Lucas 16:15 - Bíblia

¹⁵ Hiyáhoni Jesus wan-tshinna: — Kihle hetko hikahwajnawa pimrine hetanuya seyni Hoyakalu himathethajithi, hanu potu hixatshinhi. Klu tshinanu yine hikchikhihlenrer-potu, walekni rahnanuta Hoyakalu.

Lucas 16:15 ပူးပေါင်းရင်းမြစ်များ

Mateus 23:5

Ptowruka hkamhanruna yine hexyawaklu tshinanu hkamhaluna. Hoyakalu tokanu yonatkaluru yonha paji htserutjetna. Xye pajkaka himkalna rostutna yine hexyawakaplu. Himkalna hyokakluna chichyoha samalu. Waneko pixka rixna ptowru potuko hkamrureyna Hoyakalu romkahpotuxyawakna hkahwajikolupna.

Mateus 6:16

— Hixa hohajirewaxini Hoyakalu tshinanu, hi wamonuwhojitatshinetka pimrine hixachatatshine pixka hix-hohajirewleta. Wanna honra rohajirewaxinna hektu rixhojixnawana pimrine hexyawaklu rohajirewatna. Hita wan-tshinhi yine hexyawakna tsonu kamhatshine hike hiyrunu rumlujikolna hyoptotanutkana.

Mateus 6:2

— Hiyáhoni pa hixanu penekachaxinri hike mwikatu, hi punkaklexinwa tsru sejirtshiyma, kowi hima pixka, yine hexyawakyi. Waneko pixka hixachatatshine hanjihohnewakapjiya hiyrunu poktshi hanikajiteya yine himalwuxyawakapna. Halikaka ntshinhi yine himalwuxyawakna tsonu hijhatshine hike hiyrunu rumlujikolna hyoptotanutkana.

Mateus 6:5

— Hiyrun-koxa hixa hanjihohnexini, hi pimrine hixachatatshine pixka hixanu. Wanna honra hikchikhihlenutlu hyopkaka hanjihohnerexyawakna hanjihohnewakapjiya hiyrunu hatnu hapo yoptowakkakaya ptowru yineru hexyawakapna. Halikaka ntshinhi yine hexyawakna wanna rumlujikolnina hike hma yoptoxyawakanupna.

Lucas 10:29

Seyni hinanchitkaluru pirana hasruklewatatshri haluka powratlexnawa hiyáhoni wla htshinru Jesus: — Seyni katnihe nimwastsireru?

Lucas 11:39

Waneya Tsru Hixikatshriwa Jesus wan-tshinru: — Hixa fariseu-ne-nhi, herokalu copa stono prat-koxa maleka sreta tsonuya. Seyni hitoko hixa hinanwaka katsephi hahnanuwlu, hektuntshi koxa.

Lucas 18:11

Waneya fariseu-ne yotunotatka ranjihohnetatka walepka. Wla htshinnawa: “Ha, Tsru Hixikatshriwa Hoyakalu npoyahnutyi hita hi pimrine pixka hixatshrino, wanna katshowhurune, hektutu kamhajetatshine, suxohewatatshine, haté xye tiyiro kyoptokleru pixka hi nix-hita.

Lucas 18:14

Waneya Jesus wan-tshina: — Wane ntshinhi jeji mitshikananu hanjihohnetatshri hi ruhlehchinikanutka seyni hapkat-hanjihohneretatshri kihle hchinikanutka hsatkapa hipji nwaka Tsru Hixikatshriwa Hoyakaluyma. Klu tshinanu katukta kihle rixahoxnawa mtserutu rixinixkawa seyni katukta mtserutu hixakanaxinwa htserutkotka.

Lucas 18:21

Waneya phuru hihita: — Nmatureyakawa haté xawakni nomkahitlu xye hiykolu ptowruka.

Lucas 18:9

Waneya Jesus xye yapkaklu pirana htshin-koxa, yine kihle hikahwajikatshinwa hiyrunu pimrine reyikjetna.

