Luke 16:15 - Ma Zhiklè

¹⁵ A ngaɗa ta: Kinè ndohi man kin tsoko gèɗ kinè auda a ri kinè, a kin gaɗa: nga ndohi nzuraʼa. Aman Zhiklè a sun ndav kinè. Skwi man ndohi ta fu a skwi mbiaʼa, a ndara na Zhiklè.

Mofa New Testament

¹⁵ A ngaƌa ta: Kinè ndohi man kin tsoko gèƌ kinè auda a ri kinè, a kin gaƌa: nga ndohi nzura'a. Aman Zhiklè a sun ndav kinè. Skwi man ndohi ta fu a skwi mbia'a, a ndara na Zhiklè.

Luke 16:15 ပူးပေါင်းရင်းမြစ်များ

I Chroniques 29:17

I suna, Zhiklè ga, ka jkeda ndav ndo; skwi nzuraʼa ambaha ka. Skwi haha tèlèba i va ka a ndav nzuraʼa, a i wuffè, aman i rka ndohi ngaya man ta ɓica va haha, a ta va ka skwi a ndav tèlèba.

II Chroniques 6:30

ka da tsenaʼa te zhiklè te géɗèʼa, a sam nʼnzi ngaya, a ka pra ta malai a ka ga na a ndo staɗ staɗ tèlèba ara skwi nengaʼa man a gau. Aman ka stadgenè ka sun ndav ndohi tèlèba.

Psaumes 10:3

Aman ndo ambaɓiaʼa a fi va a gèɗ ntétékè nengaʼa. Ndo metsar a phömdè, a dérɗè Ndo nzi pèc pècèk.

Psaumes 49:13

Ndo, a nʼnjèl nengaʼa, a nzi azɓai, lèmèlèmè ara skwi ndzham man ta zli daiaʼa.

Psaumes 49:18

Te mʼmetsai a hil skwi na a ri azɓai, ko kèshkata, skwi mèshèlè nengaʼa a dè vèvèɗ a vna azɓai.

Psaumes 7:9

Ndo nzi pèc pècèk a gi kita ndohi herkeda. Ndo nzi pèc pècèk, bozl kita a géɗ ngi-zura ga, a géɗ man i ga skwa ɓai.

Proverbes 16:5

Ndo man a fi va, a ndara na Ndo nzi pèc pècèk. A vava, a da ngècè kita na.

Proverbes 20:6

Ndohi kumba ta fi va ta a ndohi mbelaʼa. Aman ndo nlèɓèslèʼa na tema?

Proverbes 21:2

Ndo a hur pèc pècèk, civèɗ ga amba; aman Ndo nzi pèc pècèk a wuzhè ndav ndo.

Jérémie 17:10

Iyè Ndo nzi pèc pècèk, i jkeda ndav ndo, i wuzhèʼa tʼhwaɗaʼa, a i va na a ndo staɗ staɗ ara skwi man a giaʼa, a skwi man a nʼngots te pa.

Mal. 3:15

Dara man nga gaɗa: Mwuffè a sam ndohi nfi va. Ndohi ndérɗè Zhiklè ta wèl va genè ka ɓai, ta pi Zhiklè a wai a ta zli va ta auda a samaʼa ba.

Matthew 23:5

Aman skwi tèlèba ta gi a sam di ndohi genè. Ta ngreda ɗèlèwèr mbiaʼa, man ta tsi ri a vna, a bècècèr maslaka mbiaʼa.

Matthew 6:16

Aman kin jèkeda skwi nʼndai, kin da gursa di ɓai, ara ndohi nʼngwèdè ndo. Tengaʼa ta min dai, aman ndohi ngiɗè ta rkaʼa, ara man ta jèkeda skwi nʼndai. A vava i gaɗa kinè: Ta ngots skwi ntul ta ma.

Matthew 6:2

Aman ka vi skwai, ka baheda ɓai, ara ndohi nʼngwèdè ndo ta giaʼa te gi-njèn-gè-ma-Zhiklè, a civèɗ, a ta woy a ndohi ta slebarde ta. A vava i gaɗa kinè: Ta ngots skwi ntul ta ma.

Matthew 6:5

Aman kin tsi rai, kin gu ara ndohi nʼngwèdè ndo ɓai, man ta woy a ta zlècè, a ta tsi ri te gi-njèngè-ma-Zhiklè, a zolom civèɗ, a ta woy a ndohi ngiɗè ta rka ta. A vava i gaɗa kinè: Ta ngots skwi ntul ta ma.

Luke 10:29

A ndo njèngè ma a nzevi na auda, a ngaɗa na Yèsu: Ndo ga wa? A Yèsu a ngaɗa na:

Luke 11:39

A Bai a ngaɗa na: Anai, kinè ndohi pharisie, kin pènè deɓ kokwi a gandaf; aman ndav kinè nʼndha a skwi metsar a malai.

