11 A zluèɗ a bkwai, a nfa na vogwa a dal kokwar.
Aman marai sèi ta da auda a dal kokwar, a ta fa na vogwa, lèmèlèmè ara nshèlèkuraʼa. Nasa skwi man mpi ndohai ta via a gèɗ malai.
A marai, a bkwi ba a zluèɗ ba a ziaʼa ba ta fa na vogwa a dal kokwar, ara man Ndo nzi pèc pècèk a gada na Moise.
Mbeza skwi man a vau a gèɗ malai, a kwa deɓa, a mbeza te verzi menad, a nfa na vogwa a gèɗ sam mvi skwi a Zhiklè, ara man Ndo nzi pèc pècèk a gada na Moise.
Te deɓaʼa a nzloho skwai, a nʼndara na Zhiklè, a wudahi Aaron ta va na Pombaz, a nengaʼa a nguceda a zlazlar sam mvi skwi a Zhiklè.
