Diutronomi 34:1 - Buka Blahi Ka Cheke Holo

¹ Aonu mae Moses jifla ka sare biꞌo Moab ne tei apla ka thogele Pisga, eghuteuna mana haghe kligna ka thogele Nebo ka keha phile Khoꞌu biꞌo Jordan funu Jeriko. Kate au teu jare na, Lord ne fakakhana ka mana glose te gnafa ke lamna nohi Kenan. Mana fakakhana vido te gnafa funu ka nohi Gilead ke maghati Jordan tei posa ke raru Dan.

Diutronomi 34:1 ပူးပေါင်းရင်းမြစ်များ

Thakle 21:10

Nogna nolaghi Tharunga te Blahi na mei ka iara, eghuteuna engel na batu ghau iara ne haghe ka kaisei thogele biꞌo te tei fara kligna. Mana ne falalase ka iara namono blahi, Jerusalem, funugna ka God ne soru mei.

Profet Esikiel 40:2

Ka kaisei mifi iara ne filoni Lord te hata ghau iara te tei Israel, eghuteuna mana haghe ne lilisei ghau iara kligna ka kaisei thogele. Kate filo tei iara ke mata na, iara ne filodi kmana suga te au fodu jateula kaisei namono biꞌo eghu.

Josua 19:47

Ke leghu, kate theome tangomana mare te hata nodi glose mare igre, mare tei ne magra ka naikno ka namono Laes. Mare ne uluni namono igne ka magra, mare ne aknu falehe naikno te gnafa ka namono igne, mare jaola ne hata glose te au te lithui ni namono igne. Mare ne tuthughu nanghagna nodi namono mare Laes igne ka Dan nanghagna kuꞌedi mare tifa.

Diutronomi 32:49

“Iagho tei ka nohi Moab, ka keha phile Khoꞌu biꞌo Jordan ka namono Jeriko. Eghuteuna jare, iagho tei apla ka thogele Nebo, eghuteuna iagho ginauna filoni namono Kenan nate tusu lao iara ka naiknodi Israel.

Naba 27:12

Lord ne cheke eghu ka mae Moses, “Iagho na tei ka thogele Abarim, eghuteuna filo tei iagho ka namono te gnafa ka vido te ginau tufa ari iara ka ghotilo are.

Jajis 18:29

Aonu mare neke tughu nangha namono Lais teu igne neke kiloni Dan, nanghagna kuꞌedi mare tifa thugna Jekop.

Diutronomi 34:4

Aonu Lord ne cheke eghu ka mana, “Glose igne iara neke nhaꞌa cheke hi ka mae Ebraham, nei mae Isak nei mae Jekop. Iara neke chekeni nate tusu lao iara glose igne ka vikedi thilo mare. Iara snakre nigho iagho mala filo kolho tagna, nu iara theome snakre nigho iagho te tei ruma tagna na.”

Diutronomi 32:52

Eghume iagho ginauna filo fakhaba teini kolho namono nate snakre lao iara ka naiknodi Israel, nu iagho na theome tangomana nate tei ruma tagna na.”

Diutronomi 3:27

Iagho haghe ka thogele Pisga. Eghuteuna iagho filo thongana ka vido te gnafa are. Filo fakeli ka gobigna lepo te filodi iaghore, naugna iagho ginauna theome tangomana te kasa ka Khoꞌu biꞌo Jordan.

Naba 33:47

Ke leghugna te jifla mare Almon-Diblataem na, mare neke tei au ka thogele ro Abiram ka gerigna thogele Nebo.

Naba 21:20

Aonu mare neke jifla Bamot neke tei ka gloha biꞌo ka nodi vido mae Moab re. Vido tuana au rhegna thogele Pisga te tangomana filo soru ka namono nagou na.

Jenesis 14:14

Kate nomhini mae Ebram te sneka tela tei mae nebugna na ka magra na mana ne kilodi thilo gobi nabotho nhanai nogna mae nheta re ne ngolhi leghudi mae thara re ne posa ka namono Dan.

Jenesis 13:14

Ke leghugna jifla tela teihi mae Lot na, Lord ne mei cheke eghu ka mae Ebram, “Ebram, filo tongana sagho ka vido biꞌo ana. Filo lao ke maghati nei ke mosu nei ke raru nei ke mhata eghu.

Naba 23:14

Aonu mana tathaleini mae Balam ne tei ka vido te snagla jare ka vido Sofim ka thogele Pisga. Eghuteuna jare ka thogele na, mana neke edi fitu olta ne fafara kaisei buluka nei sipu neu ka fitu olta te gnafa igre.

Josua 22:9

Soldia ka vikegna Ruben, nei ka vikegna Gad, nei ka vikegna Manase teu igre neke pulo ka nodi namonore. Mare jifla kokodi kheradire mala au faleghu ka namono Saelo jare Kenan, mala ke figri ka namono biꞌo Gilead aheva te thofno khotogna mare na, leghuni unha teke chekeni Lord ka Moses tifa.