Diutronomi 33:1 - Buka Blahi Ka Cheke Holo

¹ Moses nogna mae gloku God igne, mana la namohi nogna narane te mala lehe na. Aonu mana fablahidi naiknodi Israel ne cheke eghu:

Diutronomi 33:1 ပူးပေါင်းရင်းမြစ်များ

Josua 14:6

Keha maedi Juda ne tei Gilgal ka mae Josua. Eghuteuna mae Kaleb thugna mae Jefune igne, mana kaisei mae ka vikegna mae Kenas. Mana ne cheke eghu ka mae Josua, “Kani au teku tahati ka namono Kades Banea, Lord neke cheke ka mae Moses nogna mae gloku na eidi unha teke magnahaghedi mana ka tapa ra. Iagho jame ghathoniu igne.

Fapea Pita 1:21

Naugna nodi cheke hatimare mae profet ra, theo kaisei fata mare thedi te toutonudi glepo igre. Nu mae Tharunga te Blahi neke thofno saghe leghudi mare mala toutonuni cheke teke mei funu ka God.

Fapea Timoti 3:17

Ka puhi igne tahati nogna naikno God ra ginauna nabada fara te edi gloku te keli fateote'o.

Ululahu Timoti 6:11

Nu iagho kaisei mae nogna God. Eghume iagho nabamu na au fadelei ka glepo te diꞌa tuare. Iagho fariuriu koba mala edi unha te doglo ke ulugna God. Eghuteuna au fakeli nakarhamu na ka khiloau gne, nei loku famaku ka nou fatutuani na. Au heta ka vido te ninhigrana, biꞌo nou namha na ranghini ihei nei lolokelidi keha naiknore.

Jone 16:33

“Iara chekedi glepo igre ka ghotilo mala au ghotilo ka pharikeli balugu iara. Tutuani fara, kate au teu ghotilo ka nauthoglu igne naiknore ginauna para ghami fara ghotilo. Nu thosei mhaghu ghotilo eghu, naugna iara la tapla sorunihi mae funei te batu fadiꞌadi naiknore te edi fabrahu puhi te diꞌa igre.”

Jone 14:27

Iara na lilisei soru nogu pharikeli na balumi ghotilo, nogu pharikeli iara igne tusu ari ka ghotilo. Nogu pharikeli iara igne theome jateula glepo te tusu ari naiknogna nauthoglu igne eghu. Eghume thosei nanga nomi nei thosei mhaghu eghu ghotilo ia.

Nodi Khoje Hatimare Mae Jiu 90:1

Lord, funu tifa tela ghilei mei posa gognaro gne, iaghou ngala te jateula sugami teu ghehati na.

Ululahu Kings 13:6

Aonu King Jeroboam ne cheke eghu ka mae profet igne, “Iara magnahaghei nigho iagho te toreni God, nou Lord, mala togho ghau iara mala ke keli fapulo iara khamegu gne!” Aonu mae profet ne leghuni nogna cheke King na ne tarai ka Lord, eghuteuna khamegna King na neke keli fapulo jateula teke ululahu ia neu.

Ululahu Kings 13:1

Kate kegra fafara teu mae Jeroboam ka olta na, kaisei nogna profet God ne mei ka mana. Mae profet igne kaisei maegna Juda, eghuteuna Lord neke chekeni mana mala jifla Juda tei Betel.

Ululahu Samuel 2:27

Kaisei mae profet mei ka mae Eli ne cheke eghu, “Igne unha te chekeni Lord na: Kani teke sneka kuꞌemu iagho Ijep tifa ra, iara neke falase ghau thegu ka kuꞌemu iagho mae Eron.

Jajis 13:6

Gaꞌase igne tei ne cheke eghu ka mae Manoa, “Kaisei profet jateula kaisei engel nogna God eghu filogna na ne mei ka iara. Iara ne thono mhaghu nogu fara. Iara theome ghusnani neke mei funugna ka namono aheva, eghuteuna mana theome chekeni nanghagna na ka iara.

Jenesis 49:28

Aonu kate lasenihi tela namohi nogna narane te mala tei kokodi nabotho phei mae thugna igre, mae Jekop ne cheke ka mae thugna re u cheke igre. Eghuteuna mana ne fablahidi, funu ka mae teke kulu karha na tei gnafa ka mae teke karha leghu lahu na, leghuni unha teke magnahagheni God na.

Jenesis 49:1

Mae Jekop ne eha meidi mae thugna re ne cheke eghu ka mare, “Mei ghotilo rhegu iara agne mala kulu chekedi iara ka ghotilo unha nate thoke mei ka ghotilo ginau re.

Jenesis 27:4

Iagho hata mei kuki nafnata gano te mamahe te magnahaghedi iara re. Hata mei mala ghamu iara. Eghuteuna iara ginauna tusu ari ka iagho nogu fablahi leghu lahu na ame lehe nga iara eghu.”

Ululahu Kronikols 23:14

Nu thugna mae Moses nogna mae gloku God igne, mare loku fodu kolho baludi hatimare mae Livaet.

Profet Jeremaea 35:4

Iara athadi mare ne mei ka nogna Sugablahi Lord igne, eghuteuna ghehati tei ne ruma ka nogna chogho mae profet Hanan thugna mae Igdalea. Mae Hanan gne kaisei mae leghuni cheke gna Lord. Chogho igne namo rhegna vido aheva te au hatimare mae ofisa ke kligna gna nogna chogho mae Masea thugna mae Salum mae biꞌo gna Sugablahi igne. Mana te louloku ki gna grengatha biꞌo na.

Fapea Kronikols 8:14

Mana vavahi keha mae pris mala loku leuleghu narane, leghuni unha teke chekeni mae kmagna na. Eghuteuna mana vahidi mae Livaet mala toghodi hatimare mae pris, mala koje nei mala kilo fnaknoni God. Mana jaola vahidi mae iheire te mala reireghi grengathagna Sugablahi na, leghuni unha teke chekeni mae Devet nogna mae gloku God tifa.