Eksodas 23:7

Thosei toutonu chaichaghi mala athini ihei ka fate, ba fate faleheni ihei te theo kaisei nakhibogna na. Te eghu ghotilo na, iara ginau na theome atha koko nakhibomi ghotilo re.

Jone 7:51

“Nu noda vetula tahati ia, theome keli te fateni naikno na kate theome nomhini teu mana na. Tahati na theome fateni mana ghilei laseni ngau tahati unha puhi teke eni mana na.”

Jenesis 39:17

Eghuteuna naꞌa ne toutonu ka khetogna na u nafnata thoutonu tuare la. Naꞌa ne cheke eghu ka mana, “Maegna Hibru teke hata mei iagho mala loku teku igne ne mei ka nogu chogho iara na ne magnahaghei eni puhi te diꞌa na ka iara.

Proveb 14:5

Mae te filo tathagna na, mana theome tangomana te chaichaghi na. Nu mae te theome filo tathagna na, mana tangomana te chaghi kolho na.