Eksodas 15:21 - Buka Blahi Ka Cheke Holo

²¹ Eghuteuna Miriam ne koje eghu ka reꞌe: “Tahati koje ranghini Lord, naugna mana neke uluni magra biꞌo na! Mana neke huju soru ka thongna na mae soldia re balu nodi hose!”

Eksodas 15:21 ပူးပေါင်းရင်းမြစ်များ

Eksodas 15:1

Kate filoni hatimare mae Israel gre nogna nolaghi biꞌo Lord te falehedi mae Ijep gre ka thongna na, mae Moses nei naiknodi Israel gre eghu ne koje kaisei khoje ne cheke eghu: “Iara na koje ranghini Lord, naugna Mana ne thofno tapla faparidi fara nogna naokare. Mana neke huju soru hose nei mae teke saghe ka hose igre teure lamna thongna.

Thakle 15:3

Mare ne kojeni kaisei khoje teke rioriso mae Moses, nogna mae gloku God. Tutuani, mana kilo fnaknoni God naugna God neke toghodi mare ka nogna tothogho mae Lam, ne cheke eghu, “Nomi Lord God, te nolaghi fara, nou gloku iagho re thono biꞌo fara, eghuteuna ghehati ne jaglo nomi fara. Iagho nodi King namono te gnafa ka nauthoglu igne, eghuteuna puhimu iagho re doglo nei tutuani fara eghu.

Thakle 5:9

Mare ne kafe kojeni kaisei khoje te majaghani ranghini mae Lam na, ne cheke eghu, “Iagho nabamu te hata pepa na te mala hata koko loke are. Naugna mare neke falehe nigho, eghuteuna dadaragna glehemu iagho na kaisei fafara mala foli fajifladi nogna naikno God re. Naikno igre mei funudi ka vike te gnafa, ka cheke te gnafa, ka namono te gnafa nei ka kokholo te gnafa ka nauthoglu igne.

Fapea Kronikols 5:13

Eghuteuna kate koje teu mae te mala koje gre, hatimare mae pris gre ifu ka trampet, eghuteuna keha maere mare lalahu ka simbol nei ghita. Nodi khoje mare igre famane fara fanomhodi re. Mare koje mala kilo fnaknoni Lord, ne cheke eghu: “Lord thofno keli fara, eigna Mana ghatho ghita fabrahu.” Aonu kaisei khoveo mei ne fodu ka Sugablahi na,

Ululahu Samuel 18:7

Kate ragi na, rehati koje ne cheke eghu, “King Sol neke aknu falehe kaisei thogha, nu mae Devet neke aknu falehe nabotho thogha.” Kate nomhini khoje igne, King Sol ne thono diꞌatagna fara. Mana ne cheke eghu ka gaoghathogna na, “Rehati kojeni iara aknu falehe kaisei thogha, nu mae Devet aknu falehe nabotho thogha ke salaꞌugu iarai. Jau mare ginauna na theome raugha vahini mana mala king!” Mae King Sol ne figri tagruni mae Devet neu gaoghathogna na ne thono goghotuni fara mae Devet.

Jajis 5:3

“Mae funei ra, ghotilo fanomho! Mae biꞌo ra, ghotilo fanomho fakeli! Iara ginauna koje kaisei khoje ka gita mala kilofnaknoni Lord, nodi God maedi Israel.

Thakle 14:3

Kaisei gobi phiatutu fati thogha naikno igre mare kegra ke ulugna God mae ihei te gnokro teu ka nogna sape nafnakno nei ke uludi fati glepo te karhare nei hatimare mae biꞌo ka khiloaure. Eghuteuna naikno igre ne kojeni kaisei khoje majaghani. God neke foli fajifladi naikno igre ka naikno te gnafa ka nauthoglu igne. Mare ngala te tangomana te kojeni khoje igne.

Ululahu Samuel 18:6

Kaisei fata ke leghugna te aknu falehe mana mae nhetagna Filistia igne, armi igne neke figri neke pulo ka namono. Goro gaꞌase te gnafa Israel igre jifla mei ne thafoni king Sol. Rehati gleale'a fara ne lalahu ka tamborin balu gita ne koje balu ragi.

Fapea Samuel 1:20

“Thosei toutonu ka namono Gat! Thosei eha leghu nabrou ka namono Askelon! Te eghu ghotilo na, goro gaꞌasedi Filistia are ginauna keli tadi fara. Uve, thudi gaꞌase mae bongihehe di Filistia igre ginauna gleale'a.

Fapea Samuel 6:14

Ka narane igne mana ne fahaghe kaisei phoko blahi te kiloi mare efod, jateula mae pris neu ne ragi balu kilo fnaknoni Lord.

Nodi Khoje Hatimare Mae Jiu 76:6

God nogna mae Jekop, ka vido te cheke faheta iagho ka mare na, nodi hose nei naikno teke gnokro teku ka hose re eghu grofo ne kafe lehe.

Eksodas 15:4

Mana ne huju soru ka thongna na hatimare mae soldia di Ijep re balu nodi chariot. Eghuteuna hatimare mae kapten ra ne kafe knoho ne lehe ke lamna Thongna Ukru.