Diutronomi 4:8 - Buka Blahi Ka Cheke Holo

⁸ Eghuteuna keha kantri igre, neuba mare ne au nolaghi jateula unha neu, nu mare theome au kaisei vetula te thofno famane doglo jateula vetula te farirhiu ghami iara gognaro gre.

Diutronomi 4:8 ပူးပေါင်းရင်းမြစ်များ

Nodi Khoje Hatimare Mae Jiu 119:86

Iara thofno fatutuanidi nou cheke te gnafare iagho na. Naugna nou cheke iaghore thofno tutuani fara. Togho mei ghau iara sagho naugna naikno te diꞌa gre chekedi kolho cheke te chaichaghi re eigu iara na.

Nodi Khoje Hatimare Mae Jiu 119:96

Te laseni iara gognaro na, gobigna lepo fateote'o igre ginauna hui, nu chekemu iagho na theo ka huigna.

Letas Teke Riso Tei Mae Pol Ka Khiloau Rom 3:2

Uve, puhidi mae Jiure keli fara, naugna glepo mala togho ghita ka thua nafnata puhi fateo. Glepo te ulu na igne: te laseni naikno te gnafare, chekegna God na neke tusu lao ka khamedi mae kuꞌeda tahati mae Jiura.

Diutronomi 26:19

Eghuteuna te chekeni mana na, mana ginauna fablahi ghami ghotilo mala au nangha biꞌo ghotilo salaꞌudi keha naikno ka nauthoglu igne, eghuteuna mare ginauna thofno ghatho tahu ghami ghotilo. Eghuteuna ghotilo ginauna nogna naikno blahi Lord nomi God, thofno jateula teke nhaꞌa chekenihi mana ia eghu.”

Nodi Khoje Hatimare Mae Jiu 89:14

Iaghou ngala King na eghuteuna puhimu iaghore kafe doglo fara. Iagho fatedi koba naiknore ka puhi te doglo fara. Gobigna lepo te edi iagho re falaseni nou namha biꞌo iagho na ka naiknore, eghuteuna iagho tajini fabrahu nou nhaꞌa cheke na.

Nodi Khoje Hatimare Mae Jiu 97:2

Khoveo nei gromno teura au faligohoni mana. Mana funei frunidi nei fatedi eghu naiknore ka puhi te thofno doglo fara.

Nodi Khoje Hatimare Mae Jiu 119:144

Nou farirhiu iagho re doglo fabrahu tifa tifa. Tusu mei glalase ka iara sagho mala karha iara.

Nodi Khoje Hatimare Mae Jiu 119:160

Nou cheke iagho re tutuani fabrahu funu tifa, eghuteuna puhimu iagho te fatedi naiknore thono doglo fabrahu.

Profet Hosia 8:12

Iara neke rioriso kmana vetula maladi mare, nu ka gaoghathodi mare na, vetula igre jateula te maladi keha vikei ra eghu kolho.

Nehemaea 9:13

“Iagho neke soru mei funu kligna ka Thogele Sanai neke cheke ka nou naiknore. Eghuteuna iagho neke tusu ranghidi cheke te doglo, nei Vetula te tutuani, nei famane farirhiu te keli.

Nodi Khoje Hatimare Mae Jiu 119:138

Nou farirhiu thono doglo fara, eghuteuna iagho edi koba unha te chekedi mala edi teu iagho re.

Profet Isaia 42:21

Lord kelitagna fara te kilo fnakno ka puhigna mana te doglo. Eghuteuna mana magnahaghedi fara nogna naiknore te kilo fnaknoni mana nei nogna vetula.