1 Kolin 6:9 - Mian

⁹ Ibo mo funanibta Bainobo galinbai kukub misiamo nabinabibi moniba Gode kimanim bibo unomabiobo ge funimibe! Bobol tem funin olo dim kesoa ibo mo funimibe! Nakaia unangai tamano hengamin kukubo wafu blib isa eka god dim omini niniino dotouleb nin kukubo wafu blib isa eka nakai naka maki alelwali taman deib doise haanin kukubo wafu blib isa eka unangi unang maki imakwali taman deib doise haanin kukubo wafu blib isa eka nakai ili skil naka maki taman deib dleb haanin kukubo wafu blib isa

1 Kolin 6:9 ပူးပေါင်းရင်းမြစ်များ

Matyu 19:29

Eka nakaia unangai wanita ne bobolo funaniba ne okoko okok kebianiba i am osa damib osa eka biem ay kamwal isa eka i dabwal tlemin isa mikimwal tlemin isa eka i meme isa deibe haabinib biamo Gode yang kenea aywal isa biemwal isa inamin namin homon osa doyenea i afen smike doboniba amit nomabiobe.

Matyu 25:34

eka Komok Sum ne kweile kweita sin dae blibi baabenia Ne Aye Gode ibo inamin namin ayamo daabenea omyebio kesoa ibo tlaniba bib unine! Sinanggwano dabale mema klane dimo bib olo klanea baanea Ibmibo genebio kesoa ibo bib olo kimanomabiobe.

Dowan Weng Olo Luke Dolanebuotabe. 21:8

Yesuse baabenea Ibo klaine! Naka maki teniba dim wengo oyem tlaibo ibo mo wentaibe! Naka homoni teniba ne niniino taitneniba baaniba Ni Gode Dofakamin Naka nitabo ge baabenimibo ibo mo wentaibe! Eka i baaniba Mubiang amo meb tlobiobo genimib osa ibo mo wentenibta bekebe unaibe!

Abosel 20:32

Ne memalo ibo dlonia Gode kweiban dim dlaiobe. Eta ibo kimanamabe kesoa ibo e wengo kla wente bianiba ib bainobo galino sbal maine! E nakaia unangai e bainobo gabibi daayebeo ibsa inanea daabenamabebe.

Abosel 24:25

Fole esak utenea kukub ayamo wafunino weng osa eka nakae bobol temo kla kimanin kukubo weng osa eka Gode nakaia unangai kukubo klanamabeo weng osa ohabinea baabasea Filikse wentenea tosiananea baabanea Kobo unebbua sinansota imin nganabkei tlebta wengo imin baanomo ge baabanea

Fole Lom teni bainobo galini futano dola omfubesebe. 1:18

Nibo weng olo tekein kebuobe, Gode abilim ut bianea inamin namin kukub misiamo nakaia unangai nabibo mo gobueim blim kenea e alo sum tliaubanoa e nakaia unangai kukub olo nabibo yang kenamabeo e bobol tem funin olo nibo aleyebebe. Nakaia unanga eli Gode kukubo deiboniba inamin namin kukub misiam ota nabianiba i Gode wengo deibo waiso bianiba Gode bain wengo mo tekein kebibbabe.

1 Kolin 15:33

I weng olo bainbabe. Ibo i weng olo mo wentaibe! Weng mako baanoa Nakaia unangai i bobol tem funino misiam fumbibi naka mak unang maki i baka haanimibo i bobol tem funino watwat dabenomabiobo genobio kesoa weng olo bainobe. Ibo nakaia unanga eli wengo wenteniba bainobo geib mole i weng olo ib bobol tem funino watwat dabenomabib kesoa ibo i weng olo mo wentaibe!

1 Kolin 15:50

Ne nekwal ibo wentine! Nakaia unangai damo dabalim olo blibo klaanamabobe. O mo monota Gode bibamo mo unamabobabe. Nakaia unangai i damo afet animib ita monibta Gode bibo unomabiobe. I moniba bibo yo biomabibo inamin namino mo klaanamabobabe. I moniba e bibo unaibo e i kla kimanamabebe.

1 Kolin 3:16

Nakaia unangai Gode bainobo gabib ibo alukum makob Gode amobe. Gode Hobe ib bobol temo bibe bie kesoa ibo olo mo dokobenomone!

