Diutronomi 6:13 - Buka Blahi Ka Cheke Holo

¹³ “Ghotilo mala ghatho tahuni Lord, nomi God, mala loku ranghini kolho mana. Eghuteuna ghotilo nhaꞌa cheke kolho ka nanghagna mana.

Diutronomi 6:13 ပူးပေါင်းရင်းမြစ်များ

Luku 4:8

Mae Jisas ne cheke tughu eghu ka mae Satan, “Te chekeni ka grioriso te blahi ia, ‘Iagho pogho soru ranghini Lord nou God, eghuteuna loku ranghini ngala mana.’ ”

Matiu 4:10

Mae Jisas ne cheke eghu ka mana, “Tei delei, ghema Satan! Naugna te chekeni teu kau grioriso te blahi na, ‘Iagho pogho soru ranghini Lord nou God, eghuteuna loku ranghini kolho mana.’ ”

Diutronomi 10:20

Ghotilo mala ghatho tahuni Lord nomi God, nei leghudi unha te chekedi mana re. Ghotilo ghatho tahuni kolho mana. Eghuteuna nomi nhaꞌa cheke re, ghotilo edi ka nanghagna mana kolho.

Diutronomi 13:4

Leuleghu fata na ghotilo mala loku ranghini Lord nomi God eghuteuna ghatho tahuni nei leghuni eghu kolho mana. Ghotilo mala nomhidi nogna cheke mana re, pogho soruni mana, eghuteuna ghatho tahuni mana kolho.

Levitikas 19:12

“Eghuteuna ghotilo thosei nhaꞌa cheke chaichaghi ka nanghagu iara, naugna goigoni ni nanghagu iara na. Iara Lord.

Profet Jeremaea 12:16

Mare mala filo leghudi puhidi nogu naikno iara re. Tifa te mei na, mare neke farirhiudi nogu naikno iara re mala pogho soru ka god Baal, eghuteuna eni nodi nhaꞌa cheke na ka nanghagna Baal. Nu gognarona mare mala nhaꞌa cheke ka nanghagu iara Lord kolho.

Profet Isaia 65:16

Jame kaisei naikno ka kantri igne tore mala fablahi, mana tore ka nanghagna God mae Ihei te Cheke Tutuani. Eghuteuna jame kaisei naikno nhaꞌa cheke, mana ginauna nhaꞌa cheke ka nanghagna God mae Ihei te Cheke kate Tutuani. Puhi biꞌo te gnafa teke thokedi mare tifa ra ginauna hui, eghuteuna iara ginauna na jaola theome ghathodi.”

Profet Isaia 45:23

Iara la enihi kaisei nhaꞌa cheke, eghuteuna nhaꞌa cheke igne theome tangomana na teke tuthughu na. Nogu nhaꞌa cheke iara igne tutuani fabrahu. Ghotilo te gnafa na mala kafe mei tuturupuku ke ulugu iara, eghuteuna ghotilo nhaꞌa cheke mala leghu ghau iara.

Nodi Khoje Hatimare Mae Jiu 63:11

Nu iara mae King. Iara ginauna keli tagu fara eigna iagho ginauna togho ghau iara mala theome tangomana nogu naoka iara re te ulu ghau iara na. Iheire teke nhaꞌa cheke ka nanghamu iagho re ginauna cheke fakeli nigho iagho, nu iheire te chaichaghire iagho ginau fofotho foflodire.

Diutronomi 10:12

Aonu mae Moses ne cheke eghu, “Ghotilo naiknomi Israel. Unha te magnahaghei eni ghotilo teu Lord nomi God ghotilo na? Ghotilo mala ghatho tahuni nei leghuni eghu puhigna mana na, eghuteuna tahati mala namhani nei loku ranghini eghu mana ka nagnafada fateote'o nei ka gaoghathoda fateote'o.

Profet Jeremaea 4:2

Jame te magnahaghei nhaꞌa cheke ghotilo ka nanghagu iara na, ghotilo cheke eghu, ‘Iara thofno nhaꞌa cheke ka nanghagna Lord mae ihei te karha te tifa.’ Jame te eni tutuani ghotilo igne na, iara ginauna fablahi ghami ghotilo naikno te gnafa ka nauthoglu igne.”

Josua 2:12

“Gognarona iara magnahaghei ghami ghopa te eni kaisei nhaꞌa cheke ka nanghagna nomi God na mala theome eni kaisei glepo te diꞌa ka iara baludi tharaknagu iara igre, jateula te eni iara ka ghopa gognarogne eghu. Ghopa na eni kaisei fagaglana ranghi ghau iara mala tutuani nomi nhaꞌa cheke na.

Nodi Khoje Hatimare Mae Jiu 15:4

Mana theome mala fofodu ka ihei te tapla jafra ka nakhibo, nu mana mala ghatho tahudi iheire te leghu nigho re. Mana mala edi unha teke nhaꞌa chekedi thegna re, neubane ninhigrana ranghini.

Diutronomi 6:2

Ghotilo, baludi thumi nei grami teure mala ghatho tahuni fabrahu Lord nomi God ka puhi te leghudi ghotilo cheke nei vetula eghu te chekedi iara ka ghotilo gognaro igre. Jame te eni ghotilo igne na, ghotilo ginauna au ka nakarha te brahu.

Diutronomi 5:29

Filo sagho, jame au fabrahu ka mare gaoghatho igne meuna, ginauna thofno keli fara. Iara magnahaghedi fara mare te ghatho tahu ghau iara fabrahu eghuteuna leghudi nogu vetula iara re. Naugna jame te eni mare na, nakarhadi mare nei thudire teure ginauna thofno keli fabrahu.