Luke 18:11

Ndo pharisie a nzlatsa, a ntsu ri arsa: Zhiklè, i shida ka gèɗ, a géɗ man iyè ara ndohi ngiɗè ka ɓai, ara ndohi nked ndo ka ɓai, ndohi man ta gi zuraʼa azɓi ka ɓai, ndohi mphömè ka ɓai, ara ndo ncèkèlè skwai haha ka ɓai.

Luke 18:14

I gaɗa kinè: Nengaʼa a nʼndo ngwai a ndo nzuraʼa, nara ngiɗè ka ɓai. Ndo man a gre gèɗ na a ri na, ta manda na gèɗ a hai. Ndo man a manda gèɗ na a hai a ri na, ta da slambaɗda na gèɗ.

Luke 18:21

A nengaʼa a ngaɗa na: I goko skwi haha tèlèba daga kra.

Luke 18:9

A ngaâa ta ndohi ngiɗè, man ta hur te ndav: nga ndohi nzuraʼa, a ta rka ta ndohi ngiɗè ara ndohi ambalai, ngèlègèɗ-ma haha:

Luke 20:20

A ta wèrèʼa, a ta zlinde ta ndohi nko-tèʼa; ta ngwoda va ta a ndohi nzuraʼa, a ta zeɓiaʼa: a gi mali te ma na ɗè? A ta woy a ta pinèʼa a sam ndohi mbibihiaʼa a kita ngomna.

Luke 20:47

A ta ndi gi ngwozi mazihai, a ta gi ara man ta tsi ri kumba, a sam di ndohai. Kita tengaʼa a gi wuɗitpa holholaʼa.

Jean 2:25

Ko ndo ngiɗè a nʼngra na ɓai, a sun skwi man a zhè te ndav ndo.

Jean 21:17

A ngaɗa na mamakaraʼa: Simon, kra Jonas, ka woy iyè dè? A Pierre a kuɗi te ndav na, a géɗ man a ndzhoɗo mamakaraʼa: Ka woy iyè dè? A ngaɗa na: Bai, ka sun skwi tèlèba, ka suna, i woy ka. A Yèsu a ngaɗa na: War tambakihi ga!

Actes 1:18

A nengaʼa a nsum dak a skwi malai, a ntüshko gèɗ a hai, hwaɗaʼa a ntuw na, a Vayats a mshkè auda.

Actes 1:24

A ta tsu rai: Bi Zhiklè, ka sun ndav ndohi tèlèba; ngreda nga ndo te ndev ndohi ncèwa haha,

Actes 15:8

A Zhiklè man a sun ndav ndohai, a ngu malwudai a sam tengaʼa, a mva ta Mèzhèɓ Zhiklè lèmèlèmè ara man a nga,

Romans 3:20

Gar haha a njèjèr ma kita Zhiklè, ndo a slaha a ndi a ndo nzuraʼa a sam di Zhiklè azɓai. Te ma kita Zhiklè, ndo a sun mali genè.

Romans 8:27

Aman Zhiklè man a wuzhè ndav ndo, a sun skwi man Mèzhèɓ Zhiklè a woyaʼa, te man nengaʼa a nza ta a deɓa a ndohi nkezlaʼa, ara man Zhiklè a woyaʼa.

1 Corinthians 4:5

Gar haha kin bazla na mali a gèɗ a ndo ngiɗè tsam tsam ɓai, sèi Bai Yèsu a shkè, nengaʼa a di a cko skwi tèlè auda a sam nhélaʼa, ko skwi man nʼnghedaʼa te ruva, a ngrédè skwi man ndohi ta hérè te ndav ta, auda. Te deɓaʼa Bi Zhiklè a slébèrdè ndo staɗ staɗ, ara man a ngècè a géɗ skwi man a gau.

1 Peter 3:4

Aman a woy va kinè ntila tʼhwaɗaʼa, a skwi te ndav man a gédè-shè azɓai, a mèzhèɓ nlüɓekwaʼa, a gumai. Nasa skwi mbiaʼa a sam di Zhiklè.

1 Peter 5:5

Lèmèlèmè kinè golahai, va-manda gèɗ a hai a sam babgihai. A vava, kin tèlèba, va-manda gèɗ a hai a sam tèlèba! Aman Zhiklè a sassaya ndav a sam ndohi nfi va, a va ta pombai a ndohi mʼmanda gèɗ ta a hai.

Apocalypse 2:23

A i woya man i bazl ta wudahi ta. A mpi ndohi Zhiklè tèlèba sèi da suna, iyè man i wuzhè ndav, kala nguzgoz ba, a i va na a ndo staɗ staɗ te ndev kinè ara mizlinè na.

I Samuel 16:7

Aman Ndo nzi pèc pècèk a ngaɗa na Samuel: Ndo da ga ka di ɗokɗoka ɓai! Ka hur a géɗ ndo ngurèa ɓai! I woy nengaʼa ɓai. Zhiklè a woy ndo te di azɓai, ara man ndohi ta woyaʼa. Ndohi ta woy ndo te dai; aman Zhiklè a pi di a ndav.