Lucas 20:20

Hiyáhoni hyinuwaka hislahletluna. Hwenutluna satkaka yineru waneya hyokanatluna rumlukanta hepomhalexyawakapluna Jesus. Kihle hchinikanune rixahoxnawana Jesus rumlukanuxyawakna. Wan-hixatshri hkachitko wale tshijne tsrukakalutene renekko.

Lucas 20:47

Hipnahnurutatshroni hkonahejnunkatetna. Seyni wanepnawaka hohanjihohneru rixjetna kihleru hkahwajikolupna. Seyni wanepnawaka tsru hapnokatlu rixkona.

João 2:25

Hiyáhoni hi rujhatkalu satu yineru hasrujyawaklu hanu rixa yineru klu tshinanu rimatatkalu yineru hchinikanu hwatshri.

João 21:17

Waneya map-kata rixinri wla htshinru: — Simão, Jonas whene, puchiniknohe hita? Seyni Pedro wamonuwata klu tshinanu map-kata wla htshinru: “Puchiniknohe?” Hiyáhoni wla htshinru: — Nutsrukate ptowru potuko pimata, pimatlu nuchinikyi. Waneya Jesus wla tshinru: — Pohlutanna noprane carneiro-ne pixkalune.

Atos 1:18

Waneya htiyirote tshiji ranjixya hkamrure himtuknu tshinanu. Seyni waneko hyawniyanatka, himane rupchejyanatka, rixkapi hichpajyanatkalu.

Atos 1:24

Waneya wanna ptowruneka hanjihohnetatka wane htshinna: — Hoyakalu, pixa tsonu himathethajitna yine. Pekhitanwu hanuru nyi hepi pnuretatka

Atos 15:8

Hoyakalu, ptowru yineru hchinikanu himathetatshri, hekhitlu hyoptoxyawakatkana judeu mixkane klu tshinanu renekatkana Hoyakalu Hiwejikaluru hixa pixka.

Romanos 3:20

Seyni hike yineru Moisés yonreru kamhatshri powratko Hoyakalu hetanuya. Klu tshinanu Moisés yonreru pirana rimathexikatka muhletu rixyawaka yineru.

Romanos 8:27

Hoyakalu himathethajitlu yineru. Hiyrunu Hoyakalu himatlu Hiwejikaluru hchinikanu. Hoyakalu Hiwejikaluru, Hoyakalu halujyawak-potuko ranjijetlu Hoyakalu, Hoyakalu kotspalatanune tshinanu.

1 Coríntios 4:5

Hiyáhoni xawakni hike hikolukanuwnanu hma mapokkanuko pchini hipapkolu. Hkahwakanu Wutsrukate Cristo hapojinipa papkopa waneya ptowru pirana potuko rutakyahokanu. Ruphujetanru ptowru pirana yohimatkaluru pirana, ruphujetanru ptowru yineru hichinikanretanru pirana. Waneklu satkaka halixkotko Hoyakalu tshinanu.

1 Pedro 3:4

Seyni tohchinikanu, wala hitokote hwatshri metkotu hihlexikolu, mimat-hitsruhkatni. Xye chinikantshi tuhlexinwa, jimatleropni, hwachatatshropni. Wla hixatshri hchinikanu halukkaluru potuko Hoyakalu hetanuya.

1 Pedro 5:5

Hiyrun-koxa hixa maklujinhi hyijnakotanna tsrune. Halikaka hixa ptowruneka hyijnakkakanu. Hmasaxinwa ptowru potuyako. Klu tshinanu Hoyakalu kamnitna halixkotachaxikatshinwa seyni repixna masaxikatshriwa renekachaleyma.

Apocalipse 2:23

Wala whenene nuylatanu. Hiyáhoni ptowruka Cristo halixatshine hapatjexikowakkaka hajene himatanu hitakni yineru hchinikanu hiyrunu yineru haji hetjetatshrino. Hiyrunu hixa satkaka wenutko hkamrure wenru pso.