Lucas 10:2 - Bíblia

² Wla htshinatkana: — Hamkaluru halikaka hix-potuko. Seyni kamrurewatatshine hi hixo. Hiyáhoni hanjitanru Tsru Hixikatshriwa hamkaluru towutatshri, kamrurewatatshine hyokanaxyawakapa ramyawakapluna.

Lucas 10:2 ပူးပေါင်းရင်းမြစ်များ

Mateus 20:1

— Tenhohne pohirewaxyawaka satu uva-cha himwatshri pixka rixa. Yetshpotukawa ruchpaka rujhana uva-cha kamrurewaxikatshinepa.

Marcos 13:34

Satu jeji howuka yatshripa pixka rixanu. Hmayaknuhnapukawa htowutna htowrerune, rapsatna kamrurewjetatshine kamrurtshi hiyrun-koxa htowutlu hiphapto hislahatshri ruslahyawakaplu.

Marcos 16:15

Waneya wla htshina: — Ptowru tshijne hyanu hinkakanna kihle piranalu potuko hiwekkaklewatatshri pirana ptowru tshijne hajeneka.

Marcos 16:20

Waneya rasruklene ptowru sreta hyana runkakletluna kihle piranalu potuko hiwekkaklewatatshri pirana. Hiyáhoni Tsru Hixikatshriwa Jesus hepixlewata hetkalurkakayma rekhixyawakapa halikaka pirana htshinna.

Lucas 9:1

Jesus tomhana rasruklene doze waneya renekpixkonutna kamtshine htowuxyawakapna ruchpajyawakapna yine maneya hiyrun-koxa ptowru hixatshri yeyixlu rutskalajyawakna.

Atos 11:19

Waneya Estêvão hiylatkoklunutka Cristo halixatshine hapatjetatshine hipalatatka salewaktshi tshinanu. Hiyáhoni Fenícia poktshi rapokna, Chipre poktshi, Antioquia poktshi koxa rapokna runkaklewatna hiwekkaklewatatshri pirana seyni judeu-ne tsonuko runkakna.

Atos 13:2

Waneya pa kata Tsru Hixikatshriwa Hoyakalu rimalwujekanaxinna hiyrunu rohajirewakanaxinna, Hoyakalu Hiwejikaluru wan-tshina: — Xawakni Barnabé hiyrunu Saulo hkotspalaxinno kamrurtshi tshinanu. Nnuretna satu kamrurtshi tshinanu.

Atos 13:4

Hiyáhoni Barnabé hiyrunu Saulo Hoyakalu Hiwejikaluru yokanre tshinanu, Selêucia nwaka hyana. Waneya waneko hpokowniyna hyahap-hatna. Chipre rapokna. [Wale mar powha hanikajite hwatshijitatshri.]

Atos 20:28

Hislahinwa. Hislahan-koxna pimrine Hoyakalu Hiwejikaluru henejyahi hislahiywakna. Carneiro-ne hinotatshine pixka hixanna Hoyakalu halixatshine hapatjetatshine, hanjitkalunetka Hoyakalu whene hipnaleya.

Atos 22:21

— Waneya wane pnute Tsru Hixikatshriwa Hoyakalu wan-tshinno: “Pyanutka, howuk-tshijne nyokanatanyi judeu mixkane tskalaya.”

Atos 8:4

Hiyáhoni hipalatatshine ptowruchaka hyana, runkakletluna tokantshi Hoyakalu pirana.

1 Coríntios 12:28

Wale tshinanu Hoyakalu satkaka himukatatshinhi rutaka Cristo halixatshine hapatjetatshineya. Mitshikananhapka nuretkalune rutaka. Waneya wane pnute Hoyakalu tokanu hinkakletatshine rutaka. Wane pnutetnaka halixatshine hapatjetatshine hasrukatshine rutaka. Waneya wane pnute koxa halixatshine hapatjetatshine hepixatshine kakojerune rutaka. Wannani hiyákolu kamhatshine, yeyixlu hitskalaklewaxikatshine, kosekatshine, kakojeru nrutshi himat-yanumaxikatshine, hapkata hitakletkalunetkani wanna.

1 Coríntios 15:10

Seyni Hoyakalu hihlenu tshinanu, hitatkani hita. Hiyrun-koxa Hoyakalu hihlenu hi mahijerutatka hita tshinanu. Klu tshinanu nuretkalune kamrurewle pnute nixa kamrurewleta hita. Halikaka hi hit-potni seyni Hoyakalu hihlenu hitaymalutu kamrurewata.