1 Kolin 5:1

Ne weng mako wentia nakaia unangai obianiba Kolin bib seli bainobo galin nakaia unangai isak temo taman kukubo naniba naka make tenea e aalebe alelo sbilo omeisa unebo geiba wenti kesota futan olo dola omfubenamabibe. E kukub olo dot misiam nanebe. Bainobo galinba nakaia unanga isa kukub olo mo nanabibbabe.

1 Kolin 5:10

Ne weng olo ibo baabeibio dimo ne nakaia unangai bainobo gabibbai bobolo mo funaim blimobe. Nakaia unangai bainobo geim blimi i kukubo inaminobe. Maki tamano hengabibi blib eka maki naka mak unang maki inamin namino bobolo wayebuei blib eka maki naka mak unang maki afobeingo ayok oise unebibi blib eka maki god dim omini niniino dotouleb blibi blib na otane ne ibo mo baabenita Ibo nakaia unanga eli mo tena nimibe ge baabenimibabe. Niminbabe, inabib naka unangi bib mak bib mako alukum blib kesoa ibo deibe onamino blimobe.

1 Kolin 5:11

Ina otane ne wengo sino enang genita baabeibiobe. Nakai wanita Ni bainobo gabuobo gabib otane i tamano henga bianiba i inamin namino imaye bobolsa kebianiba god dim omini niniino dotouleb bianiba naka mak unang maki inabiobo geniba dim oye bianiba eka aa misiamo homon dowoniba gabam tol temo mima fubenoa weng namin namin bianiba eka naka mak unang maki afobeingo ayok oise une biam blib nakai ib sinwalo makobo mo bianibta i mo temna haabianiba eka imeno dait osa mo unalaibe geta baabeiobe.

1 Kolin 6:10

eka nakaia unangai naka maki afobeingo ayok oise unemin kukubo wafu blib isa eka nakaia unangai naka maki inamin namino bobolo wayemin kukubo wafu blib isa eka nakaia unangai aa misiamo homon dowoniba gabam tol temo mima fubenoa weng namin namin nin kukubo wafu blib isa eka nakaia unangai naka mak unang maki dim oyemin kukubo wafu blib isa eka nakaia unangai naka mak unang maki yenaniba i afobeingo ayok oise unemin kukubo wafu blib isa i mo monibta Gode kimanin bibo unomabibbabe.

1 Kolin 6:18

Ibo bliba nakaia unangai te baabeniba Nibo tamano henganomo geib mole ibo i wengo mo wentenibta inamibe! Deibeine! Naka mak unang maki kukub misiamo afeto namibo kukub olo i damo mo watwat dabenamabobabe. I tamano henganimib ota i damo watwat dabenamabobe.

1 Kolin 6:19

Ib dimo kukub misiamo mo namibe! Niminbabe, ib dam ole Gode amobe. Gode Hobe ibo dobyebua ib bobol tem osa ib dam osa bibe biebe. Gode ibo dohalilanea e miine dabanea daakenea atdimo kaanea ibo hengmino temo blibo walebio kesoa ibo God emiobe. E inanebio kesoa ibo ib damo ibmalo mo kima blibbabe. God eta ib damo kima biebe. Ibo mo baanibta Ni nini bobol tem funin ota wafu nomabbiobo ge obianiba eka unangi tamano henga binabibi taman deibo mo dleb haananimibe! Niminbabe, Klaiste ib hengmino walubenebio kesoa ibo e kukub osa e okok osa kla okok kebianiba e niniino dobtouleb nine!

1 Kolin 9:24

Ibo tekein kebiobe, nakai gigi unom gaibo i funaniba Nibo gigi une bianoba nakae waneta mak nibo gaisene mole eta inamin namino dleko geniba i alukum aniba ye gigi unebib biam otane mak eta sin monea maki gaisenea inamin namin ayamo dlamabe inaniba Gode okoko sbal mabianiba okok kebiba Gode baabenea Ibo ne kin dimo naka molot unang molotobo ge baabenea inamin namin ayamo doyeko!

