A i rka a géɗ herkeda zaʼa, ara man ndo mbiaʼa a ga na matakwan a ndo nkèshèʼa. I rka kuɗa a di mbelawahai, ndo mbid ta azɓai. Ndo nʼnga ta matakwan a gi a wuɗai, ndo mbid ta azɓai.
Gar haha Zhiklè bi mbiaʼa a goɗ a géɗ ndohi nhadka ma: Iyè i da va ta skwi nsi mwuɗitpa, i da va ta iyam man dèrè te pa. Aman ma nʼngwèɗè ndo te kokwar tèlèba a shkè auda te ndohi nhadka ma te Jérusalem.
Nga nza ɓlussaʼa kè! Ngo-hokoya, a kokwar nʼngalaʼa, a nga zi nga a pa! Te man Ndo nzi pèc pècèk, Zhiklè nga, a zede nga, a va nga iyam dèrè a nga siaʼa, a géɗ man nga gu mali a sam na.
Derɗa ntotpa a maslaka na, a mhur nʼndikè-ma nengaʼa ɓai, a nkalahi a vata, ndo mbidèʼa azɓai. Ndo nzi pèc pècèk, wor matakwan ga, aman ndo mayam a fi va!
Te ndev kinè, ko nguraʼa, ko ngwoz, ko ndohi gai, ko gwol ngwai, da jèkeda Ndo nzi pèc pècèk, Zhiklè nga, a patsna ɓai a nda tsi ri a zhiklèhi mbèh skwi ndohi herkeda sa. Zluzlor man dèrè te pa, a dèrvowa, i woya a sam kinè ɓai.