Diutronomi 18:18 - Buka Blahi Ka Cheke Holo

¹⁸ Uve, iara ginauna kuru mei kaisei mae profet jateula iagho eghu, eghuteuna mana ginauna kaisei mae kheradi thedi. Iara ginauna cheke lao ka mana nogu chekere, eghuteuna mana ginauna cheke ka naiknore gobigna lepo teke chekedi iara ka mana ra.

Diutronomi 18:18 ပူးပေါင်းရင်းမြစ်များ

Jone 8:28

Mae Jisas ne cheke eghu ka mare, “Gognaro ghotilo na theome lasedi nogu cheke iara gre ghilei nhaꞌa haghe ghau iara ghotilo mae teke mei funu ka God gne kau gaju fafatha na. Kau narane tuana ame laseni nga ghotilo te theome eni iara kaisei glepo leghuni nogu gaoghatho thegu na. Nu unha mae Kmada teke farirhiu ghau iara re ngala te farirhiudi iara ka ghotilo re.

Diutronomi 18:15

Mana ginauna kuruni kaisei mae profet jateula iara eghu mala mei ka ghotilo. Mae profet igne kaisei mae kherami ghotilo, eghuteuna ghotilo ginauna mala leghuni mana.

Jone 4:25

Gaꞌase na ne cheke eghu ka mae Jisas, “Iara laseni mae fakarhai te kiloni mae Kraes na na mei. Kate mei mae Kraes na mana ginauna famane rurutha ranghi ghita tahati gobigna lepore.”

Luku 24:19

Mae Jisas ne cheke eghu ka phiamare, “Eigna unha sia?” Phiamare ne cheke eghu ka mana, “Eigna mae Jisas gna Nasaret. Mana kaisei mae profet funugna ka God. Eghuteuna nogna gloku nei nogna cheke teure thono nolaghi fara ke ulugna God nei ke uludi naikno te gnafa.

Jone 1:45

Ke leghugna igne, mae Filip tei ne thafoni mae Natanel ne cheke eghu ka mana, “Ghehati la thafonihi mae ihei mae Moses teke rioriso eigna mana ka buka vetula ia, nei hatimare mae profet neke rioriso eigna la mana. Nanghagna na mae Jisas, thugna mae Josep, mae gna ka namono Nasaret.”

Profet Malakai 3:1

Nu Lord mae ihei te nolaghi fateotei igne ne cheke eghu, “Iara ginauna kuruni nogu mae mala atha nonomho na mala kulu tarabana nabrou gu iara. Nomi Lord te ofoni teu ghotilo igne ginauna megeinga mei ka nogna Sugablahi na. Uve, mae te thofno magnahaghei filoni ghotilo igne ginauna mei, eghuteuna mana ginauna chekeni nogu nhaꞌa cheke iara na.”

Profet Isaia 51:16

Iara neke lilisei maloa gne ka thofno mala augna na, eghuteuna lilisei famaku nauthoglu igne. Iara neke cheke eghu ka naikno te au ka namono Jerusalem, ‘Ghotilo nogu naikno iara.’ Iara neke farirhiu ghami ghotilo, eghuteuna iara reireghi ghami ka khamegu iara.”

Jone 17:8

U nou farirhiu iagho teke famei iagho ka iara ra, iara la cheke laohi ka mare, la nomhidihi mare. Mare fatutuani nigho iagho ngala mae teke kuru mei ghau iara na nei laseni fara teke mei iara funu ka iagho na.

Ululahu Timoti 2:5

Eigna jare na kaisei God ngala. Eghuteuna kaisei nabrou ngala te tangomana naiknore te tei thoke ka God na. U nabrou tuana ka mae Jisas Kraes, mae ihei jaola te kaisei naikno.

Jone 17:18

Iara kuru fajifladi mala tei mare kau naiknogna nauthoglu igne, jateula ngau iagho teke kuru mei ghau iara kau nauthoglu igne.

Jone 15:15

Gognarona iara theome kilo ghami ghotilo mae gloku, naugna mae gloku na theome tangomana te laseni gaoghathogna nogna mae funei na. Nu iara kilo ghami ghotilo mae kheragu iara, naugna iara chekedi ka ghotilo gobigna lepo teke chekedi mae Mama ka iara re ngala.

Nodi Khoje Hatimare Mae Jiu 110:4

Lord neke eni kaisei nhaꞌa cheke ka iagho, eghuteuna mana ginauna nake theome tughu gaoghathogna na. Mana neke nhaꞌa cheke eghu, “Iagho ginauna pris fabrahu jateula mae Melkisedek tifa ia eghu.”

Nodi Khoje Hatimare Mae Jiu 2:6

Mana ne cheke eghu ka mare, “Iara Lord neke vahini mae king igne mala funei ka Thogele blahi Saion.”

Hibru 7:22

Gaoghathogna igne mae Jisas ne fahoroghotoni kaisei nogna nhaꞌa cheke majaghani God teke tusu mei ka tahati. Nhaꞌa cheke majaghani igne uluni u nhaꞌa cheke tiatifa na.

