Apocalipse 8:3 - Bíblia

³ Waneya satu hiwejikaluru Hoyakalu towreru tenhohne hajeru hina. Henekachalu hitajikowaka pajistsi hyopkaka. Ranikamtlu phamlu pahiru stono, ouro kamhikaluru. Hixo phamlu pahiru renekka. Hoyakalu nurrene ralixjene hanjihohnere ptowru potuka, phamlu pahiruyma henekachalu paji hoho, Hoyakalu tuplawakle hinaple hwatshri, ouro kamhikaluru paji hoho rutaklu, henekachlu rixikowakapa.

Apocalipse 8:3 ပူးပေါင်းရင်းမြစ်များ

Lucas 1:10

Waneya rapokpapkoluxinixka phamluhalo hyoxijyawaka, pimrine hixolune Hoyakalupji maleka sretate hwakanatatshine ranjihohnekanatna.

Romanos 8:34

Kathe xawaka jihyehitwu? Hikeni, klu tshinanu Cristo Jesus hipnapatka waneya riwekatka hipnatshine tskalaya. Hiyáhoni xawakni Hoyakalu potukle sreta rawa, hixa tshinanu Hoyakalu ranjita hipokananu.

Hebreus 7:25

Hiyáhoni rumukata hiwekkaklepotutna yine, wale yapatshine pejnu Hoyakalu nwaka yatshinepa. Klu tshinanu riwekhohnekanata ranjijexyawakaplu Hoyakalu wanna tshinanupa.

Hebreus 9:4

Wkatanu hruko rawa kapajiru phamluru yoxikawaka ouro-mta hwahohleru paji. Hiyrun-koxa pnute hruko rawa kapajiru Hoyakalu hwiywaka, ouro-mta hwahohleru paji. Xye paji hitokote rawa Arão kanojere surewatatshri hiyrunu kolpeto ouro kamhikolu, nikluru maná hitakluru hiyrunu Hoyakalu tokanu yine kojiretatshri pirana, sotlu tshrajkaka hwatshri yonawahlo kapajiru hwakanatatshri pejnu.

Apocalipse 10:1

Waneya satu hiwejikaluru Hoyakalu towreru tenhohne hajeru hixkolu neta. Tenhohne hserpijya. Hohimkohi pixka rixamkaluta. Kchitpo hijiw-hoho hwa. Hihoji tkatshi nikotle pixka rixa hiyrunu hiksuje tshitshmero stsihi pixka rixa.

Apocalipse 14:18

Waneya hiyrunu satu hiwejikaluru Hoyakalu towreru tenhohne hajeru, tshitshi hislahatshrini wale. Kapajiru henekachalu yoxikjexikowaka hinaple ruchpajya. Hsaplewata tsru saple rixa hitaklu hamapi hakotasputatshri himwatshri nwaka. Wla htshin-sapleta: — Putakle hamapi hakotasputatshriyma pamanru uva hawkaka tshiji hajeru. Klu tshinanu ralixatka uva-ji tshiji hajeru.

Apocalipse 5:8

Waneya wan-rixinixka quatro hiwejikalune hiyrunu tsrukakalune vinte e quatro pejnu yoptsojityehitlu Carneiro Whene tshinkalurustsi. Satkaka wanna himwakanatlu tokapikaka hiyrunu kastonolkaka ouro kamhikaluru katseplu phamlu pahiru. Phamlu pahiru yapkakletlu Hoyakalu nurrene ralixjene hanjihohnere pirana.

Apocalipse 6:9

Waneya cinco rixinri yonawahlo steno hosture hjimlajinixka, altar hmana nexyana hiwejikalune Hoyakalu tokanu homkahru tshinanu, hiylatkalunni poyehi halixlerune.

Apocalipse 7:2

Hiyrunu satutnaka hiwejikaluru Hoyakalu towreru tenhohne hajeru neta, tkatshi hichpajyawaka sreta hichpajikatshri, Hoyakalu hiwekatshriko himaxikole hanikamtatshri. Waneya tsru tokanuyma riynumamtna hiwejikalune Hoyakalu towrerune tenhohne hajene quatro, towutlu henekkalune tshiji hiyrunu mar powha rumtujyawakapna.

Apocalipse 8:4

Waneya hiwejikaluru Hoyakalu towreru tenhohne hajeru myo hwatshriya, hpalnaphata phamlu pahiru pha, Hoyakalu nurrene ralixjene hanjihohnereyma. Hoyakalu hetan-yehi hpalnaphaxya.

Apocalipse 8:5

Waneya hiwejikaluru Hoyakalu towreru tenhohne hajeru kachitlu phamlu pahiru stono, tshitshime wane htsepoxya, henekachalu paji yehi hwatshriya. Waneya tshij-hoho ruknokatkalu phamlu pahiru stono. Waneya rawatka tokantshi himkaka, rutlohlekaka, rawraklekaka hiyrun-koxa tshiji hiyolika.

Apocalipse 9:13

Waneya seis rixinri hiwejikaluru Hoyakalu towreru tenhohne hajeru kowitatka. Waneya tokantshi nyijnakota. Kapajiru henekachalu yoxikkaluru hitajikowaka, ouro kamhikolu hwatshri, quarto hwa mayawle Hoyakalu hoji sreta hwatshri ruchpaktokanuxya.