Dowan Weng Olo Yone Dolanebuotabe. 3:18 - Mian

¹⁸ Nakaia unangai wanita Gode miin ne bainobo getnenimibi Gode i mo kot kebeneta dlaneta aseinin bibo mo unomabibbabe. Ina otane nakaia unangai wanita ne mo bainobo ganebibbai Gode sin baanea I aseinin bib unomabiobo genebiobe. Niminbabe, i Gode miin yanmakob ne mo bainobo geim blim kesoa i aseinin bib unomabiobe.

Dowan Weng Olo Yone Dolanebuotabe. 3:18 ပူးပေါင်းရင်းမြစ်များ

Dowan Weng Olo Make Dolanebuotabe. 16:16

Nakaia unangai wanita ne wengo wenteniba bainobo geniba aaye fuelaib mole Gode daabenea dleb utnea abilim ut danea amit nomabiobe. Otane nakaia unangai ne mo bainobo geim blim keib mole i hengminsa kesoa Gode kot kebenea dlanea moniba aseinin bib unomabiobe.

Dowan Weng Olo Yone Dolanebuotabe. 1:12

I inabib otane maki gobaniba Klayam nata tlebo geniba e bainobo gabinibbio kesoa e baabenea Ne titilo ibo omyia ibo ne meme aibobo ge baabenebiobe.

Dowan Weng Olo Yone Dolanebuotabe. 1:18

Nakai Gode atemnamino blim otane Gode miine yanmakobe Yesuse e Aye Gode bobol temo makobam bianea eta Gode kukubo nakaia unangai alebenea keim anebiobe.

Dowan Weng Olo Yone Dolanebuotabe. 20:31

Ina otane weng ele dolai olole ne funania Nakaia unangai tekein keniba Yesuse Gode Dofakamin Naka eka e Gode miin nabo geniba e bainobo geniba afen smike doboniba amit nine genita weng olo dolanamabibe.

Dowan Weng Olo Yone Dolanebuotabe. 3:16

Gode dabalim nakaia unangai kla dohalim bianea kla gobe bie kesoa e miin yanmakob ne nemanea tenia atdimo kaania nakaia unangai daabenamabi kesoa nakaia unangai wanita ne bainobo getnenimibi mo kaanibta alang namanimibbabe. I afen smike amit nine doboniba amit nomabiobe.

Dowan Weng Olo Yone Dolanebuotabe. 3:36

Nakaia unangai Gode miine bainobo gabibi afen smike doboniba amit bliobe. Eka nakaia unangai baaniba Yesuse bain Gode miinbabo ge baaib mole i afen smike mo dobonibta amit nomabibbabe. Gode i alo amit tlihabobo ge baabesebe.

Dowan Weng Olo Yone Dolanebuotabe. 5:24

Ne moton baabenamabibe, nakaia unangai wanita ne wengo wenteniba ne nemanea tlibio nakae bainobo gabib ile afen smike doboniba amit bliobe. Gode i mo kot kebenamabebabe. I kaanamin deibe deibaniba afenin deib eta bebiobe.

Dowan Weng Olo Yone Dolanebuotabe. 6:40

Ne Aye bobol tem funino inaminobe. E funanea Nakaia unangai alukum ne miine ateme bianiba e bainobo gabibi amit nomabiobo gabe i mubiang amo dimo ne imin dohaaia hananiba amit nomabiobo ge baabesebe.

Dowan Weng Olo Yone Dolanebuotabe. 6:47

Ne bain baabenamabibe, nakaia unangai wanita ne bainobo getneib ile afen smike doboniba amit bliobe.

Fole Lom teni bainobo galini futano dola omfubesebe. 5:1

Inamin kesoa nib Sume Yesus Klaiste nib hengmino walubenebua nibo bainobo gabobo Gode kin dimo nibo hengmino blim kesoa memalo nibo Gode makaababe. E nib hengmino omtlabenea bobol tem ayamo omyebiobe.

Fole Lom teni bainobo galini futano dola omfubesebe. 8:1

Inamin kesoa memalo nakaia unanga nibo Yesus Klaiste bainobo genoba e tenanoba bobol tem funino makob am biob nibo Gode mo baabeneta Ib kukubo misiam kesoa ne o molo yang kenamabibo ge baabenamabebabe.

Fole Lom teni bainobo galini futano dola omfubesebe. 8:34

Waneta Gode nakaia unanga nibo baabeneta Ibo kukub misiam nabib kesoa ne ib kukub olo yang keia enin kino watemomabiobo ge baabenamabene? Inangge baabenamin nakai blimobe. Yesus Klaiste kaanea imin hananebue nib komok anea Gode kweile kweitale kikib ye toumbianea Gode ohabianea Ne i hengmino walubeibio kesoa i ne kin dimo naka molot unang molotobo ge ohabebe.

Hiblu 12:25

Nibo klamomo! Gode wengo nibo omkayebeo mo omdibihamobe! Sinanggwano Mosese dabalim olo binebuo Gode wengo nakaia unangai omkayebe otane maki e weng olo omdibihamib kesoa Gode i watwat dabenebuo i mo skila unibta deibeim blimobe. I alukum watwat daabenebiobe. E inanebua memalo abilim ut bianea wengo omkayebe kesoa nibo e wengo omdibihamobo e nib kukub misiamo yang kenang gameo nibo gilan unoba deibenamabea bleka? Yeye nibo gilan onamino blimobe. E alukum enin sumo omyenea watwat dabenamabebe.

Hiblu 2:3

Gode nakaia unanga eli inabenebio kesoa e weng ayamo nibo hengmin temo bioba Yesuse dotlanebio weng olo deibonoba mo bainobo geim blim kenob mole nibo amit nomabbua bleka? Yeye Gode nib kukub misiamo yang kenea enin sumo omyenea watwat dabenamabebe. Bainobe. Sino nib Sume Klaiste nakaia unangai Gode nibo hengmino temo biobo dotlanamabeo weng olo omye biota eka naka mak unang maki weng olo wentibbue isak nibo baabeniba weng olo bainobo ge baabeibbiobe.

Hiblu 3:19

I inaibbuo nibo tekein kebuobe, i Gode wengo mo bainobo geim blim kesoa i e singkalin bibo mo unim blimobe.

1 Yon 3:23

Gode nibo oye bianea Ibo ne miine Yesus Klaiste bainobo gabianiba eka Klaiste baanea Ibo bainobo galin nakaia unangai gobesese nine genebuo ina bianiba gobesese nine ge oyebebe.

1 Yon 4:9

Gode funanea Ne nakaia unangai gobenin kukubo alebenano genea e miine yanmakobe dabanea daakenea dabalim ele daak tlebio kesoa nibo e niniin dimo afen smike amit nine dobomabbiobe.

1 Yon 5:10

Nakae waneta Gode e miine weng sango baabenebio wente bianea baanea Weng olo motonobo geneme nakae e kla tekein kebianea Yesuse bain Gode miinobo gabebe. Ina otane naka make Gode e miine weng sango baabenebio wentenea e mo bainobo geim blim kene mole kukub olo makob e baanea Gode dim omin nakabo genamabebe.

1 Yon 5:12

Nakae waneta Gode miine e bobol temo biba bie mole e afen smike amit nine debebiobe. Eka nakae waneta Gode miine e bobol temo mo biba bieba mole e bobol temo afen smike amit nine blimobe.