Diutronomi 22:8 - Buka Blahi Ka Cheke Holo

⁸ “Kate eni ghotilo kaisei vido ke kligna suga mala faghaghafa, ghotilo bara lithui ka thaba mala theome tangomana kaisei naikno te uka te lehe na, naugna jame te lehe naikno na ghotilo ginauna khale ka falehe naikno.

Diutronomi 22:8 ပူးပေါင်းရင်းမြစ်များ

Nonomho Te Keli Teke Risoi Mae Mak 2:4

Nu mare theome tangomana te palani mana te mei ka mae Jisas na naugna ne kmana fara naikno na. Aonu mare pala ne haghe ke tagru suga ne hohoro kaisei khora ghoghodogna te au mae Jisas na. Eghume mare ne farurhu soruni mana balugna nogna sape na ke ulugna mae Jisas.

Profet Jeremaea 19:13

Ghotilo gahu insens mala pogho soru ka nathunu ke kligna suga Jerusalem, nei ka sugadi hatimare mae king. Eghuteuna ghotilo tofa waen ke kligna olta mala kilo fnaknodi keha god. Suga te gnafa igre ginauna kafe chara fara jateula namono Tofet eghu ka tathagu iara na.’ ”

Profet Isaia 22:1

Nonomho igne mei ka iara eigna Jerusalem nei eigna Glogu Mifi igne. Mana ne cheke eghu: Unha najafra teke eni ghotilo na? Naugna unha si ghotilo te haghe ke tagru suga te glealeꞌa gnea?

Fapea Samuel 11:2

Kaisei narane, fei grafi, mae Devet dofra haghe ne tei faghaghafa ke tagru suga. Eghuteuna, kate au teu mana ke tagru suga na, mana ne filo teini kaisei gaꞌase apu neu. Gaꞌase igne thono famane fara.

Ululahu Tesalonika 5:22

Tafradi gobigna lepo te diꞌa.

Mae Khuru 10:9

Kate mei namo thilomare Jopa farihotei aublatha ka keha narane na, mae Pita na la kulu haghehi ka chogho ke kligna suga na mala tarai.

Matiu 10:27

Unha te chekedi iara ka ghotilo kolho te nomhidi ghotilo igre, ghotilo ginauna tei cheke ranghidi naiknore mala kafe nomhidi mare.

Eksodas 22:6

“Jame kaisei mae fufunu kaisei khaꞌaghi ikoi ka nogna nagare na, eghuteuna biꞌo me ghilei tei kasa ka nogna nagare wit keha mae na, ba tei gnhubra fateo u wit teke kulu ukli bubukrei teku mana re teuna, mae teke eni gna khaꞌaghi igne ke folini mae khotogna nagare na eidi gano teke gnhubra ka khaꞌaghi tuare.

Profet Esikiel 3:20

“Eghuteuna jame kaisei mae te doglo puhigna na eghuteuna figri tagruni mana puhi te keli na ne eni glepo te diꞌa na teuna, nu iagho thosei cheke kolho ka mana mala tughu puhigna te diꞌa na, mana ginauna lehe ka nakhibogna na. Iara ginauna theome ghathodi glepo te doglo teke edi mana ra, eghuteuna iara ginauna para nigho iagho eigna glehegna mana na naugna iagho neke theome kulu cheke faheta ka mana kolho.

Profet Esikiel 3:18

Jame cheke eghu iara kaisei mae te diꞌa ginauna lehe, nu theome toghoni iagho mae igne te mala tuthughu puhigna mana te diꞌa na te mala fakarhini mana, mae igne ginauna lehe ka nakhibo. Nu iara ginauna para nigho iagho eigna glehegna mae igne.

Filipae 1:10

Eghume ghotilo ginauna tangomana te lasedi glepo te doglore. Ka puhi tuana ghotilo ginauna au fakeli nei doglo eghu ka narane teke pulo meigna mae Jisas Kraes.

Ululahu Korin 10:32

Thosei eni kaisei puhi te mala roꞌeni nodi fatutuani keha naiknore, neubane mae Jiu, ba mae te theome Jiu, ba naikno khiloau.

Letas Teke Riso Tei Mae Pol Ka Khiloau Rom 14:13

Naugna igne funu gognaro na, tahati thosei fateni kherada fofodu na. Eghuteuna fiofilo ghami themi, thosei eni kaisei glepo te mala batuni kheramu fofodu na ka nakhibo.

Diutronomi 22:7

Ghotilo tangomana te hata thugna na, nu ghotilo lisani idogna na. Jame te eghu ghotilo na, ghotilo ginauna tangomana te au raugha na, eghuteuna ghotilo tangomana te au ka nakarha te keli na.

Diutronomi 22:9

“Ghotilo thosei joꞌu keha nafnata sisi farihotei ka nomi nagare grep are. Jame te eni ghotilo igne na, gano te kotu nei sisidi gaju grep teu igre ginauna blahi, eghuteuna ghotilo theome tangomana nate hata na.

Ululahu Samuel 9:25

Gnafa teuna mare jifla ka vido blahi igne neke kafe soru ka namono na. Eghuteuna mae Samuel hatani mae Sol ne haghe ke tagru suga ne toutonu balugna mana jare. Eghuteuna mae Sol ne thuru ka vido igne.