2 Kolin 12:21

Ne funania Ne monia ibsu natlamio ne aal genalamabi ese makobo genia aglol dubutnebiobe. Sino naka homon unang homon ibo hengmino henga binibbiobe. Ne monia ibsu natlania yatemia ibo inamin namin kukub misiamo nabib osa eka tamano hengabib osa mo deibueim blim biaibo ne bobolo ilum omfutnenoa aal genalamabibe.

Galesia 6:7

Ibo mo funanibta Ni Gode dim omin wengo baabanomobo e tobtlinhalamabebo ge funimibe! Nakai imeno gumo sano dolmaib biamo damo ming gum ye damanoa ulelomabiobe. Eka getao sano dolmaib biam osa binoa damo geta ye damanoa ulelo nanomabib inaminobe. Sinanoa Gode nakaia unangai kukubo klanamabeo tlamo Gode nakaia unangai kukubo yatenea Naka elita kukub ayamo nabinibbiobe, eka elita kukub misiamo nabinibbiobe genea o molo yang kenamabebe.

Kolosi 3:5

Sinanomo Gode ibo e titilo ayal inamin einobuo omyamabe kesoa ibo dabalim olo inamin namin kukubo bobolo mo wayemone! Kukub olo inaminobe. Unang taman hengamin kukub osa eka taman bobol funin kukub osa eka unang maki yatenoba taman deib dleb denobtabo ge funin kukub osa eka inamin namino bobolo wayemin kukub osa ibo mo namibe! Nakaia unangai inamin namino bobolo wayemo mole inamin namin olota i godu benoa i God motone deibanomabiobe.

Hiblu 12:14

Ibo ib bobol temo fiab bianiba naka mak unang maki gobenin kukubo sbalma wafu bianiba eka kining anamin kukub osa kla sbalma wafunine! Nakae mo kining aim blim kene mole e mo moneta Sume God esuo mo unamabebabe.

Hiblu 12:16

Nakaia unanga ibo tamano hengabib mole kukub olo misiam kesoa ibo klaine! Eka ibo Gode inamin namin ayamo doyamabeo abuk waulib mole kukub olosa misiam kesoa klaine! Sinanggwano nakae niniino Isoe nanea e imen teb ananoa tetemea e ninge imeno fube kesoa baabanea Kobo imen olo oneba doweibiota sinanoa aye kaanemeo Gode inamin namin ayamo hek sum ne donamabeo kebta dlone ge baabanebiobe. E funanea Imen olo Gode inamin namin ayamo gaisonobiobo ge funaneta e Gode inamin namin ayam olo abukwaulebiobe.

Hiblu 13:4

Nakai alelwali dlonamin kukub osa eka unangi imakwali dlonamin kukub osa ayamobe. Inamin kesoa ibo imakwal alelwal bokalin kukubo mo debianibta tamano mo hengamibe! Nakae naka make alelo taman deib omeisa haane mole kukub olo misiamobe. Eka unang osa naka make alelsa otane o taman deib debeb haano mole olosa misiamobe. Nakaia unangai kukub olo ina binibbio mole sinanomo Gode i kukub misiam olo yang kenea yenanamabebe.

Yems 1:16

Ne nekwal ibo mo funanibta God eta inabenebo ge funanimibe! Ibo inangge funaib mole ib bobol tem funin olo misiamobe.

1 Yon 3:7

Ne meme ibo naka make tenea ibsu ye tlanea e bobol temo funanea Ne i dim baabeia i kukub ayamo deibueine genea e dim omin wengo baabene mole ibo e wengo mo wentaibe! Nakae waneta kukubo moloto wafu bie mole e naka molotobe. E makob Klaiste ulabobe.

Lebelesen 21:8

Otane nakaia unangai tosiambib isa eka bainobo geim blim isa eka kukub misiamo wafu blib isa eka naka maki yebib isa eka tamano hengabib isa eka kelo wabib isa eka god dim omini niniino dotouleb blib isa eka dim obib isa i alukum i bibo unomabibo ase sume tom baka eimbianea atole blit blit gabe tem daak unomabiobe. I bib olo unomabibo makob imin kaanomabiobo gesea wentibe.

Lebelesen 22:15

Otane nakai misiam bianiba kelo wabib isa eka tamano hengabib isa eka naka maki yenaiba kulilabib isa eka god dim omino niniino omtouleb blib isa eka dim omin kukubo goboniba wafu blib isa i alukum Gode bib olo mo tam unomabibbabe.