1 Timóteo 1:3 - Bíblia

³ Naluklu Éfeso poktshi putujyawaka. Nanjityi wane putujinripa Macedônia tshijne nyinpatka. Satkaka Éfeso poktshi hajene halikaka tokantshi minje rasruklewjetna. Hiyáhoni wane putukanu pumukata towutlexyawakna pnu pejnu hma mixa hasruklewlexyawakanupna.

1 Timóteo 1:3 ပူးပေါင်းရင်းမြစ်များ

Atos 18:19

Waneya Éfeso poktshi rapojinixkana wane ruknokamtna Priscila, Áquila. Waneya hanjihohnewakapji hjihloka Paulo judeu-ne riynumsaxyawakapa.

Atos 18:21

Waneya Paulo hichpakpiraxinixka waneya wane htshina: — Hoyakalu halujinipa nsatokanu pa hohne. Hiyáhoni hpokownatka Paulo Éfeso poktshi ruchpajyatka.

Romanos 15:26

Klu tshinanu halixatshine hapatjetatshine Macedônia tshijne hajene hiyrunu Grécia tshijne hajene hikchikhihlenutlu tiyiro renekachaxyawakna potukalune Jesus halixatshine hike mwikane Jerusalém hajene.

Romanos 16:17

Nanjithi nomolene, hi hetachatanna yine hixa halixle kotspalapiratatshine hixa halixle kojwakatshine, pnuko hixa hasruklewletatshine hi hixa hasruklewle pixka rixa hasruklewletna. Hi xako wannayma hyanjetanu.

2 Coríntios 11:4

Klu tshinanu hixa kihle yoptole hixinri poyikowluyma hanu hixatshriktako satu yineruko Jesus pirana hinkakletatshri, hi Jesus piran-potuko wunkakletleru pirana munkakletkatuko. Hiyrun-koxa hyoptoxiniplu satuko hiwejikaluru, hiyrun-koxa satuko hiwekkaklewatatshri pirana pnuko hixatshri hi Hoyakalu Hiwejikalurni, hiyrun-koxa hi Cristo pirana, kihle piranalu potuko hiwekkaklewatatshri pirana wunkajyatkahi walekni halixpiranatanrutka.

Efésios 4:14

Hiyáhoni hi mturune pixka wixanu walixinpatkalu Hoyakalu pirana. Mtser-halixlene ruwchiwchikak-honuka hiyrunu pnuko hanikkalunetkani hihchinikanuyna weytshi hasruklewatatshineya. Nyi yokwirewlu hasruklewatatshine walekni hitseklu pixkalutu mtser-halixlene hpupjehapokajyawakapna.

Filipenses 2:24

Tsru Hixikatshriwa Hoyakalu napohchinikanuta hixa nwaka nyiywakapa xekoyaka hit-koxa.

1 Timóteo 4:11

Xyekaka pirana pasruklewatanu xako. Hiyrun-koxa punkakanna ptowruneka puykole hkamhiywakna.

1 Timóteo 4:6

Nyi hiykolukaka puchinikkajinna wmoletanune Cristo tshinanu. Kihleru kamrurewatatshripatkayi Jesus Cristo kamrureya. Wane pixini ptseruwakahchinikanutanu tokantshi halixkaluruya hiyrun-koxa hasruklewlu halikakalutuya pomkahitanru pirana.

1 Timóteo 5:7

Xyekaka hiykolu ptowuxinna hma mukolujikowakanupna.

1 Timóteo 6:10

Klu tshinanu tiyiro halujikolu waleni ptowru hixatshri hektutu yinuwakatshri. Pimrine tiyiro ramotlerna tshinanu halixlewlu pirana hpupjexyana. Hiyrun-koxa hixo katshinolu hkamhiynawana hyohloxnawana.

1 Timóteo 6:17

Xye tshijne hwatshine tsru ktiyiroterune wane ntshina hiykolethi. Hi halixkoxikatshinepwahi. Hiyrun-koxa hi tiyiro himat-nikawnatshri hmunanhanu. Seyni halikaka Hoyakalu ptowru potuko wumuwle wenekjeru wmunanhanu.

1 Timóteo 6:3

Satu yineru pnu pejnu htshina hasruklewlexini, halikaka tokantshi Wutsrukate Jesus Cristo hasrukle hma momkahitkanuklunu, Hoyakalu homkahru pirana,

2 Timóteo 1:18

Nanjitlu Tsru Hixikatshriwa Hoyakalu renejyawakaplu kihle hchinikanu rixyawakapa Hoyakalu hetwamonutanru wale hohnepa. Pixa himatpotutlu hi pejnu kata kananu repixno Éfeso poktshiya.

2 João 1:7

Klu tshinanu hixo yokwijrewpiratatshine xye tshijne hiphujewniyatka. Hi ruphujetluna Jesus Cristo kahituru potuko rixa hapoklexyawakatkalu xye tshijne. Wan-hixatshri yokwijrewpiratatshrini hiyrunu Cristo kamnitjerni.

Apocalipse 2:14

Wanepnawaka psotsonu nkahekhi klu tshinanu hixaymalune rawna Balaão hasrukle homkahitatshine. Wale honra mitshi hasrukatkalu Balaque tshinkaluru hmajnakowkakjixyawakna israel-nerune, klu tshinanu mayawletshichakaka nikluru henejikolu hnikjixatkana yine hiyrunu rasrukatkana rapoklewaxyawakapna.

Apocalipse 2:20

Wanepnawaka nkahekhi psotsonu klu tshinanu hixa hetachajetlo suxo Jezabel tshinkaluro Hoyakalu tokanu hinkakletatshro phuta tshinikatshrowa seyni tasrukjetna yine hiyrunu tyokwijetna yine ntowrene rapoklewaxyawakapna hiyrunu hnijyawakapluna nikluru mayawletshicha henekachalurkaka.