Mateus 5:12 - Bíblia

¹² Waneko pixka rix-salewnaletnina mitshikawa hiwekakanatatshinni Hoyakalu tokanu hinkakletatshinni. Hpoyikowatanu, himuwatan-koxa klu tshinanu himlujikolu tsru potuko hyoptotanu Hoyakalu yehiya.

Mateus 5:12 ပူးပေါင်းရင်းမြစ်များ

Gênesis 15:1

Wane pnute xyekaka Tsru Hixikatshriwa Hoyakalu tokanu hapyehitlu Abrão, satu rupnawleya waneya wane htshinru: — Hi ppikanu, Abrão. Hita pixa hinokakaklu himaletyehitatshrino hiyrunu pixa tsru pumlujikolu yoptotatshripyi.

Mateus 16:27

Klu tshinanu Jeji Whene hiyrunu hiwejikalune htowrene tenhohne hajene hapokanu Hoyakalu hoyaknuyma. Waneya renekanru satkaka yineru hkamrure wenru.

Mateus 6:16

— Hixa hohajirewaxini Hoyakalu tshinanu, hi wamonuwhojitatshinetka pimrine hixachatatshine pixka hix-hohajirewleta. Wanna honra rohajirewaxinna hektu rixhojixnawana pimrine hexyawaklu rohajirewatna. Hita wan-tshinhi yine hexyawakna tsonu kamhatshine hike hiyrunu rumlujikolna hyoptotanutkana.

Lucas 13:34

— Jerusalém, ha Jerusalém! Puylajetna Hoyakalu tokanu hinkakletatshine hiyrunu pimrinni pixa nwaka hyokanatanunni Hoyakalu psotlujeta! Hixo katmaka naluka kapolethi ho sapriklethi patlapa tapatjewhenexini pixka! Tomeji hpuko tutajinna pixka. Seyni pixa hi hitshitno.

Lucas 6:23

Ppoyikowpotutanu, puptetanu poyikowluyma rakanhinipa xyekaka pejnu klu tshinanu tsru pumlujikolu pimretahnaputka tenhohneya. Klu tshinanu wane mitshi rixkana Hoyakalu tokanu hinkakletatshine rutsrukatenniyna.

Lucas 6:35

Seyni hichinikanna hmukchikhihlenutjene. Kihleru hkamhinna, henekan-koxna wanna mwenutaklene. Waneya peneklewaxya hapnutpatka tsru potpako. Tsru Potuko Tenhohne hajeru whenenephi. Klu tshinanu kchinikanurni Hoyakalu poyahnu mtshinaklene tshinanu hiyrun-koxa hektutu kamhatshine tshinanu.

Atos 16:25

Waneya hanikaj-yetshnostsitkani Paulo, Silas hanjihohnekanata Hoyakalu rimalwukanata chikaltshiya preso hajen-koxa yijnakotna.

Atos 5:41

Hiyáhoni nuretkalune hjemahchinikanyehixikowakna yehi ruchpajyana. Rumuwamtna klu tshinanu rutakyahokkana rumukata salewnalexyawakna haté reyikkana Jesus hiwaka tshinanu.

Romanos 5:3

Hiyrun-koxa wpoyikowata salewaktshi tshinanu klu tshinanu wimatlu salewaktshikni hasruklu yineru kahwakachatatshri rixinripa.

1 Coríntios 3:8

Hitaklu hitakatshri pixkalutu pirana hiyrunu hihakatshri pixkalutu piranni satupkalutu. Satkaka yoptotanru hkamrure wenru Hoyakalu henekanna satkaka hkamrurna tshinanupa.

2 Coríntios 4:17

Xye papko salewaktshijiji wetjereru pchini hohnejiji tsonu hkojwakanwu. Seyni xye salewaktshijiji hapnutpatka yohnika tsru potuko hoyaknutshi hikeklu hohne mnikawnakatupni.

Filipenses 1:29

Klu tshinanu hixa henekka xye halukkaluru Cristo tshinanupa seyni hi koxa wale tsonu halixyawakapni seyni wale hikolukle tshinan-koxa hsalewnakakko.

Filipenses 2:17

Pa katako nuylatko nohraha hiyokanu henekachalu pixkalutupni, hixa halixle tshinan-koxa Hoyakalu renekachatko. Waneya wan-rixinipa numuwatanu hiyrun-koxa numumuwatanhi.

Colossenses 1:24

Npoyikowata klu tshinanu xawakni numukata salewnaletanu hixa tshinanupa. Nomane salewaklu hepixa nikatletlu Cristo salewnale Cristo halixatshine hapatjetatshine Cristo mane-ne tshinanupa.

Colossenses 3:24

Hichinikanru xye, hyoptotanru hkamrure wenru hixanupa Wutsrukate Cristo henekanhi. Klu tshinanu hixa Wutsrukate Cristo towrenhi.

1 Tessalonicenses 2:15

Wanna Wutsrukate Jesus-ko ruylatna. Hoyakalu tokanu hinkakletatshin-koxa ruylatna. Hix-koxa hkamnitna. Hi psojikna hpoyikotluna Hoyakalu hiyrunu ptowrunek-yine hkamnijetna.

Hebreus 10:34

Waneklu papko hixa hijha hepixlejekanatna kachitkalune. Hi htshipexyana hejnunkate seyni hsaletjekanatlu tsru poyikonutshiyma, klu tshinanu himathetlu jejnunkathi yohnikalutu mimat-nikawnakatu tenhohneya.

Hebreus 11:26

Cristo heyijikolu pixkalutu rukchikhihlenuta Moisés ptowru pohirewlu Egito tshijne hwatshri pnute. Wan-rixahchinikanuta Moisés klu tshinanu rapnutepa Hoyakalu henejyaplu hijhakalur-potu rikahwaka.

Hebreus 11:33

Nyikaka halixle tshinanu pimrikaka tshijne pohirewaxyawaka yotkakka, Hoyakalu halujyawaka hkamhajekanatna hiyrunu Hoyakalu hinkaklexyana pirana hyoptotna halixlu tshinanu. Halixlu tshinanu ruchyanamatna mhenokane.

Hebreus 11:6

Klu tshinanu halixlu minjeyma hike himukata poyikotletlu Hoyakalu. Seyni katukta haluka yanwakletlu Hoyakalu raluk-halixletlu rawa Hoyakalu. Hiyrun-koxa Hoyakalu hijhatshine hkahwakan-koxluna renejikolna heneklewatatshri Hoyakalu.

Tiago 1:2

Cristo tshinanu nmoletanune, himuwatanu ptowru hixatshri yohnirewlu hexini.

Tiago 5:10

Cristo tshinanu nmoletanune hichinikanretanna mitshikawlunni Hoyakalu tokanu hinkakletatshinni rixjekanaxyawakna. Rakotachatluna salewnalkaka kihle hchinikanurune. Wan-hixatshine hyimanu.

1 Pedro 4:13

Seyni hpoyikowatanu, klu tshinanu Cristo salewnale pixka hixa saletletkalunhi. Hiyáhoni Cristo hoyaknu hiphujexikolupa hix-koxa himwapotutanu, tsru himuwluyma potuko.