Profet Isaia 50:4

Nogna mae gloku Lord na ne cheke eghu, “Lord God neke farirhiu ghauhi iara ka unha mana te magnahaghei chekedi iara re, mala ke farerheta nagnafadi iheire te nigra. Leuleghu hamerane na mana fadofra ghau iara mala nomhidi iara glepo majaghani nate farirhiu ghau iara mana re.

Diutronomi 33:5

Kate salo fodu ghotilo mae biꞌo nei mae lida teu ka vikegna Israel ra, Lord na nomi King ghotilo.”

Naba 12:13

Aonu Moses ne tanhi tei ka Lord ne cheke eghu, “God, iara tore nigho iagho mala ke fakeli fapulo khabru igne ka naꞌa!”

Diutronomi 5:5

Ka narane tuana iara neke kegra fari hoteimi ghotilo nei Lord, eghuteuna iara neke cheke ka ghotilo cheke teke chekedi Lord re, naugna ghotilo neke mhaghu fara ka khaꞌaghi igne neke theome tangomana tei kegra ka thogele na. “Eghuteuna Lord neke cheke eghu,

Jone 1:21

Mare neke ghusna eghu ka mana, “Eghume mae ihei eghu sagho? Ba, iagho mae Elija?” Mana ne cheke eghu ka mare, “Theo, iara theome mae Elija.” Hatimare neke ghusna fapuloi ka mana, “Ba, iagho mae profet te ofoni teu ghehati gne?” Mae Jone ne cheke eghu ka mare, “Theo, iara theome mae profet tuana.”

Jone 1:25

mare ne ghusna eghu ka mae Jone, “Jame iagho te theome mae Kraes nei theome mae Elija nei theome mae profet teuna. Naugna unha iagho te faꞌapublahi naikno gnea?”

Jone 12:48

Mae ihei te theome keli tagna ka iara, nei tirogna fanomho ka chekegu iara na teuna, kaisei glepo nate fateni mana na. Cheke te farirhiu iara igre na fateni mana kau narane leghu lahu na.

Mae Khuru 3:22

Eghuteuna mae Moses neke cheke eghu ka mae kuꞌeda tahati ra, ‘Nomi Lord God ginauna na snakre meini kaisei mae profet ka ghotilo jateula iara eghu. Mana ginauna na kaisei mae ka ghotilo themi ngala. Ghotilo fanomho fakeli ka gobigna lepo te chekedi mana ka ghotilo re.

Mae Khuru 7:37

“Mae Moses igne neke cheke eghu ka naiknodi Israel re, ‘God ginauna na fakegra ranghi ghami ghotilo kaisei mae profet jateula iara eghu.’

Eksodas 4:12

Tei sagho! Iara ginauna togho nigho mala cheke, eghuteuna iara ginauna fagriu nigho unha te mala cheke iagho na.”

Eksodas 4:15

Iara ginauna togho ghami ghopa mala cheke, eghuteuna iara ginauna fagriu ghami unha te mala eni ghopa na. Iagho ginauna chekedi cheke igre ka mana, iagho jateula God eghu ka mana. Eghuteuna Eron ginauna mala cheke ka naiknore tughu nigho iagho, mana mala jateula foflomu eghu iagho.

Naba 23:5

Aonu Lord ne tufa lao kaisei nonomho ka phepeogna mae Balam ne cheke eghu, “Iagho ke pulo ka mae Balak eghuteuna toutonu lao ka mana nonomho igne eghu.”

Diutronomi 34:10

Mae Moses gne kaisei mae profet biꞌogna Israel ghilei mei posa gognarogne, eigna theo kaisei profet te jateula mana teu te thofno filoni tathagna Lord na te cheke balugna mana na.

Profet Isaia 51:4

“Ghotilo nogu naikno iara ra, fanomho ka nogu cheke iara igne. Nogu farirhiu iara na ginauna jifla tei ka naikno te gnafa ka keha kantri are, eghuteuna puhigu iara te keli nei doglo teu ka fate na igne ginauna mala jateula juta eghu ka keha kantri are.

Profet Jeremaea 1:9

Aonu, Lord ne habo ka foflogu iara na, ne cheke eghu, “Filo sagho! Iara gognarona tusu ari ka iagho nogu cheke na mala tei toutonu iagho ka naiknore.

Profet Emos 2:11

Lord ne cheke eghu, “Iara neke vavahi keha mae majaghani ka ghotilo mala mae profet nei keha mala nogu mae gloku iara, iara kilodi mae igre, Nasaraet. Ba? Ghotilo maemi Israel ra, glepo te chekedi iara igre tutuani ba theo? Uve, te ghathoni iara na igne thofno tutuani fara.

Naba 23:16

Aonu Lord mei ne thafoni mae Balam, ne toutonu ka mana unha te mala tonudi mana re, eghuteuna ke kuru fapuloni mana ka mae Balak mala tonu ka mana nogna thonu re.

Profet Hosia 12:14

Nu ghotilo vikedi mae Israel igre edi kmana puhi te thono diꞌa fara. Nu Lord ginauna thofno para ghami ghotilo maemi Israel, naugna ghotilo tapla jafra ka nakhibo ne cheke faparini nanghagna mana na.