Profet Jeremaea 5:7

Lord ne cheke eghu ka iheire te au ka namono Jerusalem, “Iara theome tangomana te atha fadelei nakhibomi ghotilore. Naugna ghotilo ne tiromi figri mei ka iara, eghuteuna ghotilo ne leghuni mumuju god te theo kaisei nakarha tagna igne. Neuba iara ne tusu ari gobigna lepo te magnahaghedi ghotilore, nu ghotilo jateula mae te huhughuni puhigna tholaghi na te tei ka sugagna thau vine na ia neu ne theome au balugu iara.

Profet Jeremaea 5:2

Kate eni ghotilo kaisei nhaꞌa cheke na, ghotilo cheke tutuani kligna ka nanghagu iara Lord. Nu ghotilo chaichaghi nei tharuma'ei cheke eghu kolho.”

Matiu 5:33

Mae Jisas ne cheke eghu, “Ghotilo la nomhinihi vetula teke cheke eghu mae kuꞌeda tahati tifa ra, ‘Thosei nhaꞌa cheke chaichaghi. Nu unha teke nhaꞌa chekeni ghotilo ka nanghagna God na tuana ngala te mala eni tutuani ghotilo na.’

Eksodas 20:7

“Thosei cheke faparini nanghagu iara na. Iara nomi Lord nei God eghu ghotilo. Tutuani, iara ginau na paradi naikno te cheke faparini nanghagu iara na.

Eksodas 23:25

Jame te pogho soru kolho ghotilo ka iara nomi Lord God na, iara ginau na keli tagu ka ghotilo na tusu ari ghemi gano nei khoꞌu eghu, eghuteuna iara ginau na jaola bara fothi ghami ghotilo ka fogra biꞌo.

Diutronomi 5:11

Ghotilo thosei lausasaba nanghagu iara na, naugna iara Lord, nomi God ghotilo, eghuteuna iara ginauna parani ihei te lausasaba nanghagu iara na.

Josua 23:7

Ghotilo thosei fofodu baludi naikno bongihehe te au teu balumi ghotilo are. Eghuteuna ghotilo thosei tarai ka nanghadi nodi god mare tuare. Eghuteuna ghotilo thosei baubahu tadi ba loku ranghidi ba pogho soru ranghidi.

Ululahu Samuel 7:3

Profet Samuel ne cheke eghu ka maedi Israel gre, “Jame te magnahaghei figri ghotilo gaoghathomi are teke pulo ka Lord na, ghotilo koko mumuju gna gaꞌase god Astarot baludi keha god are. Eghuteuna ghotilo lisa lao nakarhami fateote'o are ka Lord, eghuteuna ghotilo mala tufru soruni mana kolho. Jame te eghu ghotilo na, mana ginauna fakarhi ghami ghotilo ka nodi nolaghi naiknodi Filistia.”

Ululahu Samuel 20:3

Nu mae Devet ne cheke eghu, “Mae kmamu iagho na lase nigho iagho te namha ghau fara iara na. Mana jame theome falalase ka iagho unha te magnahaghei eni mana na. Naugna mana theome magnahaghei te diꞌa nagnafamu iagho na. Ka nanghagna Lord te karha, iara cheke kate tutuani, iara namo lehehi.”

Fapea Kings 17:36

Ghotilo mala leghu ghau iara kaisei Lord ngala, mae ihei teke hata fajifla ghami ghotilo Ijep balu nolaghi biꞌo nei nanheta. Ghotilo mala pogho soru ka iara eghuteuna ghotilo mala fafara ka iara.

Profet Isaia 48:1

Ghotilo naiknomi Israel teke karha mei ka vikegna mae Juda ra, nei ghotilo goro thugna mae Jekop ra eghu fanomho mei ka cheke igne! Ghotilo nhaꞌa cheke ka nanghagna Lord, eghuteuna ghotilo chekeni kolho nate tufru soruni nodi God mae Israel. Eigna ghotilo cheke fahaehaghe koba ne naiknogna nogna namono Blahi God teuna. Eghuteuna ghotilo jaola chekeni te lelheghu ka God gna Israel, nanghagna na Lord mae ihei te au nolaghi fateote'o. Nu ghotilo thono chaghi fara! Ghotilo theome thofno leghuni kolho puhigna Mana te doglo na.

Jenesis 24:3

Iara magnahaghei nigho iagho te mala nhaꞌa cheke ka nanghagna Lord God, mae ihei te fnakno kligna nei pari teu igne. Thosei hata kaisei gaꞌase agne Kenan ka kantri te au teu iara igne te mala khetogna mae thugu iara mae Isak gne.

Diutronomi 13:5

Tifa na ghotilo neke sneka Ijep, eghuteuna Lord neke hata fajifla ghami neke fakarhi ghami ghotilo. Eghume ghotilo mala aknu falehe mae profet te fariuriu batu fadelei ghami ghotilo are, eigna mare magnahaghei ghami ghotilo te figri tagruni Lord nomi God, mala thosei ke eni mare puhi te batu fadiꞌadi naiknore igne.

Josua 24:14

Josua neke cheke eghu, “Eghume, naugna igne, ghotilo mala thofno ghatho tahuni Lord ka nakarhami re, eghuteuna ghotilo mala leghuni mana, eghuteuna leuleghu fata na gaoghathomi re mala au rheta ka mana. Ghotilo mala koko god te chaichaghi teke tarai kuꞌemi ghotilo tifa Mesopotemia nei Ijep tekura. Lord na noda God tahati, eghuteuna kaisei mana ngala te mala leghuni tahati na.