2 Coríntios 6:1

Hiyáhoni hixa rikamrurewatanunwu hanjithi Hoyakalu kamrureya: Hi himnanhinri Hoyakalu hihlenu wale honukla renekatkahi Hoyakalu.

Filipenses 2:21

Klu tshinanu pimrine ptowruneka wannako ralujyawaka tsonu ruchinikanretatkana seyni Jesus Cristo halujyawaka hi ruchinikanretatkana.

Filipenses 2:25

Hiyrun-koxa nukchikhihlenutlu Epafrodito tshinkaluru nsatkakanwakaxyawakaphi. Waleni nmoletanru Cristo tshinanu, nepire nkamrureya Cristo tshinanu hiyrun-koxa niyahotkakjetanruni Cristo piranaya. Hixa yokanatanruni wale hita nmahaxinri tshinanu repixyawakapno.

Filipenses 2:30

Klu tshinanu Cristo tshinanu hkamrurewaxyawaka tshinanu psokaklu rupniywaka. Kyowikowaka rutajnawa hita repixyawaka hixa mumukatanutu tshinanu.

Colossenses 1:29

Wale tshinan-koxa nkamrurewpotuta, nyapretaklewata. Numukata kamhaletlu xye Cristo himukatle tsru potuko tshinanu nmixkotjeru.

Colossenses 4:12

Epafras, satutnaka hix-yehi hichpajikatshritka, Cristo towreru halikhi. Hi rutuk-hanjihohneyehrethi seyni ranjijetlu Hoyakalu hpoyehiwa halixlekakanhi, tsrune rixkakanhi halixlewluya, psoluka Hoyakalu halukanru hixa tshinanu.

1 Tessalonicenses 2:9

Klu tshinanu hixa, Cristo tshinanu nmoletanune hichiniklu wyaprewakanaxini, wsalewnakanaxini. Hoyetshno, hohi koxa wkamrurewakanatatka satukna hixa wma kojwajyawakanupa wunkakakanathi kihler-potuko tokantshi, kihle piranalu potuko hiwekkaklewatatshri pirana Hoyakalunu.

1 Tessalonicenses 5:12

Cristo tshinanu wmoletanune wanjithi himathexyawakna hix-yehi kamrurewpotuxikatshine hinotjene, hasrukjene Tsru Hixikatshriwa Cristo piranaya.

2 Tessalonicenses 3:1

Xawakni tokantshi rumunrerupa nmoletanune Cristo tshinanu hanjihohneyehitanwu. Hanjitanru Hoyakalu teyaka hipal-leplu Tsru Hixikatshriwa Hoyakalu tokanu hiyrunu hma mimalexikowakanupa seyni ruphujetko htokanu hix-yehi ruphujexikowakatka pixka.

1 Timóteo 4:10

Wale tshinanu wyapretaklewata hiyrun-koxa wkamrurewpotuta wale piranaya klu tshinanu wmunanhanru Hoyakalu Hiwekatshri, ptowru yinerumka hiwekkakjerni, wale halixatshine halikakalun-potni.

2 Timóteo 4:5

Ha pixa ptowruko kahchinikanuruyapyi. Salewaktshicha pakotachatanu. Hoyakalu pirana jinkakletakleru pixyawaka tshinanu pkamhapotutanru kamrurtshi renejyayi. Pyapretakanru kihle piranalu potuko hiwekkaklewatatshri pirana punkaklexyawaka.

Filemom 1:1

Hita Paulo-no, Cristo Jesus tshinanu kachitkalurno hiyrunu Cristo tshinanu wmoletanru, Timóteo tshinkaluru, wyonatlo twu yonawahlo pixa Filemom tshinanupa wuchinikanru potuko, wimotsluyi kamrurtshi tshinanuya.

Hebreus 3:6

Seyni Cristo-ni ptowutkolu whentshi pixka rixa hislahlexyaplu ptowruka Hoyakalupji hajeru. Hiyrunu hixa yinwu walepji pixka hixatshinwu, wma muhroka halixlexyawakanupa seyni wpaklu halixlexiniplu tsru poyikowlu mnikawnakatupa.

Apocalipse 2:1

— Xye pirana pyonanwakatanru hiwejikaluru Hoyakalu towreru tenhohne hajeru Cristo halixatshine hapatjetatshine Éfeso poktshi hajene kosekatshri: “Xye tokantshi runkakleta katahirine sete hpotukle myo hanikamxikatshri sete katalu hanikapine, ouro kamhikolu hanikajite yapatshri, wla htshina: